Read Yupik Isaiah 30 Bible Online

Isaiah 30 - Yupik bible

Isaiah 30

¹ATANEQ qanellruuq, “Judah-m atanirturtai aarnarqelriamek ciunerkangqertut inglulicameng wangnun. Maligtaquamegteki picirkiurat wiinga picirkiuraqenrilkenka, ateteng-llu igaulluki pisqutka narurrluku, assiilngurmek quyurciluteng.

²Ayagluteng-llu Egypt-aamun ikayungcarluteng apqaarpek'nii. Egypt-aamun cayailkuciisqut, cacetuqutekluku-llu Egypt-aam atanra.

³Tau͡gaam angayuqam ikayurciigaciiqai, Egypt-aam-llu cayailkuciumangraateng piunrirciqut.

⁴Quurituasteteng-llu ak'a tekitellrungrata Egypt-aami nunarpagnun Zoan-aamun Hanes-aamun-llu,

⁵Judah-m yui qessanayugciqut ciin cacetuquciucirmeggnek taumek nalirugnarqelriamek angayuqauvigmek, ikayurciigalateng nuuqellrata nalliini.”

⁶Una Agayutem qanelqaa ungungssiaraat qalarutekluki ungalalirnermi kinertellriami nunami: “Quurituastet ayagaut aarnarqelriakun: nunakun, yugtutulit uitaviatgun, tuqunarqelrialegnek ciissirpalegkun, tengtulinek-llu cali ciissirpagluni. Ucilirait ciulvateng qulugnelget-llu akitulrianek cikiutekameggnek atanruvigmun ikayurtekaqenrilkemeggnun.

⁷Catngunrituq Egypt-aam ikayuutii. Taumek Egypt-aaq tuqluuciraqa, ‘Ciissirpak Alingnailnguq.’”

⁸Agayutem qanrutaanga kalikarmun igautesqelluku qaillun yuut ayuquciat, nallunailkutausqelluku taqsuunaku assiiluciatnun.

⁹Arulaiyuunateng inglulilaraat Agayun, kesianek iqluquurluteng, kesianek-llu niicugniyuumiinaki ATANREM ayuqucirtuutai.

¹⁰Prophet-aat nepaunaki uitasqelarait. Qanerluteng, “Qalarutenrilkut canek piciulrianek. Qalaruskut tau͡gaam wangkuta niicukemten̄ek. Umyuamten̄i assiryukekemteggun yuuvkarluta.

¹¹Avilluten tumkamten̄ek tumkarput capkucirpek'naku. Niicuumiitukut tanqilriamek Agayutiitnek Israel-aat.”

¹²Waten tau͡gaam tanqilria Israel-aat Agayutiit qanertuq: “Nallunguaraci una qanruyuteka cacetuqucirluci-llu nangciyaramek iqlutuuyaramek-llu.

¹³Pinarqelriaruuci. Ayuquci qertulriatun qacarnertun quliumalriatun pikaken ayagluni kanavet; alqunaq imciquci.

¹⁴Ciqumcimaciquci qikutun egatetun, navguumassiyaagami iliit navenret atuusciiganani kangiplugnek kumalrianek tegussuutekluku wall'u mermek qaluuriteksunaunani mervigmek.”

¹⁵Caprilnguq ATANEQ, Tanqilriarat Israel-aat, qanertuq yugnun, “Uterrluci nepaunaci cacetuqutekicia wiinga. Nutaan piningqerrniartuci asvaunaci-llu.” Tau͡gaam elpeci tuaten piyuumiituci.

¹⁶Tau͡gaam picirkiurtuci qimagnaluki inglukesteci horse-aatgun cukalriatgun. Piciulriamek-llu piuci— tua-i qimagnarqeciqngavci! Umyuartequci horse-aaci cukanayukluki, tau͡gaam maligtesceci elpecen̄i cukanruciqut!

