Read Yupik Isaiah 33 Bible Online

Isaiah 33 - Yupik bible

Isaiah 33

¹Wangkuta inglukesteput ciunerkangqertut aarnarqelriamek! Tegliullruut inglukesteteng-llu ikayurluki, ellait tuaten pimaksaileng'e'rmeng. Tau͡gaam tegliulallrat inglumeggnek-llu ikayuq'ngelallrat iqukliciiquq, ellait tau͡gaam tuaten tegliurvik'larciqait umyuarrliqucimaluteng-llu.

²ATANEQ, takumcukikut wangkuta. Neryuniuruteksagutamteggen. Qaunqikut unuaquaqan anirturluta picurlagnarqellrianek.

³Calluucitaqavkut, atanruviit yuit qimalartut anguyiim nepiinek.

⁴Akluit qeckarvikluki avularait.

⁵Angtataituq ATANEQ! Ca tamalkuan atanirturaa. Jerusalem-aaq-llu muirciqaa elluarucimek elluaryaramek-llu

⁶pektayiirluku-llu atanruvik. Kesianek qaunqeciqai yun'i umyuarturivkarluki elisngarivkarluki-llu. Qigcigyullrat-llu ATANERMEK angenruluni piksunarqenruuq ellaitni.

⁷Alingilnguut yuut qayagaurtut ikayungcarluteng. Quurituastet-llu uitanqegcivkaringnaqellriit qiaqapiggluteng.

⁸Tumyaratgun-llu ayagallerkaq alingnarian yuut aturnanrirluki. Atanruviit picirkiurateng atunritait, umyuallgutekluteng-llu picirkangutelteng atuqsaunaki. Takaqumalriamek ilairulluteng.

⁹Nuna ellmikun uitauq yuirulluni. Lebanon-aam-llu napai nalaluteng, naungignarqelleq-llu kuignayuk Sharon-aaq kinernerurrluni, Bashan-aami Ingrimi-llu Carmel-aami napat cuyait igqaqluteng.

¹⁰ATANEQ qanertuq atanruvignun, “Uitaurngairutua. Nasvagarkaurtaqa pinirtaciqa.

¹¹Elpeci picirkiulartuci ikayuutnguarkaunrilngurnek callerci-llu tamarmi ikayuutnguvkenani. Wiinga anerneqa kenertun ayuquq piunriryukaarluci.

¹²Ciqumeciquci teggalqutun ekuamalriatun lime-arkiurluki, cukilanatun-llu ekuamalriatun araurrluki.

¹³Canimelngermeng yaaqsing'e'rmeng-llu niillitki calianka nallunrirluku-llu artuqailuciqa.”

¹⁴Zion-aarmiut assiilngiumalriit uulegtut alingluteng. Ellait qanertut, “Agayun cuqcilria kenertun ayuquq ekualriatun akwarpak. Ilavut-qaa anagyugngauq kenermek tuaten ayuqellriamek?”

¹⁵Anagyugngaciquten qanlaquvet aturluten-llu piciulriamek. Piyugngang'e'rpet teglegiksaunaki arrsaulriit, akilirluten-llu assiilngurmek pisqengraatgen akurtuqsaunaki. Ilaliuteksaunak-llu picirkiulrianun yugmek tuqucinaluteng wall'u allanek assiitellrianek calinaluteng.

¹⁶Nutaan elpet cam pingaitaaten; alingengaituten uitalriatun asvairqumalriim iluani. Neqkangqerciquten merkarluten-llu.

¹⁷Tangerciquci angayuqamek atanirturilriamek nunami sagtellriami avatmun tamiinun tamalkuan.

¹⁸Uluryak'lalci nunanek allanek akiliqurautnek quyurcistet, nunam-llu yuvrirtai umyuaqellerpecen̄i tau͡gaam pellullermi uitaciqut.

¹⁹Tangerrngairuciiquci pivakellrianek yugnek qalartetulinek allakatun taringesciigalkevciuggun.

²⁰Tangerciu Zion-aaq, nunarpak quyurrluta nerevkarivigput. Tangerciu Jerusalem-aaq! Uitaviksunarqeciquq alingniurnaunani! Pelatekatun ayuqeciquq calligcimangailngurtun, kuuliari nucuumangaunateng ilavkui-llu kevkarrngaunateng.

²¹ATANREM ucurnarqucini nasvagciqaa wangkutnun. Uitaciqukut kuiget iqtulriit caniatni kuiggaat-llu, tau͡gaam inglukestemta sunait tamaaggun kuigkun pektaalarngaitut.

²²Napartait enengutait-llu catngungaitut; tengalrait qerrurciiganateng! Teguciqaput tamalkuita inglumta anguyagtaita tukuutait, amllessiyaagarkaungata tussitellriarung'e'rmeng avgucimaciqut. Ellii ATANEQ ataneqciqerput; Atanirturciqaakut qaunqelluta-llu.

²⁴Atauciunge'rmi yuk uitalria nunamten̄i naulluuniluni qanenqiggngaituq, yuut assiilnguit tamarmeng au͡gaumaciqngameng.