Read Yupik Isaiah 36 Bible Online

Isaiah 36 - Yupik bible

Isaiah 36

¹Allrakut akimiarunritaraurtellratni Hezekiah-m atanrullran Judah-mi, Sennacherib-aam angayuqran Assyria-m, curugai cayailkutalget nunarpiit Judah-mi teguluki-llu.

²Assyria-m angayuqran ayagcetaa Rabshakeh Lachish-aamek Angayuqamun Hezekiah-mun Jerusalem-aami anguyagterugarnek malilirluku. Arulairluni-llu mer'em anellranun qullirmek nanvarra'armek tumyarami ayalriamun 'lumarrilriit caliviatnun.

³Pingayun Judea-rmiut pairrsaagaat; atanerruam qaunqestii atanrem eniin, Eliakim-aaq Hilkiah-m qetunraa; igartii qanercetaarviim Shebnah; kalikat-llu qaunqestiit Joah Asaph-aam qetunraa.

⁴Assyria-rmiut atanerruarata qanrutai angayuqamun nallunricugniluku camun Hezekiah cacetuvkarpakaucianek.

⁵Ellii qanertuq, “Umyuartequci-qaa yuum qanellra piunruyukluku anguyagni elitnaurumalriani anguyagterugarni-llu? Kitumun ikayurnayukluci piceci inglulillerpecen̄i Assyria?

⁶Neryuniurutkarci Egypt-aamun ikayurnayukluci, tau͡gaam tauna ayuqeciquq piyualriatun canegmek ayarurluni asemciiquq kapluten-llu unatevkun. Tuaten ayuquq Egypt-aam angayuqra cacetuqutekestem̄inun.”

⁷Assyria-rmiu atanerruaq cali qanertuq, “Wall'u-qaa qanruciiqelliarpecia cacetuqutekniluku ATANEQ Agayutsi? ATANREM ekuavikai Hezekiah-m piunrillri qanrutlermini Judah-m yui Jerusalem-aam-llu agayulaasqelluki ataucimi tau͡gaam ekuavigmi.

⁸Ayaricetaarnaamci atrakun angayuqam. Cikirciqamci tiissitsaagnek malrugnek (2,000) horse-aanek paivciyugngakuvci tamalkuita ekumastekaitnek.

⁹Elpeci-wa pitassiarucunailnguci pikegtaunrilkacagiitnun Assyria-rmiut atanerruarita, tau͡gken elpeci neryuniurtuci Egypt-aarmiunun tuyurnayukluci akalrialegnek ayagassuutnek horse-aatgun-llu ayagatulinek.

¹⁰Umyuartequci-qaa curugyukluku nunasi piunrirluku-llu ikayurtaunii ATANERMEK? ATANREM elliin qanrutellruanga curuusqelluku piunrirluku-llu.”

¹¹Tua-llu Eliakim-aam, Shebna-m, Joah-m-llu atanerruaq qanrutaat, “Qalaruskut Aramaic-aatun, taringetuarput. Hebrew-tun qalartenrilu; yuut tamarmeng qacarnerni uitalriit niicugniut.”

¹²Ellii kiuguq, “Umyuartequci-qaa angayuqamun ayagcecuklua elpecen̄un angayuqerpecen̄un-llu kiivci qanrucartuusqelluci makunek? Qang'a, yugnun-llu qalartua qacarnermi aqumgalrianun, taukunun ner'arkaulrianun anameggnek merluki-llu teq'uteng, elpeci piarkaucirpecetun.”

¹³Atanerruaq-llu nangerrluni qayagpagtuq Hebrew-tun, “Niicugniciu Assyria-m angayuqran qanellra elpecen̄un.

¹⁴Aarcirturaaci, Hezekiah-mun iqluuresqevkenaci. Hezekiah-m anirturciigataaci.

¹⁵Unakevkaryaqunaci-llu cacetuqutekesqelluku ATANEQ. Umyuarteqsaqunaci ATANERMUN anirturnayukluci arulaircetnayukluku-llu Assyria-rmiut anguyagtaitnun cirlaklerkaa nunarpagpeci.

¹⁶Niicugninriciu Hezekiah! Assyria-m angayuqran alerquraaci nunarpagpecen̄ek anluci elpecen̄ek tunesqelluci. Nerevkalarciqaiceci wine-arkat atsaitnek nakmiin naucetaarvigpecen̄ek napautevcii-llu atsaitnek, mer'aqluci-llu nakmiin elakarpecen̄ek—

¹⁷Atanerruam elpeci nugtarnatkaanun allamun nunamun nunautevcetun ayuqellriamun, wine-arkanek naucetaarvilegmun wine-autengqerresqelluci, mukaarkartarluni-llu kelipiarkarpecen̄ek.

¹⁸Hezekiah-mun iqluurcecaqunaci umyuarteqevkarluci ATANERMUN anirturnayukluci. Allat-qaa atanruviit agayutaita nunaseng anirtullruat Assyria-m angayuqranek?

¹⁹Watua nantat agayutait Hamath-aam Arpad-aam-llu? Nauwa agayutai Sepharvaim-aam? Kia-qaa anirtullrua Samaria?

²⁰Qangvaq ukut nunarugaat agayutaita iliita anirtullruitgu nunaseng angayuqamten̄ek? Tua-llu ca pitekluku umyuarteqseci ATANERMUN anirturnayukluku Jerusalem-aaq?”

²¹Yuut nepaitut, Angayuqam Hezekiah-m qanrutellruciatun; aperyararraungraan qanqanritut.

²²Tua-llu Eliakim-aam, Shebna-m, Joah-m-llu allgurait aturateng angniinateng ayagluteng-llu qanrutkait angayuqamun Assyria-rmiut atanerruarata qanellri.