¹⁷Ilaci tiissitsaat (1,000) qimagciqut ataucimek inglukestevcen̄ek anguyagtem̄ek tangerquni, talliman-llu anguyagtet tamarpeci qimagceciiqaiceci. Kingunerci-llu anguyagtem̄ek pitangqerrngaituq pelagvigmek tau͡gaam napalriamek qertulriim kangrani.

¹⁸Tau͡gaam cali nakleksuumaaci ATANREM. Takumcuksuumarrlainaamici tua-i-wa piciulriamek tau͡gaam ellii taqutelaami. Atawaqertut cacetuqutekestai ATANREM.

¹⁹Elpeci yugni Jerusalem-aami uitalriani, aluviliurngairutuci. ATANEQ naklegtartuq qayagauquvcen̄i ikayuusqelluci; niiciiqaaci.

²⁰ATANREM cakviurnarqelriit tuc'et'larciqai elpecen̄un, tau͡gaam ellii-llu tuanciiquq elicungcarnaluci, elpeci-llu yuanqiggngaunaku uum kinguani.

²¹Uniskuvciu tumyaraq tallirpilirnermun wall'u iqsulirnermun, erinii niiciiqaci kingunerpecen̄ek qanerluni, “Maa-i man'a tumyaraq. Maliggluku ayagci.”

²²Elpeci teguciqaci agayutnguaci qerrirlimek suulutaamek-llu qalliliumalriit, eggluki-llu pellernarqelriatun, qayagpagluci, “Ciuqamnek ayagci!”

²³Nauceciigaqavci ATANREM ellallircet'larciqaa naugivkarluki amllernek quyurcisqelluci, ungungssiuceci-llu neqkaliisqelluki.

²⁴Kuluviit ciulviit-llu atulalci nunamek itumciaqavci nerlarciqut assinkacagarnek canegnek.

²⁵Ernermi taumi inglukestevci asvairqumalriit uitaviit tegumakata yuit-llu tuqucimaluteng, qurrlurciquq meq tamaitnek ingrinek qertulrianek-llu.

²⁶Iraluq tanqigtaciquq akercetun, akerta-llu tanqigciquq tanqigkanratnek malrunlegen erenret. Makut tamarmeng tuaten piciqut ATANREM nemqaki mamevkarluki-llu yum'i kilinrit elliin kilirtullni.

²⁷ATANREM pinia ucurnarqucia-llu tangerrnarqeciquq yaaqvanek. Kenrem aruviim-llu nasvagciqaak eq'uqertellra. Qanraqan qanellri ekualartut kenertun.

²⁸Ayagcet'laraa anuqa ciunermikun ulerpagtun atercecilriatun canek tamalkuitnek. Sagutelarai atanruviit piunrillerkaatnun assiitellriit-llu picirkiurait piciurcetevkenaki.

²⁹Tau͡gaam elpeci, Agayutem yuini, angnirciquci atualuci-llu qigcignarqelriani nerevkariyararpecen̄i pilaucirpecetun. Elpeci-llu angnirtaciquci piyualriatun ullagluku ATANREM yurnakestiita Israel-aat Agayuvia, niiskengaqluki aturcetaat cupu'uryarat-llu.

³⁰ATANREM niiceciiqaa tamalkuitnun ucurnarqelria erinani elpekevkarluku-llu tuknitacia eq'uqertellermi. Ekurpalriartangqerciquq, ellarvagciquq, kavcirluni-llu.

³¹Assyrian-aat alingeciqut cakneq niiskunegteggu ATANREM erinii elpekluku-llu pinirtacia anucimirqecetaarutiin.

³²Kaugtuutaa ATANREM anucimirqecetaarutiin tuciiquq maliggluku aturcetaat nepiit. Agayutem elliin callugciqngamiki Assyrian-aat.

³³Ak'a tamaani ciunguluku uptellrulliniat nani Assyrian-aat angayuqrata temiin ekuamallerkaa. Ilutuluni iqtuluni-llu, muriit-llu qerturiluteng ak'a ellimaluteng. ATANREM-llu aneryaarvikluku ekualriamek tauna kumarciiqaa.