Read Yupik Isaiah 46 Bible Online

Isaiah 46 - Yupik bible

Isaiah 46

¹“Watua iquklitut Babylon-aam agayutai! Bel-aq Nebo-llu ciktaarvik'lallruyaaqagket, tau͡gaam maa-i ek'agkek ciulvagnun, taqsuqengraata atmagtellukek.

²Agayutnguak ellmeggnek anirturciigatuk; tegumalutek ayaucimauk. Una tua-i watua iquklitelqaat Babylon-aam agayutain!

³“Niicugnicia, Jacob-aam kinguvrini, tamarpeci yum'a ilakuarraini. Yuurqaanerpecen̄ek aulukurallruamci.

⁴Agayutkavcia wiinga-llu aulukciqamci ak'allaurtellerpecen̄un qiingellerpecen̄un. Piliaqellruamci aulukciqamci-llu; ikayuumaciqamci aviutaqluci-llu.

⁵“Kitumun ayuqestassiiguciiqsecia?” qanertuq ATANEQ. “Allatangqertuq-qaa wangtun ayuqellriamek?

⁶Yuut akiviutameggnek suulutaamek anciluteng; usperiluteng qerrirlimek. Calistekameggnek-llu piut suuluciiyurtem̄ek agayut'lisqelluku; Nutaan-llu qaqicaku ellaita ciktaarvikaat agayuluteng-llu tuavet.

⁷Quukatarluku ayautaat; elliat-llu enekaanun, tuani-llu nangengqauq, uitaviminek pektesciiganani. Kia piicagvikekani, kiusciigatuq anirturciiganaki-llu picurlagmek.

⁸“Umyuaqiciu una, assiilngiumalriani; umyuangcautekiciu calialqa.

⁹Umyuaqiciki cat pillret ak'a tamaani; nallunairciu wiinga kiima Agayutnguciqa allamek-llu wangtun ayuqellriamek pitailucia.

¹⁰Ayagniqarraallranek qanrutkellruaqa iqugkaa; ak'a imumi pivailgan qanrutkellruaqa piarkaq. Qanellrulua-llu picirkiuranka piciurtenrilngaitniluki, ca tamalkuan piarkaulqa piciqniluku.

¹¹Calaralirnermek angutmek taisqiunga,[17] taum qakurtartun (kenriirtun) puugtuaciqaaci piciurceciiqai-llu picirkiurallrenka. Wiinga qanellrurtua, piciurceciiqaqa-llu.

¹²“Niicugnicia, niicuilngurni yugni umyuarteq'lalriani cirlakillerkaq caperrnaqsukluku.

¹³Aviucillerkaqa elpecen̄ek ukaqvaqaniraqa— yaaqsinrituq. Anirturillerkaqa pinaciariinarngaituq. Jerusalem-aaq anirturciqaqa Israel-aaq-llu takarnarivkarluki.”