Read Yupik Isaiah 43 Bible Online

Isaiah 43 - Yupik bible

Isaiah 43

¹Israel-aaq, ATANEQ piliaqestellren qanertuq, “Alingyaqunaci—anirturciqamci. Aterpaggluci qayagaullruamci—elpeci wiinga pikamci.

²Et'ulriakun merkun ayakuvci, nayurciqamci; picurlagangerpeci cirliquangaituci. Kenrem akuliikun ping'e'rpeci, uusngaituci; naspaatet arturnarqellriit akngirrngaitaaci.

³Wiinga ATANEQ Agayutekngavcia, tanqilria Agayutii Israel-aam, anirtularamci. Egypt-aaq pegciiqaqa teguarunrillerkarpecen̄un akiliutekluki; Ethiopia Seba-llu pegciiqagka.

⁴Atanruviit pegciiqanka unguvavci anirtullerkaa pitekluku, piksuumirnarqelriaruavci wangnun, kenekngamci takarnarqutmek-llu cikiumiimci.

⁵Alingenrici—nayuamci wiinga! “Calaramek kanaknermek-llu yut'en ut'ruciiqanka.

⁶Negeqvamun ayagcecesqeciqanka ungalamun-llu qunukesqevkenaki. Uterceciki yuunka yaaqvani uitalrianek nunanek, tamiinek ellarpagmek.

⁷Ellait wiinga nakmiin yuk'anka, wiinga-llu piliaqellruanka ucurnarivkaasqellua.”

⁸Agayun qanertuq, “Yuunka taisqiciki apqaurvigmun. Iingqerrsaaqut, tau͡gaam tangerciigatut; ciutengqerrsaaqut, tau͡gaam niitesciiganateng.

⁹Angayuqauviit yuit taisqiciki apqaurvigmun. Agayutiita naliata tekitarkaq qanruteksugngaagu? Naliata qanrutkellruaki wanirpak cat pilriit? Taukut agayutet taivkarlitki nallunairistekateng asguranairnauraat piciuciat, nallunairivkarluki qanllermeng piciuciitnek.

¹⁰“Israel-aam yuini, wiinga nallunritestekamci; cucukellruamci pisteknaluci, nallunrirluci ukvekesqellua taringesqelluku-llu kiima wiinga Agayutnguciqa. Wiinga avatemni allamek agayucetaituq; imumirpak allamek pitangqeqsaituq, pitangengaunani-llu.

¹¹“Wiinga kiima ATANRUUNGA, avatemni allamek anirturiyugngalriartaituq.

¹²Wiinga qanrutkellruanka cat tekitarkat pivailgata, tailua-llu ikayuryarturluci. Tangnerranarqelria agayun waten piksaituq; elpeci-llu nallunritestekamci.

¹³Wiinga Agayutnguunga piurrlainararkaulua. Kina imna anagngaituq pinimnek; caliaqellrenka-llu yuum qaillukuarciigatai.”

¹⁴Israel-aam tanqilria Agayutii, ATANEQ, anirturtessi, qanertuq, “Anirturnaluci, ayagceciciqua anguyagten̄ek anguyagyarturtelluku Babylon-aaq; navgurciqanka nunarpiim iteryarain ikirtuqait, yuin-llu qayagpagallrit qialriarurciiqut.

¹⁵Wiinga ATANRUUNGA, tanqilria Agayutsi. Piliaqellruamken, Israel, wiinga-llu Ataneqerpecia.”

¹⁶Ak'a tamaani ATANEQ tumyarillruuq imarpigkun, tumyaramek mer'em carvanilriim akuliikun.

¹⁷Ciuliqagtai-llu anguyagtet pinilriit piunrillerkaatnun, anguyiit akalrialegnek horse-aanek-llu ayagassuutelget. Iqullruut, maktenqiggngairulluteng, nipcimaluteng kenratun kenurram!

¹⁸Tau͡gaam ATANEQ qanertuq, “Neq'akenriciki ak'a ciuqvani pillret umyuangcautekevkenaki-llu ak'allaat pillret.

¹⁹Murilkici tau͡gaam nutaramek piarkamnek. Ak'a maa-i ayagnirtuq elpeci-llu tangerrluku. Wiinga tumyariciqua yuilqukun cikirluci-llu qurrlulrianek mernek tamaani.

²⁰Ungungssiaraunge'rmeng takaqeciqaatnga; kaviarngalnguut yaqulegpiit-llu yaqruilnguut nanrarciqaatnga kuiget qurrlurceskumki kinertellriami nunami cikirluki mermek yuunka cucukellrenka.

²¹Ellait piliaqellruanka wiinga piknaluki, ellaita-llu aturluteng nanrarciqaatnga.”

²²ATANEQ qanertuq, “Elpeci tau͡gaam taqsuqutarpecia, Israel; agayuksaunaci wangnun.

²³Payugteksauni-llu qusnginek ekuagarkanek; takarnarqutmek-llu piksaunii elliitevciuggun. Cakviurceteksaitamci elliicetaarturluci mernurcillruvkenaci-llu kaigavikurluci aruvagkamek.

²⁴Aruvagkamek kipuyutellrunritarpecia, camircetellruvkenii-llu uquitnek ungungssiutevci. Atmiraqlua tau͡gaam assiilngurpecen̄ek; taqsuqevkaraqlua-llu assiilngillerpeciuggun.

²⁵Tau͡gken, wiinga Agayutnguunga assiilngurpecen̄ek au͡g'aritaqluci, man'a-llu pilaraqa wang'uciqa pitekluku, umyuaqenqiggngaitanka-llu assiilnguci.

²⁶“Qanercetaarvigmun ayagnaurtukut; picetaaruceci taiciu! Qanrutkarkaci qanrutkiciu asguranairluku alangqanrilucirci!

²⁷Ciuqliq ciuliarci[16] assiilngillruuq, ciuliqagteci assiilngillruut wangnun,

²⁸atanirturtevci-llu menuurtellruluku agayuvika. Taumek taitellrulrianga piunrillerkaanek Israel-aaq; wiinga nakmiin yuunka kiaresngiatelluki.”