Read Yupik Isaiah 32 Bible Online

Isaiah 32 - Yupik bible

Isaiah 32

¹Erenret iliitni angayuqertangciquq atanirturiarkamek ellualriakun, cali-llu nunam ciuliqagtainek pitangqerciquq atanirturilrianek elluarrluteng.

²Tamarmeng ayuqeciqut anuqmek talisvigtun uqisviulriatun-llu ellarayagmek. Kuiggaartun-llu ayuqeciqut qurrlulriatun kinertellriami nunami, teggalqurpiim-llu talinratun manigcetellriami cat nauviksuilkiitni nunami.

³Iingit ciutait-llu ikingqaciqut yuut kepqutaitnun.

⁴Nerinisngialliqenrirciqut, cat taringumaluki piurararkauluki, qanraqameng-llu tuaten piarkauniluteng tuaten piaqluteng.

⁵Yuk atauciunge'rmi umyuarteqngaituq usviilnguq canganarqutaicukluku wall'u inerciigalnguq iqluyuicukluku.

⁶Usviilnguq qalartelartuq picimitun umyuangcaraqluni assiitellrianek piarkaminek. Caliara qanellra-llu caunrilkitnguluni ATANERMEK, nerevkayuunaki kailriit wall'u meqsulriit mercecuunaki.

⁷Usviilnguq yuk assiitellriaruuq, caliarluni assiitellrianek; picirkiulartuq picurlagcetaarnaluki arrsaulriit iqluurutekluki elluarrluteng uitatkait pisciigatevkarluki.

⁸Tau͡gaam nangrunailnguq yuk ayuqucimikun piciuluni yuulartuq, piciulria-llu pitekluku pektayiinani.

⁹Elpeci arnani elluiluci yuulriani, umyuarniurutaunaci, niicugniciki qanellrenka.

¹⁰Watua cayuuminricaaqsartuci, tau͡gaam waten pitarikan allamiku nanikuaciquci iqvarkaiciiqngavci wine-arkanek atsanek.

¹¹Elluiluci yuullruuci, umyuarniuqsaunaci; tau͡gaam watua, alingluci uulegci! Matarrluci 'lumarrallernek naqugci qukarpeciuggun.

¹²Qat'gaci patguurciki angniinaci tua-i-wa naungignarqelriit naucetaarviit, wine-arkanek-llu cali naucetaarviit piunriumiita,

¹³cukilanat-llu nauluki yum'a nunautait. Qiatekiciki tamalkuita enet yuut angnirvik'lallrit nunarpak-llu yugyalleq.

¹⁴Angayuqam-llu enerpakengraani cakaarumaciquq nunarpak-llu angayuqam uitavia atauciungraan yugtangqerrngaituq. Enet anguyagtet-llu uitavikellrit imumaciqut akwarpak. Yuilqurmiutaat ciulviit tarraciiqut tuani, qusnginun-llu nerviurrluni.

¹⁵Tau͡gaam ataucirqumek cali Agayutem taivkarciqaa anerneni wangkutnun. Nuna cakarniitelleq naungignariciquq, naucetaarviit-llu naugilarciqut amllernek.

¹⁶Tamiini nunami elluaq pitalqeggsaraq-llu piyugarkauguk.

¹⁷Tamarmeng yuut piciulria aturarkaungamegteggu, uitanqegciciqut nanikualarngaunateng-llu akwarpak.

¹⁸Agayutem yui umyuarniurutaiciiqut, enet-llu uitanqegcinaqluteng alingnarqelriamek pitaunateng.

¹⁹(Tau͡gaam kavcirciquq napanun, nunarpak-llu piunriumaluni.)

²⁰Angnirciqut yuut tamarmeng, mermek nuryugcivkenateng naucetaarviit, nerlararkauluteng-llu ciulviit kuluviit-llu alingevkenateng.