Read Yupik Isaiah 37 Bible Online

Isaiah 37 - Yupik bible

Isaiah 37

¹Angayuqam Hezekiah-m niiyucimitun qanellrat, allgurai aturani iluteqluni, missuullernek-llu all'uni, ayagtuq-llu Agayuvianun ATANREM.

²Ayagcetai-llu Eliakim-aaq, atanerruaq qaunqestii angayuqam eniin, Shebna-llu igarta, piuranrit-llu agayulirtet prophet-aamun Isaiah-mun Amoz-aam qetunraanun. Ellait-llu cali missuullernek aturluteng.

³Waten Isaiah qanrutaat, “Hezekiah-m waten qanrutesqaaten, ‘Erneq qakemna nangteqnarqelriaruuq wangkutnun, anucimirqecetaarumaukut caunrilkumaluta tuaten. Arnatun irniqatarluni teggiurcilriatun ayuqliriukut, tau͡gaam piniatem ugaani irnisciiganata.

⁴Assyria-rmiut angayuqrata taivkallrua atanerruami ciuqliat caunrilkesqelluku unguvalria Agayun. ATANREM Agayutvet niilliki makut caunrilkuurutet anucimirqecetaarluki-llu tuaten qanellret. Taumek piicauskiki ilaput un'gartellret.’”

⁵Isaiah-m akurtuamiu angayuqam Hezekiah-m qanellra,

⁶taukut qanrutai, “Waten qanrucarturciu angayuqerci, ‘Waten qanertuq ATANEQ: Alingyaqunak niiteng'e'rpet caunrilkiluni wangnek qalartellrinek Assyria-rmiut angayuqrata pistiin.

⁷Wiinga anernermek imirciqaqa, niitelluku qanengssaguamek uterciiquq-llu kingunerminun, tuqutauvkarciqaqa tamaani nakmiin nuniini.’”

⁸Tauna Assyria-rmiu atanerruaq utercami nallunrirtuq angayuqam ayallranek Lachish-aamek anguyagyarturluku canimelnguq nunarpak Libnah; tua-i tuavet ayagtuq ellangssurviknaluku.

⁹Tua-llu Assyria-rmiut atanrat niituq Egypt-aarmiut anguyagtait ciuliqagterluteng Angayuqamek Tirkah-mek Ethiopia-rmiut angayuqratnek, tainiluku anguyagyarturluku. Angayuqam niicamiu man'a, igamek ayagceciuq Angayuqamun Hezekiah-mun

¹⁰Judah-rmiumun qanrutesqelluku: “Agayutmun cacetuqutekek'ngarpenun iqluurcecaqunak akeqluten Jerusalem-aaq cirlakevkarngaitniluku Assyria-m angayuqranun.

¹¹Niitellruuten Assyria-rmiut atanratnun qaillun pilauciit nunat piunriryukni. Elpet-qaa anagnayukluten umyuartequten?

¹²Wiinga ciuliama piunrillruit nunarpai Gozan-aam, Haran-aam, Rezeph-aam-llu, tuqulluki-llu Betheden-aam yui Telassar-aami uitalriit, iliita agayutiita anirturciiganaki.

¹³Nauwa atanrit ukut nunarpiit Hamath-aam, Arpad-aam, Sepharvaim-aam, Hena-m, Ivvah-m-llu?”

¹⁴Angayuqam Hezekiah-m kevgamek teguluku igaq naaqaa. Tua-i-llu Agayuvigmun agluni ellia tauna kalikaq ATANREM ciuqerranun,

¹⁵piicagluni-llu,

¹⁶“Artuqailnguq ATANEQ, Agayutii Israel-aam, aqumgalria cherubim-aam quliini, elpet kiivet Agayutnguuten, atanirturluki tamalkuita angayuqauviit ellarpagmi. Elpet piliaqellruagken nuna qilak-llu.

¹⁷Watua, ATANEQ, niiskut tangerrluki-llu cat tamalkuita wangkutnun tut'ellriit. Niiski tamalkuita Sennacherib-aam qanellri caunrilkuurluten elpet, unguvalria Agayun.

¹⁸ATANEQ, tamamta wangkuta nallunritarput angayuqrin Assyria-m piunririllrat amllernek atanruvignek, nunait-llu uitavigkarniirulluki,

¹⁹ekualuki-llu agayutait tamakut-llu agayutnguvkenateng, tau͡gaam yuguaruluteng murauluteng teggalquuluteng-llu piliaqumaluteng yuut unataitgun.

