Read Yupik Isaiah 42 Bible Online

Isaiah 42 - Yupik bible

Isaiah 42

¹ATANEQ qanertuq, “Waniwa wiinga pisteka, pinirivkalqa cucukelqa, ilukegcitekluku. Anerneqa-llu elliinun tuc'etellruaqa, elluaruciq piurceciiqaa tamalkuitni atanruvigni.

²Eriniangaituq tumyarani-llu niitnaungaunani.

³Canek cuplulek qagernelek ayemn͞gaitaa, kumaluaqanrilengraan-llu kenurraq nipngaunaku. Elluaruciq nangyuilnguq piurceciiqaa tamalkuitnun.

⁴Piarkani pinricen̄arngaitai, ciunerkairusngaunani-llu; elluaruciq piurceciiqaa nunami. Nunat-llu yaaqvanelnguut neryuniurutkeciqait elitnaurutai.”

⁵Agayutem qiliit piliaqellrui nenglluki-llu; nuna-llu elucirkiurluku cat-llu tamalkuita qainganelnguut; unguvakilluki anernelirluki-llu yui tamalkuita. Nutaan-llu ATANEQ Agayun qanerluni pistem̄inun,

⁶“Wiinga, ATANEQ, qayagaullruamken pinimek-llu cikirluten elluaruciq piurtesqelluku nunami. Elpegun akqun piurciiqaqa yuut tamalkuita pillgutekluki; elpegun atanruvignun tanqik taiciiqaqa.

⁷Tangerrsaurceciiqaten cikmiumalriit iingit anevkarluki-llu tan'gercetellriani itercivigni uitalriit.

⁸“Wiinga ATANRUUNGA, tauna wiinga atqaqa; Allam agayutem ucurnarqucimni pillgucirngaitaanga; agayutnguat pillguciuscessngaitanka nanrautemnun.

⁹Cat piciqniluki qanrutkellrenka ak'a pillruut. Watua kitaki qanrutnaamken ukani tekitarkanek pivailgata.”

¹⁰Nutaramek yuarutmek aturci ATANERMUN; nanrarluku aturci, ellarpiim yuini tamarpeci! Nanrarciu, imarpigkun ayagatulini; nanrarciu, tamarpeci imarpiim ungungssiini! Aturci, yaaqvanelngurni nunani tamaani-llu tamarpeci uitalriani.

¹¹Kinertellriim nunam nunarraat-llu tamaani uitalriit nanrarlitgu Agayun; Kedar-aarmiut-llu nanrarlitgu! Nunarpagmi-llu Sela-mi uitalriit qayagpagalit nunaniryugluteng ingrit kangritnek.

¹²Yaaqvanelngurni nunani uitalriit nanrarlitgu ucurnarivkarluku-llu ATANEQ.

¹³ATANEQ ayalartuq callugyarturluni anguyagtetun; upingauq tengruluni-llu anguyallerkaminek. Erinani antaa qayagpagaluni, anguyagcuutmek; nasvagluku pinini Inglukestem̄inun.

¹⁴Agayun qanertuq, “Nepaicimallruunga; yuunka kiullrunritanka. Tau͡gaam watua pillerkaq tekituq; wiinga neplirtua arnatun teggiurcilriatun.

¹⁵Piunrirciqanka ingrit qemit-llu, kinertelluki-llu can'get napat-llu. Kuignayuut kuigit meriuceciiqanka nanvarraraat-llu kinertelluki.

¹⁶“Ciuliqagciiqanka yuunka cikmiumalriit tumyaratgun pekteksailkaitgun. Tan'geq-llu ellaitni tanqiurrluku nuna-llu manialnguq manigiluku ciunratni. Makut maa-i akqutkanka, pinritevkenaki piciurcetarkauluki.

¹⁷Tamarmeng cacetuqutekilriit agayutnguanek qanraqluteng agayutnguniluki, kiaresngiacecimaciqut.”

¹⁸ATANEQ qanertuq, “Niicugnici, niitesciigalngurni yugni! Kiarci murilkelluci, cikmiumalriani yugni!

¹⁹Pistemni-qaa cikmiumanrulriamek, niicuillrulriamek-llu qaneryarturtelluku ayagcetlemnek pitangqertuq?

²⁰Tanglartuq canek amllernek, tau͡gaam elpekeksaunaki; ciutek ikingqauk, tau͡gaam niitesciiganani.”

²¹ATANEQ Agayutnguuq tengrukluku anirturillerkani, taumek qigcignarillrukai alerquutni ayuqucirtuutni-llu, yum'inun-llu qigcikesqai.

²²Tau͡gaam maa-i elliin yui uayaumaut; kelucaucimaluteng nayugnerni nunam aciani itercivigni-llu iirumaluteng. Cairulluki teglegiluki kitumek-llu ikayurtekaunateng.

²³Ilavci-qaa niicugniqatanritaa man'a? Wak'nirnek-qaa murilkurluci niicugnilangeciquci?

²⁴Kia pegtellruagu Israel-aaq uayaaritulinun? Elliin-wa ATANREM, assiilngirviklemta! Pisqutai aturyuumiilamteki alerquutai-llu niicugpek'naki taitellri wangkutnun.

²⁵Taumek wangkuta naspeteskiikut eq'uqertellermi tuknitacianek anguyagkun-llu nangteqsaraq aturtelluku. Kenertun eq'uqertellra ekurpagtuq tamiini Israel-aami, tau͡gaam wangkuta nalluluku tuaten picia; camek-llu eliyutkevkenaku.