Read Yupik Isaiah 24 Bible Online

Isaiah 24 - Yupik bible

Isaiah 24

¹ATANREM cakarniiruceteqataraa nuna uitaviksunairulluku. Nunam qainga qipciqaa cekavvluki-llu yui.

²Tamarmeng ayuqellriamek ciunerkangqerciqut agayulirtet yuut-llu, pistet atanrit-llu, kiputestet tun'istet-llu, navriskengtulit navralriit-llu, tukuulriit arrsaulriit-llu.

³Nuna navguumaciquq cakarniinani. ATANEQ qanellruan tuaten pinrilngaituq.

⁴Nuna kinertuq nalaluni-llu; tamarmi ellarpak cirlaurrluni; tamarmek qilak nuna-llu arulutek.

⁵Yuut menuurtellruatgu nuna atunritlermegteggun Agayutem alerquutai akwanun-llu piugarkaq akqun atunritlermegteggun.

⁶Taumek Agayutem nuna aniqlaagaa. Yui-llu nangtequt pinarqucirteng aturluku. Unguvalriit ikgeliinarluteng.

⁷Wine-arkani naucetaat nalaut, wine-aq-llu nurnariluni. Tamarmeng-llu angnilallret angniirulluteng,

⁸nunanirqelriit-llu aturcetaarit cauyait-llu nepairulluteng.

⁹Wine-amek mer'aluteng angnirluteng atulriartairutuq; wine-aq-llu neqnikestairulluni.

¹⁰Nunarpiim iluani ca tamarmi ayuquciirutuq, yuut-llu enemeggnun kelucautelangluteng alingluteng.

¹¹Yuut nep'ngut tumyarani wine-artairucan. Angniq tamartuq akwarpak piunqiggngairulluni; ancimaluni nunam qainganek.

¹²Nunarpak imenrurtut, iteryarai-llu navguumaluteng.

¹³Tamarmeng atanruviit ellarpiim qainganelnguut waten piciqut. Ayuqeciquq-llu quyurciyaram iquatun, olive-aat tamarmeng igcecimaluteng napanek, nangenrit-llu atsat wine-arkat qecuumaluteng napayaarnek.

¹⁴Unegtaulriit aturciqut nunaniryugluteng. Kanaknelirnermelnguut qanrutkeciqaat angtacia ATANREM,

¹⁵calaralirnermelnguut-llu nanrarciqaat. Yuut-llu uitalriit imarpiim cen̄iini nanrarciqaat ATANEQ, Agayutiit Israel-aat.

¹⁶Ellarpagmi-llu yaaqsinqurraitnek niirqeciqukut yuarutnek nanrarluku Israel-aaq, ellualria atanruvik. Tau͡gaam ciunerkairutua wiinga! Piniarusngiinartua! Yuut ilameggnun piciuvkenateng pilriit taqsuunateng, umyuarrliqellrat arcariinarluni tau͡gaam.

¹⁷Niicugnicia, tamarpeci! Alingnarqelriartangqertuq, petmigtangqertuq, neganek-llu elpecen̄ek utaqauralrianek.

¹⁸Kina imna alingnarqelriamek qimakuni petmigmun igciiquq, kina-llu imna petmigmek ankuni negamun napluni. Ellarvagciquq cakneq, nunam-llu tusngallra arulaluni.

¹⁹Nuna quligciquq ciamluni-llu, ullirrluni-llu.

²⁰Nuna-llu ayaluaciquq taangiqelriatun, arulaluni-llu enecuartun anuqerpagmi. Assiilnguin ellarpak nanrumaat; ilveciquq naparcimanqiggngaunani.

²¹Pillerkaq agiirtuq ATANREM anucimirqecetaallerkai pinilget qilagmi nunam-llu atanirturtai.

²²Agayutem quyurciiqai angayuqat ataucimun itertatun petmigmi uitalriatun. Kelucauciiqai itercivigmun, anucimirqecetaarumallerkaat tekitnatkaanun.

²³Iraluq tan'gericiquq, akerta-llu tanqigngairulluni, tua-i ATANEQ Artuqailnguq atanruciqngan. Atanirturiluni Jerusalem-aami Ingrimi Zion-aami, yuut-llu ciuliqagtaita ucurnaa tangerciqaat.