Read Yupik Isaiah 40 Bible Online

Isaiah 40 - Yupik bible

Isaiah 40

¹“Cacetureski yuunka, cacetureski,” qanertuq Agayutvut.

²“Tengruca'arki yui Jerusalem-aam. Qanruski nangteqellrat amlleriniluku assiilnguitnek-llu au͡g'aricimaniluki. Assiilnguit pitaciluki wiinga anucimirqecetaallruanka.”

³Erinatanguq qanelriamek, “Yuilqumi upyuciu tumyararkaanek ATANEQ! Carrirciu kinreskiini nunami tumyararkaa Agayutemta!

⁴Kuignayuut tamalkuita imirluki; ingrit-llu tamalkuita maniggluki. Qemit manigiciqut, manialnguq-llu nuna manigcetellriarurrluni.

⁵Nutaan-llu ATANREM ucurnarqucia alairciquq, yuut-llu tamarmeng tangerciqaat, Tua-i-wa ATANREM qanrutekngaku tuaten piciqniluku.”

⁶Erinatanguq qanelriamek, “Qayagaurutkiu qanrutkarkaq!” Wiinga kiugaqa, “Camek qanerlua qayagauqatarcia?” “Qayagaurutkiu yuut tamarmeng canegtun ayuqniluki; tangssunarqellrat-llu yuilqum naucetaaritun ayuqluni.

⁷Can'get nalalartut naucetaat-llu catairutaqluteng ATANREM anuqliucetaqateng. Yuut asvaitenrilameng canegtun.

⁸Aa-ang, can'get nalalartut, naucetaat-llu catairutaqluteng, Agayutemta tau͡gaam qaneryaraa piugarkauguq nangyuilngurmek.”

⁹Jerusalem-aaq, mayurluten ingrimun qertulriamun qayagaurutkiu qaneryaraq assilria! Zion-aaq, qayagaura qastuluten; qanrutkiu qaneryaraq assilria! Qayagaura alingevkenak! Qanruski nunarraini Judah-m uitalriit Agayutiit agiirrniluku.

¹⁰ATANEQ taiciquq atanirturiyarturluni pinilegpauluni, anirtullni malikluki.

¹¹Qusngiliurtetun nerqelarciqai katngautni; qusngiyagaat quyurciiqai kevegluki-llu ayautaqluki; piyagalget-llu mulngaku'urluki ciulilarciqai.

¹²Imarpik-qaa yuum cuqcugngaa unatmikun qaluuriurluku unatmi-llu-qaa cuqyutiikun qiliit cuqcugngai? Ellarpiim-llu-qaa urraa eksugngaa saskamun uqamaltassiarluki-llu ingrit qemit-llu usperissuutekun?

¹³Yuum-qaa qanrucugngaa ATANEQ caliarkainek? Kia elitnauryugngaagu ayuqucirtualuku-llu?

¹⁴Kina Agayutem ellangcarvik'lartau nallunrirnaluni taringluni-llu cat-llu qaillun caliaqumallerkaat elilluku?

¹⁵ATANERMI atanruviit caunritut, mer'em kutiini cangallruvkenateng; yaaqvam-llu qikertai urr'atun uqamaltaluteng.

¹⁶Napai Lebanon-aam muragkanrunritut, ungungssiutai-llu ekuagiarkanruvkenateng Agayutemten̄un.

¹⁷Tua-i-wa atanruviit elliini caunrilameng.

¹⁸Kitutun Agayun ayuqniciqseta? Catun-llu ayuqniluku qaneryugngaceta?

¹⁹Agayutnguatun ayuqenrituq unatetgun piliaqumalriatun, caviliurtet qallilitukiicetun suulutaamek uitavigkaa-llu qerrirlimek pilirraarluku tuavet elliluku.

²⁰Kina teguqaininrilnguq qerrirlimek wall'u suulutaamek cucukilartuq muragmek arungialngurmek. Munalriamek-llu calitulimek yualartuq yugualiarkamek iqungailngurmek.

²¹Nallullruan-qaa? Ak'a-qaa ciuqvani qanrucimallrunrituten? Qanrucimaksaituten-qaa qaillun ellarpiim piliaqumallrucianek?

²²Atanruvimi aqumllertaani nunam quliini qiliim-llu yaatiini aqumgalriim piliaqellrua; nunam yui negairngalngurcetun angtaluteng, Nengtellrui qiliit 'lumarrartun capkutatun, saggluki-llu pelatekatun uitaviketukiicetun.

²³Atanerruat cayunailengraata piunrircet'larai caunrirtelluki-llu.

²⁴Tamakut naugaartun ayuqut acilqungeksailngurtun. ATANREM cup'aqateng kinlarai, tengtelarai mukaarkat quyurcimallratni ilakuallercetun.

²⁵Tua-llu kitutun tanqilria Agayun ayuqniciqseta? Elliitun-qaa ayuqellriartangqertuq?

²⁶Ciuggluci tangerciu qilak! Kia piliaqellruaki agyat tangerqeci? Ciuliqagtelartiita-wa anguyagtetun, nallunritai qaillun amllertaciat atauciugurluki-llu aterpagtaalarai! Piniqapigcami atauciunge'rmi iliit cataiteksaituq!

²⁷Israel-aaq, ciin-mi tua-i qanemyuugarcit ATANERMUN nallularniluki picurlauteten wall'u takumcukeksaitniluten elluarrluten pimanritaqavet?

²⁸Nallunriqsaituten-qaa? Niiteksaituten-qaa? ATANEQ nangyuunani Agayutnguuq; piliaqellrua ellarpak tamalkuan. Ellii taqsuqsuituq mernuyuunani-llu. Kia-llu taringumanritaa umyugaa.

²⁹Pinirivkalarai pinialnguut taqsuqellriit-llu.

³⁰Ayagyuange'rmeng pinialilartut; ayagyuat taqsuqem ugaani iquyugngaut.

³¹Tau͡gaam yuut cacetuqutekilriit ATANERMEK piniat nutarcimaciquq. Qulmurciiqut yaqurluteng metervagtun; aqvaqurciqut mernurngaitut-llu; piyuaciqut taqsuqngaunateng-llu.