Read Yupik Isaiah 27 Bible Online

Isaiah 27 - Yupik bible

Isaiah 27

¹Ernermi taumi ATANREM pinilria tuqunarqelria nuussirpani aturluku anucimirqecetaarciqaa Leviathan-aaq, nemaalria, qipuurluni ciissirpak, tuqulluku tauna alingnarqelria:[11] imarpigmi uitalria.

²Ernermi taumi ATANREM waten qanrutkeciqaa nunanirqelria wine-arkanek naucetaarvini,

³“Murilkurala'rqa merqurluku pinriteksaunaku. Murilkela'arqa unugmi erenrani-llu kitumun assiirucesqumavkenaku.

⁴Wiinga qenrutenriraqa wine-arkanek naucetaarvik. Cukilananek naparrluyagarnek-llu pitangqerkan tamaantesqumanrilkemnek, ekuayaranka nangluki.

⁵Tau͡gaam yum'a inglukestain aulukuteka piyukatgu, camek pitkairuskilit tungemnun. Aa-ang, ilumun camek pitkairuskilit wangnun.”

⁶Ernerni tekitarkani Israel-aam yui, Jacob-aam kinguvri, acilqungciqut napatun, naugiciqut-llu naucetaanek. Nuna-llu patumaciquq atsanek naugillritnek.

⁷ATANREM Israel-aaq anucimirqecetaaqsaitaa pitaciluki inglukestai, yugnek-llu tuquiksaunateng ellaita tuquillracetun amllertalrianek.

⁸ATANREM anucimirqecetaallrui yun'i nuniitnek ayautelluki. Ayagcetellrui anuqekun naklegtailngurkun calaramek.

⁹Tau͡gaam Israel-aam assiilngui au͡gaumaciqut teggalquit agayutnguanun ekuaviit ciqumcimakata caunrirluki, tepkegcilrianek-llu aruviar ellivigtairuskan agayutnguam-llu Asherah-m ayuqai nangkata.

¹⁰Asvairqumalria nunarpak imumauq. Yuunani catailngurtun yuilqutun. Nerviksagulluku tau͡gaam kuluviit, mernuinercirvikluku-llu.

¹¹Napat avayait nalaluteng ayemqumaluteng, arnat-llu quyurtelarait muraknaluki. Tua-i-wa yuut camek taringenrilata, Agayutem piliaqestiita takumcukngaitai naklekngaunaki-llu.

¹²Ernermi tuani, Euphrates-aamek ayagluni Egypt-aam engeliinun, ATANREM avurciqai yun'i atauciugurluki, mukaarkanek carririaqata caranglluut avgumalauciicetun mukaarkanek.

¹³Erneq tauna tekiskan, cupu'uryaraq qalriaciquq qayagaurluki utertesqelluki Assyria-mek Egypt-aamek-llu tamalkuita Israel-aat teguarulriit tamaani. Taiciqut agayuluteng-llu ATANERMUN Jerusalem-aami, qigcignarqelriami ingrimi.[12]