Read Yupik Isaiah 26 Bible Online

Isaiah 26 - Yupik bible

Isaiah 26

¹Erneq tekiciiquq yuut atullerkaat mat'umek yuarutmek Judah-mi. Wangkuta nunarpagput asvaituq! Agayutem elliin murilkaa nunarpiim casgua!

²Ikireski nunarpiim iteryarai, ellualria-llu ukvemikun ciumurtellria atanruvik itertelluku.

³Elpet, ATANEQ, uitanqegcivkalaraten umyuamegteggun elpeni uitauralriit, cacetuqutekluten-llu.

⁴Cacetuqutekiciu ATANEQ akwarpak; elliin camun pivkarngaitaakut.

⁵Pivakenrircetai ucuryagtellriit; piunrirluki asvailnguut nunarpiit uitaviit, imevkarluki nunarpiim qacarnera urraurrluku.

⁶Maa-i-llu arrsaulriit nuuqitellriit-llu tamana piyuavikaat tutmaulluku-llu.

⁷ATANEQ, tumyaraat ellualriit manigtelaran; tumyaraat manigcetuq.

⁸Pisquten maligtarput; neryuniurutekluten-llu; elpet kiivet piyuumiutekamteggen.

⁹Unugmi ircaqumkun cakneq piyularamken. Cuqeskuvgu nuna yui-llu, elluaryaram caucia eliciiqaat.

¹⁰Assiitellriit takumcuk'ngerpeteng elicuitaat elluaryaraq. Ellualriit nuniitni assiilngurnek caliyulartut; taringesciiganaku-llu ucurnarqucin.

¹¹Inglukestevvet nalluat elpenun anucimirqecetaarumallerkarteng. ATANEQ, kiaresngiaceski nangteqevkarluki-llu; nangteqevkarki anucimirqecetaarutkun uptellerpegun. Nasvaggu qaillun pitalriamek kenkicin yugpenek.

¹²Canek nuuqitessngaitarpekut wangkuta, ATANEQ; unakellerput tamarmi elpenek kingunengqertuq.

¹³ATANEQ, Agayutemtaa, allanek atanirtuumalartukut, elpet tau͡gaam kiivet Ataneqamteggen.

¹⁴Maa-i tuqullruut unguvanqiggngaunateng; alangruit alairngaitut, elpet anucimirqecetaallruavteng piunrirrluki-llu. Kia umyuaqenrirai.

¹⁵ATANEQ, elpet atanruvigput yugyangevkaran, anglirivkarluku nunautii avataikun tamalkuita; mat'um-llu elpet ucurnariaten.

¹⁶Elpet yut'en anucimirqecetaallruaten, ATANEQ, nanikualuteng piicallruut elpenun.

¹⁷Elpet, ATANEQ, eriniavkaravkut, arnam teggiurcilriim neplilauciatun nangteqluni.

¹⁸Engellugtullruyaaqukut nangteqluta, tau͡gaam camek irnillrunritukut. Aviucillemten̄ek nunamten̄i neq'ak'ngaunata, camek-llu taquteksaunata.

¹⁹Ilaput ak'a tuqullret ataam unguvanqigciiqut! Temait ataam unguirciqut. Tamarmeng qavalriit qungumeggni tupagciqut aturciqut-llu nunaniryugluteng. Unuum yukutaan qevleqtaalriim segg'arcet'lauciatun nuna, tuaten-llu ATANREM unguirceciiqai ak'a tuqullret.

²⁰Enevcen̄un iterci, yumni, amik-llu palulluku. Iirumaqaqerci Agayutem eq'uqertii pellugnatkaanun.

²¹ATANEQ agiirtuq qilagmek uitallerminek anucimirqecetaaryarturluki nunam yui assiilnguit pitekluki. Aassaqluteng tuqucilallret nallunairumaciqut, nunam-llu iirumangairuciiqai tuqucimallret.