Read Yupik Isaiah 38 Bible Online

Isaiah 38 - Yupik bible

Isaiah 38

¹Caqerluni Hezekiah naulluuguq tuquyarpiarluni. Prophet-aam Isaiah-m Amoz-aam qetunraan tangerrsarturaa qanrulluku-llu, “Waten ATANEQ qanertuq: Cat tamalkuita elluaqcarki assiringailavet. Upten tuqullerkarpenun.”

²Hezekiah mumiggluni qacarneq cauluku piicagtuq:

³“Neq'akiu, ATANEQ, kevgiulqa elpenek piciulua, cat-llu pisqelten pingnaquraraqluki.” Aluviliurluni-llu qiaqapiggluni.

⁴Tua-llu ATANREM Isaiah alerquraa

⁵utertesqelluku Hezekiah-mun qanrutesqelluku-llu, “Wiinga, ATANEQ, Agayutiini ciuliarpet David-aam, niitaqa piicauten tangerrluki-llu aluviten; wiinga-llu unguvan ilaciqaqa allrakunek akimiarnek.

⁶Anauciiqamtek una-llu nunarpak Jerusalem-aaq angayuqranek Assyria-m, wiinga ingluliuruciiqaqa nunarpak.”

⁷“Uuggun nallunailkutakun nallunriciiqan ATANERMUN piarkaucia elliin akqutkellni.

⁸Mayuryarani Angayuqam Ahaz-am piliallrini, ATANREM talineq uterceciiqaa qulnek akernek.” Talineq-llu utertuq qulnek akernek.

⁹Hezekiah assirillermi kinguani, igartuq mat'umek nanrautmek yuarutmek:

¹⁰Wiinga umyuarteqsaaqua ayagyuarlua tuquqataryuklua, Angutngurtellerkaqa tekilluku unguvavkenii.

¹¹Umyuarteqsaaqlua-llu maani unguvalriit nuniitni ATANEQ tangenqigtenritnayukluku Wall'u allamek unguvalriamek yugmek.

¹²Unguvalqa maani iquklilluni, Pelatekatun imcimalriatun, 'Lumarrartun kepumalriatun 'lumarrissuutmek. Umyuarteqlua Agayutmun unguvalqa iqukliceteqataryukluku.

¹³Unugpak yuuniaraunga engellugturlua, Tuarpiaq yugtutulim ayemqellrukai enrenka. Umyuarteqlua-llu Agayutmun tuquvkaqataryuklua.

¹⁴Erinaka anesciigaliluni, neplirlua-llu yaqulegtun engaaluarlua. Iigka mernurlutek ciugngavakaama qilatmun. ATANEQ, nangteqlemnek aviusnga.

¹⁵Camek-mi qanerciqsia? ATANREM man'a caliaqaa. Umyuarniurama cakneq, qavarciiganii.

¹⁶ATANEQ, unguvaciqua elpenun kiivet; Canrirtellua unguvavkarnga.

¹⁷Umyuarniurutairullua uitanqegcingciqua. Anirturan unguvaka tamalkuitnek aarnarqellrianek; Assiilngunka-llu au͡g'arluki.

¹⁸Tungmagcimalriit nanrarngaitaatgen; Tuqumalriit-llu cacetuqutekesciiganak.

¹⁹Unguvalriit tau͡gaam quyavikciqaatgen; uumi ernermi quyavikucimtun. Angayuqaulriit irniateng qalarut'larait piciucirpenek.

²⁰ATANEQ, canrircetarpenga. Qelutellegnek aturcetaarciqukut atuutekluku nanrauten. Nanrarluten Agayuvigpagpet iluani unguvallemta taktaciatun.

²¹Isaiah-m qanrutaa angayuqaq elliisqelluku iinrukiuramek figs-aanek aninguaranun, assirisqelluku.

²²Angayuqaq Hezekiah qanertuq, “Camek nallunailkutangqerciqa asguranairutnguluni Agayuvigpagmun ayayunarillerkaqa?”