Read Yupik Isaiah 47 Bible Online

Isaiah 47 - Yupik bible

Isaiah 47

¹ATANEQ qanertuq, “Babylon-aaq, atraa atanruvigpet aqumlleranek, urr'amun aqumi cailkamun. Neviarcatun ayuqellruyaaquten angutem agtuqsailkiitun, nunarpauluten ciungani cirlakumaksaunak, tau͡gaam maa-i caqaqaunritellren cimirtuq mulnganairulluten-llu! Teguarurtuten!

²Miilissuutekun mukaaliluten! Kegginarpet patua au͡g'arru! Akluten-llu assilriit yuuluki! Taqmiin qakukarluku kuiggaat qeraraqluki![18]

³Yuut tangerciqaatgen matarpet; tangerciqaatgen caunrilkumaluten kiaresngianak-llu. Wiinga akinaurciqua, kia-llu arulairrngaunii.”

⁴Tanqilriim Agayutiin Israel-aam petuiraakut— atengqertuq ATANEQ Artuqailnguq.

⁵ATANREM qanrutaa Babylon-aaq, “Aqumga nepaunak tan'germi; mat'um kinguani aterpagtenqiggngaitaatgen angayuqat nulirracetun pitaluni pirpakumalriamek tamaitni angayuqauvigni!

⁶Wiinga yuunka qenrutellruanka; yuk'enrilngurtun ayuqsagutellruanka; cirlakevkarluki-llu elpenun, elpet-llu nangtellruaten takumcukevkenaki ayagyuanringraata.

⁷Umyuarteqellruyaaquten angayuqam nulirratun ayuqerrlainarnayukluten, makut-llu umyuangcauteksuunaki qaillun-llu iquan ayuqerkaucia umyuaqsuunaku.

⁸“Niicugniu una, elpet anglaniyunqellriami, umyuartequten camun pingaicukluten pengegnailngurmi uitiivet. Qanlartuten Agayucetun angtaniluten— elpetun ayuqellriartaitniluku. Aipainrurrnayukluten umyuarteqeksaituten wall'u nangtequteknayukluku irniarpenek tamarillren.

⁹Tau͡gaam carrarmi, ernermi ataucimi, tamarmek ukuk tuciiquk. Qaillukuangerpet angalkunek-llu ikayungcaraqluten uingiutellriatun irniariutellriatun-llu ayuqliriciquten.

¹⁰“Elpenek canganaicuksaaquten assiilnguq atullerpeni; yugmun-llu tangerciigacukluten. Umyuartullerpet elisngaarpet-llu iqlutmurutaagten, elpenek-llu qanrutaqluten, ‘Wiinga Agayutnguunga— wangtun ayuqellriartaituq.’

¹¹Tau͡gaam assiitellria tuciiquq elpenun, tamatumek-llu au͡g'aricimangaituten. Picurlaun alqunaq tekiciiquq elpenun— picurlaun umyuaqeksailken.

¹²Tuunrissuuteten tamalkuita piku'urki; aturturalaavki ayagyuarraanerpenek. Pitsaqevkenateng ikayuryuaraatgen; alingevkarluki inglukesteten.

¹³Qaillun anagciigatuten ayuqucirtuastengqeng'e'rpet. Angalkurpet agyatgun ciunerkarcutulit tailuteng anirturlitgen; yuut tamakut agyanek murilkitulit, qiliit cuqtaartaita qanruquraraqluten canek elpenun piarkanek.

¹⁴“Tamakut carangllugtun ayuqeciqut, kenrem-llu ekuaciqai! Ellmeggnek-llu anirturciigaciiqut pinianek kenrem— ekualria uuqnaqsiyaagciqngan, keneq tauna maqarcen̄ani canianun aqumluni matneqvigkaunrituq.

¹⁵Catngungaitut elpenun tamakut— agyatgun ciunerkarcutulit ayuqucingcarvik'lalten ayagyuarraanerpenek. Ayagciqut unilluten piyullermeggnun, elpet-llu anirturtekairulluten.”