Read Yupik Isaiah 44 Bible Online

Isaiah 44 - Yupik bible

Isaiah 44

¹ATANEQ qanertuq, “Kitaki niicugni, Israel, pistemni, elpeci wii cucukellemni yugni, Jacob-aam kinguvrini.

²Wiinga ATANEQ piliaqestellerci; yuurqanerpecen̄ek, ikayularamci. Alingenrici; pistekamci, wiinga yumni cucukellemni.

³“Nuna kinertellria meng'evkarciqaqa kuiget-llu qurrlurtelluki kinertellriakun nunakun. Anerneqa tuc'eciiqaqa irniarpecen̄un atawaqertelluki-llu kinguveci.

⁴Yugyangciqut canegtun naulriatun nunami mel'egmi, uqviartun naulriatun kuiggaat carvanilriit caniatni.

⁵“Ataucitaarturluteng, yuut qanerciqut, ‘ATANREM pikaanga.’ Taiciqut ilaucarturluteng Israel-aam yuinun. Tamarmeng-llu igauciiqaat ATANREM atra tallimeggnun ellmeggnek-llu aterpagciiqut Agayutem yuinun ilakniluteng.”

⁶ATANEQ, atanirturtii qaunqestii-llu Israel-aam, ATANEQ Artuqailnguq, uumek qanerkangqertuq: “Wiinga ayagniqarraarutnguunga, iquulua-llu, kiima Agayutnguunga; allamek agayucetaituq wangnek tau͡gaam.

⁷Caliaqellrenka-qaa allam caliaqsugngai? Kia qanruteksartaki cat piarkat ayagniqarraallratnek ayagluki iquklitellratnun?

⁸Alingenrici, wiinga yumni! Elpeci nallunritarci ak'a ciuqvanek ayagluku una tekilluku qanrutkellruanka tamalkuita tekitarkat, elpeci-llu nallunritestekamci. Allamek-qaa agayucetangqertuq? Allamek-qaa pinilriamek agayucetangqertuq niiteksailkengamnek?”

⁹Agayutngualitulit tamarmeng catngunritut, agayutet-llu pirpakek'ngait catnguvkenateng. Agayutulit tamakunun cikmiumalriaruut nallumalriaruluteng-llu, taumek kiaresngiacecimaciqellriit.

¹⁰Catngungaituq piling'e'rmi cavigmek yuguamek agayuluni-llu taumun agayucetun pitarrluku.

¹¹Tamarmeng agayulriit taumun kiaresngiacecimaciqellriit. Yuut piliaqestait agayutnguat yuunginaungata. Taivkarluki qanercetaarumaniartut—alingeciqut kiaresngianateng-llu.

¹²Caviliurta cavigmek teguqaarluni caliaqelaraa kenermun unaircaraqluku. Tallini pinilria aturluku cavik mulut'uugluku elucingevkalaraa. Caliinanermini, kaingelartuq, meqsungluni, mernungluni-llu.

¹³Muraliurtem cuqtaalaraa murak. Igarcuutekun elucilirraarluku muriim qaingakun, calissuutmikun caliaqelaraa, yugtun elucilirluku, kenegnariluku yuguaq, eneminun elliarkani.

¹⁴Napanek cedar-aanek iqurqilartuq atu'urkaminek, wall'u cucuklirluni oak-amek wall'u cypress-aamek muragmek napalilriami uitalrianek. Wall'u nauceciiluni napamek laurel-aamek utaqaluku-llu ellallugmun nauvkallerkaa.

¹⁵Yuum atularaa napam ilii murakluku ilii-llu agayutngualiluku. Iliinek aturluni kenermek kumarcilartuq matneqvigkaminek kelipiluni-llu; iliinek-llu agayutmek pilirraarluni agayuaqluni tuavet.

¹⁶Muriim ilii aturluku kenermek kumarcilartuq, kemegmek-llu maniarraarluni nerluku, tua-i camirrluni. Matneqluni tuani qanlartuq, “Assirpaa puqlanirluni! Kenermi-llu assirpaa!”

¹⁷Ilakuani murak agayutngualiluku ciktaarvik'laraa agayuluni tuavet. Agayutnguaq piicagvik'laraa qanerluni, “Agayutkamken, anirturnga!”

¹⁸Tamakut yuut usviilameng caliateng nalluat. Umgumait iiteng umyuateng-llu piciulriamun.

¹⁹Piliaqestait agayutnguat usviilameng ellangqenrilameng-llu waten qanerciigatut, “Ilii muriim ekuallruaqa. Kelipilua-llu kangipluikun, maniarlua-llu kemegmek nerlua. Ilakuaqa-llu murak agayutngualiluku. Wani ciktaartua muragamun.”

²⁰Tuaten pillra cangallrunrituq qamllermek nerelriami. Umyugaan ukvercani iqlutmun ayagtuq ikayurviirutellranun. Ellminun-llu qanerciiganani agayutnguaq tegumiani agayutngunritniluku.

²¹ATANEQ qanertuq, “Israel-aaq, una neq'erru; neq'erru wangnun pistekucin. Piliaqellruamken pisteknaluten, wiinga-llu nalluyagusngaitamken.

²²Carrillruanka assiilnguten au͡g'arluki amirlutun. Uterten wangnun; wiinga anirtullruamken.”

²³Qayagpagaci nunaniryugluci, qilagni! Nunam-llu et'uqrini, qayagpagci! Qayagpagci nunaniryugluci, ingrini napani-llu tamarpeci! ATANREM ucurnarqucini nasvallrua anirturluki yun'i Israel-aat.

²⁴“Wiinga ATANRUUNGA, anirturten; wiinga piliaqestekarpenga. Wiinga ATANRUUNGA, cat tamarmeng Piliaqestiit. Wiinga kiima sagtellruanka qiliit; nuna piliaqellemni, kia ikayullrunritaanga.

²⁵Kiaresngiacet'laranka ciunerkarcutulit agyat-llu murilkestaita piarkat qanrutkellrit piciurceteksaunaki. Qanellrit umyuartulriit naigtaalaranka nasvagluku-llu umyuartuciata caunrilucia.

²⁶Tau͡gken wiinga pisteka tekitarkanek qanraqan, ayagceciaqama qaneryartulriamek nasvaasqelluki picirkiuranka, wiinga tamakut picirkiurat tekitarkat-llu piciurcet'laranka. Jerusalem-aaq-llu qanrutellruaqa ataam yung'arkauniluku, Judah-m-llu nunarpai ataam naucimaarkauniluki. Tamakut nunarpiit nauciqut imnernek.

²⁷Qanllemkun kinercetellruaqa imarpik.

²⁸Cyrus-aamun qanertua, ‘Elpet atanirturistekciqamken; pisqutka aturciqan: alerquiciquten Jerusalem-aaq ataam nautesqelluku Agayuvigpiim-llu tusnganerkai ellisqelluki.’”