Read Yupik Isaiah 45 Bible Online

Isaiah 45 - Yupik bible

Isaiah 45

¹ATANREM cucukellrua Cyrus-aaq angayuqrusqelluku. Cucukellrua cirlakiarkaurcelluku atanruvignek; ayagcetellrua angayuqat piniitnek uayaasqelluki; ATANREM-llu ikiruciiqaa nunarpiit ikirtuqaitnek. Cyrus-aamun ATANEQ qanertuq,

²“Wiinga tumkan upciiqaqa, ingrit qemit-llu manigivkarluki. Navgurciqanka punerneret ikirtuqait ciqumlluki-llu caviit canirutait.

³Tukuutekarpenek cikirciqamken yuut nallukaitnek; nallunrirniaran wiinga ATANRUCIQA Israel-aam-llu Agayutiinun qayagaullrucin aterpaggluten.

⁴Piyunarquciliramken ikayuusqelluku pisteka Israel-aaq, wiinga taukut yuut cucukellrenka. Angelriamek takarnarqutmek cikiramken, nallungerpenga.

⁵“Wiinga ATANRUUNGA, allamek agayucetaituq. Nuuqekevnek pinimek cikirciqamken, nallungerpenga.

⁶Waten pillruunga tamalkuitnun yugnun ellarpiim qainganelngurnun nallunritesqelluku wiinga ATANRUCIQA allamek-llu agayucetailucianek.

⁷Piliaqellruagka tamarkenka tanqik tan'geq-llu; tamarkenka pilaragka atawaqercecilua picurlak-llu pivkarluku. Wiinga, ATANERMI, makunek tamalkuitnek calilartua.

⁸Ellallugtun ayuqliriluku cirlakiyaraq taivkarciqaqa; nuna ikirciiquq ciuniurnaluku naugiluni-llu elluiluni yuuyaramek elluarucimek-llu. Wiinga, ATANERMI, man'a pivkarciqaqa.”

⁹Naklegnarqeciqvaa-lli kitumi imumi qanemyuugaquni piliaqestem̄inun, Qikum-qaa caliaqesten̄i apcugngaa calicianek? Egatem-qaa qanemyuugautek'laraa piliaqesten̄i munaitniluku?

¹⁰Waten-qaa angayuqamten̄un qaneryugngaukut, “Ciin waten ayuqlua piliaqecetegnga?”

¹¹ATANEQ, tanqilria Agayutiit Israel-aat, ciunerkam elucilirtii, qanertuq, “Piunarquciituten aptarkaulua irniamnek wall'u caliarkamnek apertuullua!

¹²Wanguuq nunam piliaqestellra yuut-llu piliaqluki tamaantesqelluki. Pinimkun sagtellruanka qiliit; ataniumaaqa akerta, iraluq, agyat-llu.

¹³Wiinga tungaunii Cyrus-aaq calillerkaanun tengrungevkallruaqa piyullrenka elliinun piciurcecesqelluki cat-llu elluarisqelluki. Nak'rivkarciqanka tumyarat tamalkuita ayagvigkai. Elliin ataam nauciiqaa nunarpaka, Jerusalem-aaq, yuunka-llu teguarunrirtelluki. Kia akilirluku wall'u aassaqluni akilirluku man'a caliaqesqellrunritaa.” ATANEQ Artuqailnguq qanertuq.

¹⁴ATANEQ qanertuq Israel-aamun, “Tukuutai Egypt-aam Ethiopia-m-llu piksaguciiqaci, Seba-rmiut-llu sugtulriit angutait pisteksaguciiqaci; taukut maligciiqaiceci kalivnerciumaluteng. Ciktaarluteng-llu ciuqerpecen̄i qanruciiqaiceci, ‘Agayutem nayuraaci—ellii kiimi Agayutnguuq.

¹⁵Israel-aam Agayutii, yuin anirturtiit, Agayutnguuq ellminek iirumaluni.

¹⁶Agayutngualilriit tamarmeng kiaresngiaciiqut;

¹⁷Tau͡gaam Israel-aaq anirtuumauq ATANERKUN, cirlakillra-llu nangengaituq akwarpak tayima; yui-llu kiaresngiacecimangaunateng watqapik.’”

¹⁸ATANREM qiliit piliaqellrui— ellii taunguuq Agayun! Elucilirluku nuna piliaqellrua— asvaunaku piyugurararkaurtelluku piliaqellrua. Piliaqellrunritaa uitaviksunaunaku, tau͡gaam yungqerrarkauvkarluku. Taunguuq waten qanlleq, “Wiinga ATANRUUNGA, allamek agayucetaituq.

¹⁹Aassaqlua qalartellrunritua wall'u piqatallrenka iirumaluki. Israel-aam yuinun yuaresqellrunritua nunami uitaviksunailngurmi. Wiinga, ATANEQ, piciulriamek qanlartua; nallunrircet'laranka piciulriit.”

²⁰ATANEQ qanertuq, “Quyurrluci taici, atanruviit yuitni, unegtaullerni atanruvik piunrillrani; qanercetaarumallerkarpecen̄un ullauci! Yuut wavirtaalalriit ang'aqluki muriit agayutnguateng piicagaqluteng-llu agayutnun anirturisciigalngurnun— tamakut yuut watqapiar camek nalluut!

²¹Tailuci nasvagciki picetaaruyuceci apqaurvigmi, picetaarucimalriit quyurrluki arenqiirturtelluki. Kia ak'a pivailgata tekitarkat qanrutkellruaki? Wang'unrituq-qaa, ATANEQ, Agayun anirturilria yum'inek? Allamek agayucetaituq.

²²“Wangnun tuigci wanirpak anirtuumaniartuci, ellarpiim yuini! Wiinga kiima Agayutnguunga.

²³Akqutka piciuguq, cimiumangaituq-llu. Piciulua akqiunga tamalkuan wang'uciqa aturluku: Tamarmeng ciuqamnun ciisqumigciiqut, akeqlua-llu wangnun piciuciqniluteng.

²⁴“Qanerciqut wangkun tau͡gaam cirlakin piniq-llu piarkaunilukek; eq'ukestenka tau͡gaam tamarmeng caunrilkumaciqut.

²⁵Wiinga, ATANEQ, anauciiqanka tamalkuita Jacob-aam kinguvri, ellaita-llu nanrarciqaatnga.”