Read Yupik Isaiah 23 Bible Online

Isaiah 23 - Yupik bible

Isaiah 23

¹Una qaneryaraq Tyre-aq piluku. Nepliaci angniinaci, sun'aliurten̄i imarpigmelngurni! Culurrvigci Tyre-aq piunriumauq; enengutai uciirvii-llu imenrurrluteng. Ut'reskuvci Cyprus-aamek, niiciiqerci.

²Nepliaci, tuneniartaini Sidon-aam! Ayagcecillruuci angutnek

³imarpiim akianun kiputesqelluki tun'isqelluki-llu mukaarkanek naullernek Egypt-aami, tun'ivikesqelluki kipussaagvikluki-llu atanruviit tamalkuita.

⁴Nunarpaak Sidon-aaq, caunrilkumauten! Imarpiim, et'uqrin-llu imarpilugpiam, qessayagutaagten qanerlutek, “Wiinga irniangqeqsaitua. Anglicariksaitua tan'gaurlurnek wall'u nasaurlurnek.”

⁵Egypt-aarmiungung'ermeng tatameciqut niiskunegteggu piunriucia Tyre-am.

⁶Nepliaci angniinaci, Phoenicia-rmiuni! Qimangnaqici Spain-amun!

⁷Waniwauyaaquq-qaa nunanirqelria nunarpak Tyre-aq, ak'a piurtelleq? Wani-wa-qaa una nunarpak ayagcecilalleq nunaliarkanek imarpiim akianun?

⁸Kituuga tauna picirkiulleq man'a tamalkuan tuc'etarkauluku Tyre-amun, angayuqat nunarpiitnun, tuneniartai-llu takaqumanrullrulriit angutni nunam qaingani?

⁹ATANREM Artuqailnguum tuaten ellirarkaurcetellrua. Ellii tuaten picirkiullruuq iquklicetnaluku ucuryagtelallrat canek pillermeggnek ellmikuurrnaluki-llu qigcikellrit yuut.

¹⁰Ayagluci nunavcen̄un nauceciiyarturci, Spain-armiuni, kitumek akiurtekairutuci.

¹¹ATANREM unatni yagtellrui imarpiim quliikun angayuqauviit-llu piunrillrui. Alerquiluni-llu Canaan-aami asvairqumalriit piunriisqelluki.

¹²Nunarpak Sidon-aaq, angnillren iquklituq, yut'en-llu nangcimaluteng. Qimangermeng-llu Cyprus-aamun, tuani cali uqingaitut.

¹³(Babylonia-rmiungullruut, Assyria-rmiunguvkenateng, Tyre-aq ungungssiarnun nunaksagucestellra. Babylonia-rmiunguut naparcillret avatairluku anguyagcuutekameggnek, navgurluki asvairqutai Tyre-am, nunarpak-llu imerqelluku.)

¹⁴Nepliaci, sun'aliurten̄i imarpigmi! Tyre-aq nunarpak cacetuqutek'lallerci piunrirtuq.

¹⁵Pillerkaq agiirtuq Tyre-am nalluyagucimallerkaa allrakuni yuinarni pingayuni qulnek cipluku (70), angayuqam unguvallran taktatiinek. Taukut allrakut pellukata, Tyre-aq ayuqeciquq akissutun yuarutmi:

¹⁶Aturcetaan teguluku, nunani tarraten, naklegnarqelriami akissuuq nalluyagucimalriami! Aturcetaarluten aturki yuaruteten atulalten angutet ataam ullalarniaraatgen.

¹⁷Allrakut yuinaat pingayun qulnek cipluku (70) pellukata, ATANREM Tyre-aq ataam ayuqucillratun uterceciiqaa, ellminek-llu akissuutekciquq tamalkuitnun ellarpiim angayuqauviinun.

¹⁸Akingutai-llu tun'illermikun ATANERMUN pikevkarciqai. Elliin qemaggngaitai, tau͡gaam agayulalriit ATANERMUN aturciqait neqkameggnun aturarkameggnun-llu kipuyutekluki.