Read Yupik Isaiah 41 Bible Online

Isaiah 41 - Yupik bible

Isaiah 41

¹Agayun qanertuq, “Niicugnicia nepaunaci, yaaqvanelngurni nunani! Upciki qanrutkarkaci qanercetaarvigmi; qanllerkiumaciquten. Quyurrluta nallunairniarput kina piciuluni picianek.

²“Kituuga tauna taivkarilleq cirlakiarkamek calaralirnermek[14] cirlakivkarluku-llu natmun tamiin ayallranun? Kia cirlakivkartau atanernek atanruvignek-llu? Urr'artun pitarrluki nuussirpamikun iqurqai. Pitgaquluki canegtun cekavtai anuqem tengeskaitun.

³Malirqeralarai akngiringaksaunani, tumyaratgun ciungani atuqsailkem̄ikun.

⁴Kituuga makut tuaten pivkartiit? Kia pillerkiurumaaki cat tekitarkat ayagniqarraallratnek ayagluki? Wiinga, ATANEQ, cat ayagniqarraallratni tuantellruunga, cali-llu, wiinga, ATANEQ, cat iquklitellratni tuanciiqua.

⁵“Nunat yaaqvanelnguut yuita calianka tangellruit; alingluteng uulegtut. Taumek tailuteng quyurtellriit.

⁶Munarlit calistet atunem ikayurtaagutut tengrucaraulluteng tuaten.

⁷Muraliurtem tengrucararaa suuluciiyurta, mulut'uugturluku-llu manigcilriim assipirluku usukcaulluku agayutnguam tumartestii tengrucararaa. Qanertut, ‘Payariusngallra assirtuq’— nutaan-llu ussukcaulluku elliat tuaken nugtartarkaunrirluku.

⁸“Elpet tau͡gaam, pistemni Israel, elpeci wiinga nakmikellruamci, kinguvrini Abraham-aam, yugnikekma;

⁹taitellruamci ellarpagmek tamiin; qayagaurluci yaaqvanek ellam iluanek qanrulluci, ‘Wiinga pistekamci.’ Qessakevkenaci cucukellruamci.

¹⁰Alingyaqunaci—wiinga nayuramci, Nanikuayaqunaci-llu Agayutengqertuci wangnek! ikayurluci pinirivkarciqamci; camun pivkarngaitamci anirturciqamci-llu.

¹¹“Tangerrnakesteci kasnguyugluteng cacirkaiciiqut; Ingluliurteci caunrilngurtun ayuqeciqut piunrirluteng-llu.

¹²Yuaryaaqeciqaci nakukillret elpecen̄ek, nalaqngaitaci tau͡gaam; anguyalriit-llu elpecen̄ek caunrilngurtun ayuqeciqut.

¹³Tua-i-wa wiinga, ATANEQ Agayutevcen̄i; nayumiqaciqngamci qanrulluci-llu, ‘Alingevkenaci; ikayurciqamci.’”

¹⁴ATANEQ qanertuq, “Ikgelngerpeci pinialeng'e'rpeci-llu, Israel, alingenrici; ikayurciqamci. Wiinga, tanqilria Agayutiit Israel-aat, anirturtekarpecia.

¹⁵Mukaarkanek caranglluirissuutetun ayuqlirivkarciqamci, keggutelegtun nutaranek ipellrianek. Caranglluirilriatun kaugtuarluki ingrit tuaten piunrirciqaci; qemit-llu caarrlugkuatun ayuqlirivkarluki.

¹⁶Egciiqaci qulmun; anuqem tengciiqai, ellarayiim-llu cekavvluki. Nutaan-llu angniutekciqerci ATANEQ, ucurnarivkarluku-llu Tanqilriartaa Israel-aam.

¹⁷“Wiinga yuunka meqsugluteng mermek yuaraqata, igyarait kinraqata meqsugluteng, nutaan, wiinga ATANEQ, kiuciqanka piicautait; wiinga, Israel-aam Agayutiini, watqapik cakaarngaitanka.

¹⁸Kuigtangevkarciqanka naugiyuilnguut qemit, qurrlurtelluki-llu ulvelriit mer'it kuignayugteggun. Mertailnguq nuna nanvarraralingevkarciqaqa kinertellria-llu nuna mermek ulvelriartangevkarluku.

¹⁹Napat cedar-aat nauvkarciqanka mertailngurmi nunami; allat-llu acacia, myrtle, olive-aat-llu napait. Naparugaat-llu nauciqut naugiyuilngurmi nunami, naparugaat pine-at, juniper-aat cypress-aat-llu.

²⁰Yuut man'a tangerrluki nallunriciiqut wiinga, ATANEQ piliaqellruciat.”

²¹ATANEQ, Israel-aat atanrat, uumek qanerkangqertuq: “Elpeci atanruviit agayutaitni, nasvagciu pinilriarucirci. Puqigtacirci tamalkuan aturluku!

²²Tailuci wavet qanrutkiciki tekitarkat, nallunritniaraput tuaten pikan. Apqaurvigmelngurnun qanrutkiciki ak'a pellullret, qanrulluta-llu cauciitnek.

²³Qanruskut tekitarkamek— nallunrirnaurput agayutngucirci! Ca assilria pivkarluku wall'u picurlagnarqelria tut'elluku; alingmek imirluta irr'ivkarluta-llu!

²⁴Caunrituci, caliaci-llu tamarmeng cauvkenateng; umyualngunarqut agayutulit elpecen̄un.

²⁵“Cucuklillruunga angutmek uitalriamek calaralirnermi,[15] wiinga taivkarciqaqa curuusqelluku neglirnermek. Tutmaucilartuq atanirturten̄ek marayatun pitarrluki, qikuliurtetun tutmalriatun qikumek.

²⁶Nalirpeci qanrutkellruagu man'a tuaten piciqniluku, tuaten pikan qanresqelluta piciuluten qanerniluten? Ilavci atauciunge'rmi qanrutkellrunritaa; kia-llu camek qanertelluci niiteksaunaci!

²⁷Wiinga, ATANEQ, ciumek qanrutellruaqa Zion-aaq; ayagcecillruunga qanrarkamek Jerusalem-aamun qanresqelluku, ‘Yut'en agiirtut! Kingunemeggnun utertut!’

²⁸Tangertaallemni-llu agayutet, iliit camek qanerkaituq; iliita-llu kiusciiganaki apyutenka.

²⁹Tamarmeng makut agayutet camun atuunritut; watqapik camek calisciigatut— agayutnguat ukut cirlaugut pinianateng.”