Read Yupik Isaiah 31 Bible Online

Isaiah 31 - Yupik bible

Isaiah 31

¹Ullautellriit Egypt-aamun ikayungcarluteng aarnarqelriamek ciunerkangqertut! Cacetuqutekiut Egypt-aam pinilrianek amllellrianek-llu anguyagcuutainek horse-aanek, akalrialegnek ayagassuutnek, anguyagten̄ek-llu. Tau͡gken cacetuqutekenritaat ATANEQ, tanqilria Israel-aat Agayutiit, wall'u kaigavikevkenaku ikayuusqelluteng.

²Elliin caliani nallunritaa! Picurlagnarqelria tuc'et'laraa. Akeqnerrlugutni-llu piciurcet'larai anucimirqecetaarnaluki assiitellriit yuut ilikestait-llu.

³Egypt-aarmiut agayutngunritut yuunginaugut. Horse-aarit-llu kemelguluteng, anerneruvkenateng. ATANREM piarkani pikaku, pinilria angayuqauvik ciameciquq, pinialnguq-llu atanruvik ikayullra igciiquq. Tamarmek piunriumaciquk.

⁴ATANEQ qanertuq wangnun, “Qusngiliurtet aarang'e'rmeng qayagpagange'rmeng-llu, alingevkarngaitaat ayagtelluku yugtutuli ungungssiarmek tuqutellranek; tuacetun, cam nuqcesciigataanga wiinga, ATANEQ Artuqailnguq, cayailkucillerkaanek Ingrim Zion-aam.

⁵Yaqulegtun agyaulriatun unglumi quliitni piyagani camun pinayukluki, tuaten-llu wiinga, ATANEQ Artuqailnguq, Jerusalem-aaq camun pivkarngaitaqa ingluliurulluku-llu.”

⁶Agayun qanertuq, “Israel-aam yuini, assiilngillruuci wangnun inglulirlua-llu. Tau͡gaam watua, uterci wangnun!

⁷Pillerkaq tekiciiquq egqaqillerkarci assiilngirnarqelrianek agayutnguanek piliaqellerpecen̄ek qerrirlimek suulutaamek-llu.

⁸Assyria anguyagkun piunriumaciquq, tau͡gaam yugteggun pivkenani. Assyria-rmiut qimagciqut anguyagmek, ayagyuarit-llu teguarurrluteng.

⁹Angayuqrat qimagciquq alingluni, atanerruarit-llu anguyagtain alingem ugaani cakaarciqait pelateng anguyagcuutet.” ATANEQ qanertuq—ATANEQ Jerusalem-aami agayuviketukiit kenra-llu tuani kumaluni ekuagissuutekaat.