Read Yupik Isaiah 3 Bible Online

Isaiah 3 - Yupik bible

Isaiah 3

¹Watua ATANREM, Artuqailnguum ATANREM, uayaaqatarak Jerusalem-aankuk Judah-llu tamalkuitnek tamarmeng yuut aturturatukaitnek. Neqkairucetqatarai merkairutelluki-llu

²alinguraranrilnguut yui, anguyagtait-llu, cuqcistait, prophet-aarit, ciunerkarcutulit, yuut-llu piuranrit,

³anguyagten̄i yugni-llu ciuliqagtait, quyilrianek calialget, tamalkuita-llu angalkiluteng cat piarkat aulukestait.

⁴ATANREM yuut ataniumavkarciqai taqmiginganrilngurnun tan'gaurlurnun.

⁵Tamarmeng ilateng nangciqait. Ayagyuat qigcikngaitait ciulirneteng, yuk'egtaunrilnguut-llu takaqngaunaki ellmeggni quyinrulriit.

⁶Pillerkaq tekiciquq tungayakellriit cucuklillerkaat ilameggnek, qanrulluku-llu, “Elpet aturamek at'arkangqerravet, ciuliqagteksugamteggen mat'um picurlagnarqellriim nalliini.”

⁷Tau͡gaam tauna kiuciquq, “Wiinga pinricia! Ikayurciigatamci. Neqkautaitua aturarkaunii-llu. Ciuliqagten͞gurcaqunacia!”

⁸Aa-ang, Jerusalem-aam ciunerkaa nau͡gguirviinani assiitellriaruuq! Judah-llu navguumaciqluni! Tamaitgun qanllermegteggun ayuqucimegteggun-llu ingluksagucamegteggu ATANEQ; aassaqutekevkenaku caunrilkillerteng Agayutmek.

⁹Allakaukiyullrat ellaitnun tuc'ecimaciquq. Assiilngilartut tangvagtelluteng Sodom-aam yuin pillracetun. Nakleng taukut! Assiitellria ellmeggnun tut'arkaurcecamegteggu.

¹⁰Ellualriit camek umyuarniurutkaiciiqut, caliluteng unakelteng elluitekciqait.

¹¹Tau͡gaam assiitellriit yuut ciunerkangqertut aarnarqellriamek; ellaita allanun pilallrit ellaitnun pimaarkaurtut.

¹²Yuunka, nangtestengqertut mikelngurnek, arnanek-llu ataniurterluteng. Elpeci wiinga yumni, ciuliqagtevci ciulikagcecurlagaaci, uunguciirulluku ciunerkaci.

¹³ATANEQ upingariuq ingluliurutnaluni; upingariuq cuqnaluki yun'i.

¹⁴ATANREM qanercetaaqatarai yum'i ciulirnerit ciuliqagtait-llu. Wani-wa una picetaarutii: “Elpeci tegliulartuci naucetaarvignek, eneci-llu imartuluteng tegulallerpecen̄ek arrsaulrianek.

¹⁵Nangciyunarqenrituci yumnek teguqainitekluki-llu arrsaulriit. Wiinga Caprilngurmi Artuqailngurmi ATANEQ qanertua.”

¹⁶ATANEQ qanertuq, “Tangerciki qutegngataciat arnat Jerusalem-aami! Piyualartut ciupalliluteng. Eklinarcarluteng. Amllicuayaarturalartut, tallirait-llu cingillritni qasiartaaraqluteng.

¹⁷Tau͡gaam wiinga anucimirqecetaarciqanka; qamiqurrit meqciiqanka patkallngevkarluki.”

¹⁸Erneq agiirtuq ATANREM uayarciqai arnat Jerusalem-aami qut'gutaitnek; tangnircautet atulallrit cingillemeggni, qamiqumeggni, uyaqumeggni,

¹⁹tayarnemeggni-llu. Au͡g'arciqai kegginaita capkutait

²⁰nacait-llu; iinrukluki atutukait tallimeggni qukameggni-llu;

²¹kulutet atulallrit yuarameggni qengameggni-llu;

²²tamalkuita aturaqegtaarait, ulikussuit, akiviit-llu;

²³mamkilnguaraat aturait, pelatuugit capkutat-llu atulaqait qamiqumeggni.

²⁴Tepkegcautet tepaitnek pivkenateng arulriim tepiinek tepengqerciqut; naqugutnek assilrianek aturpek'nateng, atularciqut keggagcetellrianek ilavkugnek; tangnirqelrianek nuyangqerpek'nateng, patkallengqerciqut; aturaqegcivkenateng aturciqut allgumalrianek; kenegnallrat mumigciiquq kiaresngiatmek.

²⁵Angutet nunarpagni, pininkacagaungermeng, anguyagmi tuqucimaciqut.

²⁶Nunarpiim iteryarai angniiciiqut aluviliurluteng-llu, nunarpak-llu ayuqeciquq arnatun cailkami aqumgalriatun, matarmi.