Read Yupik Isaiah 22 Bible Online

Isaiah 22 - Yupik bible

Isaiah 22

¹Una qaneryaraq qaneryarauguq Tangrruat Kuignayuatnek. Ciin nunarpiim yui tamarmeng angnirtat enet qaingitni?

²Nunarpiim yui tamarmeng pek'ngut, neplirluteng. Yut'en anguyagmi tuqullret callugluteng tuqullrunritut.

³Ciuliqagceci tamarmeng qimallruut teguarurrluteng-llu ingluliurupailegmeng.

⁴Ilangcivkenii uitasnga aluviliuruteknaunka yum'a ilait tuqullret. Qarutengnaqevkenii uitaskia.

⁵Uum nallii nanikuanarqelriaruuq, cirliqlerkaat yuut, ayuquciirulluteng tuaten Tangrruat Kuignayuatni, ATANREM Artuqailnguum tuc'etaa wangkutnun. Qacarneq-llu nunarpiim avaperutii elavcimaluni, ikayurcetaalriit-llu erinait akiuggluteng ingrini.

⁶Anguyagtet Elim-aam nuniinek taigut horse-aatgun, caskurluteng urluvernek pitegcautnek-llu. Anguyagtet-llu Kir-am nuniinek tailuteng akngircailkuteteng upingaluki.

⁷Judah-m-llu naungignarqelriit kuignayui imangut akalrialegnek ayagassuutnek; anguyagtet horse-aani ugingalriit uitaluteng Jerusalem-aam iteryarain ciuqerritni.

⁸Tamarmeng-llu Judah-m ingluliurutkai ilevluteng. Tuaten pillrani, caskunek paivciuten caskut qemangqaviatnek.

⁹Tangrraci Jerusalem-aam qacarneri kituggnarqelriit. Yuvriraci-llu tamalkuita enet Jerusalem-aami ilait-llu imlluki teggalquit aturnaluki tumarutekluki qacarneranun nunarpiim. Mervigkarpecen̄ek-llu,

¹¹pililuci nunarpiim iluani imangesqelluku mermek qurrlulriamek ak'allarmek mervillermek. Tau͡gaam elpeci catkenritarci Agayun, picirkiuraqestellra mat'um ak'a ciuqvani maa-i-llu picirkiurallni piciurtelluku.

¹²Quyinrulriim ATANREM Artuqailnguum qayagaullruaci angniinaci aluviliuresqelluci, nuyaci asmeggluki keligluki missuullernek-llu at'esqelluci.

¹³Tau͡gaam elpeci engelaraqluci nunaniryugtuci. Tuquciluci qusnginek kuluvagnek-llu neqkarpecen̄ek ner'uci, merluci tuaten wine-amek. Qanraqluci, “Nernaurtukut mer'aluta-llu unuaqu tuquciqngamta.”

¹⁴Quyinrulriim ATANREM Artuqailnguum tungaunani qanrutellruanga qanerluni, “Mat'umek assiilngurmek aug'aricimangaitut unguvallrata taktaciatun. Wiinga, Quyinrulria ATANEQ Artugailnguq, qanertua.”

¹⁵Quyinrulriim ATANREM Artuqailnguum qanrutaanga ayaasqellua Shebna-mun, aulukestiinun angayuqam eniin, qanrulluku-llu,

¹⁶“Cauyukluten umyuarteqsit? Kia pisqekiiten elagcit elpet qungurkarpenek teggalqum qacarnerani?

¹⁷Takarnarqelriaruyaaqeciquten, tau͡gaam ATANREM teguluten egciiqaaten.

¹⁸Teguciqaaten angqatun eggluten-llu angenrulriamun nunamun. Tuani tuquciquten caniatni akalrialget ayagassuutet ucuryaguteklerpet. Kasngunarqutnguavet atanerpet enelgutainun.

¹⁹ATANREM aug'arciqaaten calivigpenek atrarrluten-llu quyilriamek caliarpenek.”

²⁰ATANEQ Shebna-mun qanertuq, “Tamana piciureskan, aqvavkarciqaqa pisteka Eliakim-aaq Hikiah-m qetunraa.

²¹Ac'eciiqaqa-llu aturallerpenek calivigpeni, naquguten-llu at'elluku, piyunarquciqellren-llu elliinun piksagutelluku. Aataulriatun ayuqeciquq Jerusalem-aam yuinun, Judah-llu yuinun.

²²Piunarqucingqerceciiqaqa angayuqamun tungliuvkarluku, kinguvranun David-aam. Kelucairissuutnek caliami piinek avalingqerciquq; ca ikireskii, allam palusngaitaa, palutellra-llu, allam ikirrngaunaku.

²³Muragtun agavigkatun ukinermun caltuqiceciiqaqa asvairiluku, takarnarqutnguciquq-llu tamalkuitnun ilaminun.

²⁴“Tau͡gaam tungayai aulukaari-llu caknernariciqut elliinun. Taukut agavikciqaat egatetun qantatun-llu agavigmi agalriatun!

²⁵Tuaten-llu pikan, agavik asvairqumaluni kapusngalleq aug'arciiquq iggluni-llu. Tuani-llu agavigmi agallret tamarmeng iqukliciiqut.” ATANEQ qanertuq.