Read Yupik Isaiah 34 Bible Online

Isaiah 34 - Yupik bible

Isaiah 34

¹Taici, tamarpeci atanruviit yuitni! Quyurrluci niicugnici. Ellarpak yui-llu tamarmeng tailuteng niicugnilit.

²ATANREM qenrutai tamalkuita atanruviit anguyagtait-llu. Aarnarqellriamek ciunerkangevkarai tuqucimaarkaurtelluki.

³Tuqumalriit temait elausngangaitut, tau͡gaam tuani uitaciqut aruluteng tepsaqluteng-llu; ingrit-llu augem kaviriciqai.

⁴Akerta, iraluq agyat-llu itumeciqut urraurrluteng. Qilak-llu catairuciiquq imegyaratun kalikartun imgumalriatun, agyat-llu igqaqciqut napam cuyaitun igqaqelriatun.

⁵ATANREM nuussirpani uptellrua qilagmi, watua-llu Edom-aaq kaugturciqaa, yui akeqnerrlugtellruamiki piunrirciqniluki.

⁶ATANREM nuussirpii augglirciquq augatnek uqurrlirluni-llu uquatnek, augicetun uquicetun-llu qusngiyagaat qusngirngalnguut-llu ekuamaaqameng. ATANREM elliitekciqaa una ekuagarkaq nunarpagmi Bozra-mi; elliin tuqucirpalqeciqaa Edom-aam nunii.

⁷Yuut iquaciqut yuilqurmiutartun kuluvagtun, nuna-llu kaviriluni augmek uqulingluni-llu.

⁸Taum nalliini ATANREM anauciiqaa Zion-aaq akinaurulluku-llu inglukestainun.

⁹Kuigi Edom-aam taarurciiqut, nuna-llu sulfur-aarurrluni. Nuna-llu tamarmi ekuaciquq taartun.

¹⁰Ekuagarkauluni-llu ernerpak unugtuumaan, aruvak-llu tuaken nauluni iquilngurmek. Nuna-llu cakarniinani uitaciquq kinguveqellriit tegularluki, yuut-llu tamaaggun peknanrirarkauluteng.

¹¹Qakurtaat issaluut-llu nunaksaguciiqaat, kenriiret tulukaruut-llu uitaviksagulluku. ATANREM-llu camek naugisciigalivkarciqaa, ella piliaqumavailgan ayuqucillratun ayuqlirivkarluku.

¹²Angayuqertangqerrngaituq nunam atanirturtekaanek ciuliqagten͞gullret-llu tamarmeng cataunateng.

¹³Cukilanat nauciqut angayuqat enaitni casguliumalriani-llu nunani, kaviarngalnguut anipat-llu tau͡gaam nunakarkauluku.

¹⁴Yuilqum ungungssii tarratelarciqut tuani, tuunraam-llu yui qayagauruciiqut. Unuum-llu carayii[13] tuavet taiciquq mernuinercirvigkaminek yuarluni.

¹⁵Anipat ungluliluteng, kayangiciqut tukertelluki-llu. Yaqulget-llu tuqumalriarrlainarnek nertulit vulture-aat quyurciiqut tuavet kinguqliqu'urluteng.

¹⁶Yuarci ATANREM kalikaini imalegni unguvalrianek piliaqumalrianek naaqluku-llu camek qanrucia. Atauciunge'rmi makut piliaqumalriit iliit catailngaituq, aipailngaunani-llu. ATANEQ alerqurillruuq tuaten ayuqerkauvkarluku; taumek elliin quyurciiqekai.

¹⁷Elliin ATANREM nuna avegciqaa ellaitnun tamalkuita pikangqertelluki. Nunami uitaciqut kinguveqellriit tegularluki, ellaita pikarkauluku iquilngurmek.