Read Yupik Isaiah 28 Bible Online

Isaiah 28 - Yupik bible

Isaiah 28

¹Angayuqauvia Israel-aam aarnarqelriamek ciunerkangqertuq! Ucurnarqucia mitrialiuq nasqerrutetun naucetaanek pilimalriatun qamiqurritni taangaryulriit ciuliqagtain. Ucuryagtellriit qamiqurrit tepkegcaumayaaqut, tau͡gaam taklaut nallusngaluteng.

²ATANEQ pingqertuq pinirluni upingalriamek curugtekaatnek, tauna taiciquq kavcirluni ellarayagtun, ellarvagtun, ulerpagtun, patuciqluku-llu nuna.

³Ucuryagutiit tamakut taangaryulriit ciuliqagtet tutmaucimaciquq.

⁴Tamakut ucuryaggluteng ciuliqagcilriit ucuryagtellrat piunrirciquq atsatun allrakumi nauqerraalriatun yuum teguluku nerkiitun aruarauciatun.

⁵Tuani ernermi ATANEQ Artuqailnguq unegtaulrianun yum'inun ayuqeciquq ucurnarqelriatun nasqerrutetun naucetaanek pilimalriatun.

⁶Cuqcistet elluarrluki pivkarciqai, alingiulluki-llu murilkilriit nunarpiim amiigini anguyagnek curugarkanek.

⁷Prophet-arung'e'rmeng agayulirten͞gungermeng-llu taangiqem ugaani ayaluagut. Amllermek wine-amek mellruameng, taangamek-llu, unguciirulluteng paallagaut. Prophet-aat taangiqsiyaagameng taringesciiganaki Agayutem tangrruatgun nasvallri, agayulirtet-llu taangiqsiyaagameng caliarkateng ellmeggnun taicimalriit caliaqesciiganaki.

⁸Estuulut-llu aqumgauviit tamarmeng miryamek patumaluteng, pellernarqenrilngurmek pitairulluni.

⁹Qanemyuugautekaatnga-llu wiinga. Qanertut, “Kitumek elitnauriyukluni ingna angun umyuarteqa? Qanellra kia piyugtau? Mikelngurnun tau͡gaam aamanermek taqnerraralrianun assirtuq!

¹⁰Elitnaungnaqaakut igat atauciugurluki, igausngalriit maligtaquurluki.”

¹¹Niitarkaunrilkuvcia wiinga, Agayutem elitnaurceciiqaaci allanernun allamek qaneryaralegnun.

¹²Mernuircecugyaaqaaci qarulluci-llu tamarpeci, tau͡gaam niicuumiitarci.

¹³Tamana pitekluku ATANREM elitnauqataraaci igat atauciugurluki, igausngalriit maligtaquurluki. Elpeci-llu paallagyarpiaraciquci amllillerci tamalkuan. Kiliumaciquci, napciiquci, itercimaluci-llu.

¹⁴Ukuni ucuryaggluci atanirturten̄i Jerusalem-aami, niiciu ATANREM qanellra.

¹⁵Elpeci ucuryagtuci tuqu arenqiirtullgutkellruniluku picirkamek-llu taqutellruniluci tuqumalriit nuniit pitekluku. Nalirukenritarci pillugnarqelriamun tekiskan agturngailucirci, ukvekngavciki iqluurutnun piciunrilngurnun-llu camun pivkanritnayukluci.

¹⁶Wani-wa una ATANREM caprilnguum qanellra: “Elliiciqua Zion-aamun tusnganermek pektayiilngurmek asvailngurmek-llu. Tuavet cali elliiciqua atauciurnermek kangiritmek qainga waten igartarluni, ‘Ukveq pektayiilnguq nerinisngialliqsuituq’.

¹⁷Elluaruciq cuqyutkeciqaa engeliin tusnganrem, piciuyaraq-llu irircailkutekluku.” Kavcirluni ellarayiim carrirciqai iqluurutet cacetuqutekelci, ulerpiim-llu navgurciqai talisvici.

¹⁸Tuqu pillgutekluku akqut'liallerci piunriumaciquq, umyuallguciutellerci-llu tuqumalriit nuniitnun arulaircimaluni. Pillugnarqellriim tekiareskaci cirliqciquci.

¹⁹Tuciiquq elpecen̄un pinqigtaarluni unuaquaqan. Aturarkaugarci-llu erenrani unugmi-llu. Tamarmi-llu nutaraq qaneryaraq Agayutmek taiciiquq alingmek.

²⁰Elpet-llu ayuqeciquten yugtun qaneryarami, qavangnaqellriatun inglerni nanitessiyaalriani ceturrviinateng, uligluni iqkitsiyaalriamek imgutesciiganani.

²¹ATANEQ callugciquq pillrucirmitun Ingrimi Perazim-aami, Gibeon-aam-llu kuignayuani, piarkaullni pikuniu—callra alangaanarqelriatun ping'e'rmi. Elliin caliani qaqiciiqaa, caliani nallunarqelria.

²²Temciksaqunaku aarcirtuun qanrutkelqa elpenun! Tuaten pikuvet, qimallerkan cakviurnarqenruciquq. Niitellruamku ATANREM Artuqailnguum picirkangutii piunrirrnaluku nuna tamalkuan.

²³Niicugniu murilkelluku qanelqa elpenun.

²⁴Nauceciiyurtet arulaiyuunateng itumqurayuitait nauceciiviteng upluku nauceciillerkameggnun.

²⁵Nuna upcimariaqamiu, naucetaarkat ellilarait dill-at cumin-aat-llu. Nauceciilartut mukaarkanek menglaitnun-llu naucirivimeng cali allanek nauceciiluteng.

²⁶Caliarkateng nallunritait, Agayutem elitnaullruateng.

²⁷Uqamailngurmek kaugtuucirluni kaugtuayuitai dill-at iiqupait cumin-aat-llu iiqupait au͡g'araqamiki; tau͡gaam uqiggelngurmek pitacqellriamek kaugtuucirluni pilartuq.

²⁸Assiirucuitai mukaarkat ak'anun caranglluirumaluki, nallunritaa-llu qaillun carrillerkaat horse-aamek qimugcirluni akagenqellriamun qaingirtelluki, mukaarkat qagerqevkenaki.

²⁹Man'a cali ATANERMEK Artuqailngurmek kingunengqertuq. Ayuqucirtuutii assiqapigcami, piluaqerrlainalartuq.