Read Yupik Isaiah 25 Bible Online

Isaiah 25 - Yupik bible

Isaiah 25

¹ATANEQ, Agayutkamken; Niisngaciqamken nanrarluku-llu atren. Irr'inarqelrianek calillruuten; piciurcetellruaten ak'a ciuqvani picirkiuralten.

²Nunarpiit imenrurcetellruaten asvairqutait-llu navgurluki. Enerpiit inglukestemta piliaqellrit catairutut naucimanqiggngaunateng.

³Atanruviit pinilriit yuita nanrarciqaatgen; qigcikumaciquten nunarpaitni nangcilriit atanruviit.

⁴Arrsaulriit casciigalnguut-llu qimallruut elpenun elluiluteng-llu uitaluteng picurlagnarqelriim nalliini. Elpet uqisvingqercetaten ellarayagmek taliyucirluki-llu puqlanilriamek. Naklegilnguut inglukestet curulartut uksumi ellarayagtun,

⁵kiirpagtun-llu ellalliyuilngurmi nunami. Tau͡gaam elpet, ATANEQ, nepairtellruaten inglukesteput; nepairtaten nangcitalriit yuut qayagpagallrit, amirlut nengllangevkalauciatun kiirpak.

⁶Wani Ingrimi Zion-aami ATANEQ Artuqailnguq upciuq nerevkaritekamek tamalkuitnun ellarpiim angayuqauviinun—nerevkaritekamek assinkacagaitnek neqkat wine-at-llu assinkacagaitnek.

⁷Tuani alqunaq au͡g'arciqaa amirlua angniitnam tamarmeng angayuqauviit naliumastiit.

⁸Quyinrulriim ATANREM piunrirciqaa tuqu akwarpak! Elliin perrirciqai aluviit tamalkuita iingitnek, caunrilkumallrat-llu au͡g'arciqaa yum'i atullrat ellarpagmi tamiini. ATANEQ elliinguluni waten qanertuq.

⁹Tamana tuaten pikan, yuut tamarmeng qanerciqut, “Ellii wangkuta Agayutkarput! Ellii cacetuqutekellruarput wangkuta, elliin-llu aviutellruakut. Ellii ATANRUUQ! Wangkuta cacetuqutekellruarput, watua-llu angnirtukut nunaniryugluta-llu elliin anirtuakut.”

¹⁰ATANREM camun pivkarngaitaa Ingriq Zion-aaq, tau͡gken Moab-am yui tutmaucimaciqut can'get tutmaucimalauciicetun ungungssiaraat anaitnun.

¹¹Yagciiqait unateteng kuimangnaqelriatun, tau͡gaam ATANREM kasnguyugceciiqai, unatait-llu kiciiqut catnguvkenateng.

¹²Elliin piunrirciqai asvairqutai Moab-am qacarnertuumaan qertulriamek imevkarciqai urraurrluki.