²⁰Watua, ATANEQ Agayutemta, aviuskut Assyria-rmiunek, tamarmeng atanruviit ellarpagmi nallunrirnauraat elpet kiivet Agayutngucin.”

²¹Tua-llu Isaiah-m qanrucarturcetaa Angayuqaq Hezekiah kiuluku angayuqam piicautii

²²waten ATANEQ qanerniluku, “Nunarpiim Jerusalem-aam engelarautekaaten, Sennacherib-aaq, picingssautekluten-llu.

²³Kitumek caunrilkuuriyuksit cangakuuriluten-llu? Elpet takaryunrituten wangnek, tanqilriamek Agayutiinek Israel-aam.

²⁴Pisten ayagcetan ucuryagutesqellua elpenun akalrialegteggun ayagassuutevkun mayullruniluki quyinkacagait Lebanon-aam ingriin. Ucuryagtuten kepullruniluki cedar-aat napat sugtunqurrait, napat-llu cypress-aat assinkacagait, pulallruniluten-llu tekilluki nunat napalilriit iluqsinqurrait.

²⁵Ucuryagtelartuten elakilarniluten merkarpenek nunakenrilkevni, anguyagtevnun-llu Kuik Nile-aq tutmarluku meriutniluku.

²⁶“Niiteksaituten-qaa wangnun man'a picirkiuraqellruniluku ak'a ciuqvani? Watua-llu piciurtelluku. Wiinga pinimek cikillruamken asvairqumalriit nunarpiit imenrurtesqelluki.

²⁷Yuut tamaani uitalriit qaillun pisciigatellruut; alingellruut tatamurraluteng-llu. Canegtun ayuqellruut carr'ilqami wall'u naunerrlugtun naulriatun enem qaingani kiirmek calaralirnermek anuqliuskaitun.

²⁸“Tau͡gaam wiinga nallunritaqa ayuqucin tamalkuan, caurallren natmun-llu ayallren. Nallunritaqa-llu elpenun eq'urrutekuciqa.

²⁹Niitellruaqa tamana eq'urtellren elpenek-llu pivakellren, waniwa negcigciqamken qengagpegun sugg'ilicirluten-llu ut'ruciiqamken taillerpeni tumyarallerpegun.”

³⁰Tua-llu Isaiah qanertuq Angayuqamun Hezekiah-mun, “Waniwa nallunailkutaa qaillun piqatallran. Mat'umi allrakumi tungliani-llu nerlarciquci yuilqumi tau͡gaam naumalrianek mukaarkanek, tau͡gaam allrakunqigeskan nauceciiyugngaciquci mukaarkanek quyurrluki-llu, nauceciiluci-llu wine-arkat atsat napayagaitnek, nerlararkauluci-llu atsaitnek.

³¹Judah-mi unegtaulriit naunrartun nauluaqalriatun ayuqeciqut acilqu͡rrit aciqvanlluteng nunami atsanek naugiluteng.

³²Yugtangqerciquq Jerusalem-aami Ingrimi-llu Zion-aami unguvalrianek, tua-i-wa ATANREM Artuqailnguum ilungluni pivkaryuateng.

³³“Cali wani-wa ATANREM qanrutkellra Assyria-rmiut atanrat piluku: ‘Elliin nunarpak una iterngaita ataucirquungraan-llu pitgarngaunani tungiinun. Anguyagtet akngircailkutellget nunarpak mallegngaitaat, qertulriamek-llu anguyagcuutmek taqusngaunateng avatiikun.

³⁴Uterciiquq tumyaraq taillermini atullni aturluku, nunarpagmun iterpek'nani. Wiinga, ATANERMI, qanertua.

³⁵Ingluliuruciiqaqa una nunarpak qaunqelluku-llu, wiinga takarnarquciqa cali-llu akqutkelqa pistemnun David-aamun pitekluku.’”

³⁶An'gilaa ATANREM atrartuq Assyria-rmiut arulaingqauviatnun tuquciluni-llu anguyagten̄ek tiissitsaanek yuinarnek qulngunrita'arnek talliman-wa (185,000). Erqarallrani unuaquani tamaani taklaut tamarmeng tuqumaluteng!

³⁷Tua-i Assyria-rmiut atanrat Sennacharib-aaq utertuq Nineveh-mun.

³⁸Erenret iliitni Sennacharib-aaq agayuinanrani agayutmi Nisroch-am agayuviani, malruk qetunraagken, Adrammelech-aam Sharezer-aam-llu, tuqutaak nuussirpamegnegun qimaglutek-llu Ararat-am nuniinun. Allam-llu qetunrain iliit, Esarhaddon-aam enairluku angayuqrurrluni.