Read Yupik Isaiah 48 Bible Online

Isaiah 48 - Yupik bible

Isaiah 48

¹Niicugniciu man'a, Israel-aam yuini, Judah-mek kinguvalriani: Ukvernarcarilaryaaquci ATANREM atrakun agayularniluci-llu Israel-aam Agayutiinun— tau͡gaam piciuvkenaci qalartelartuci.

²Tau͡gken ucuryaggluci qanlaryaaquci tanqilriamun nunarpagmun yukniluci cacetuqutekniluku-llu Israel-aam Agayutii, atengqerrluni Artuqailngurmek ATANERMEK.

³ATANEQ qanertuq Israel-aamun, “Ak'a tamaani qanrutkellruaqa ca piarkaq; tua-i-llu alqunaq piciurcetaqa.

⁴Nallunritellruluku-llu niicuitarkaucirci, peresciigalngurtun cavigtun camasciigalngurtun-llu punernertun.

⁵Taumek kinguqvani qaillun ayuqucirkarci ak'a qanrutkellrukeka, qanrutkaqluki cat piarkat pivailgata, qanresqevkenaci agayutnguarpecen̄un tamakut pivkallruniluki.

⁶“Ciunguluku qanrutkellrenka piciqniluki piciurtellruut; piyuumiileng'e'rpeci qanerciquci tuaten ayuqluki piciqnillrenka piciurrniluki. Nutaan kitak niicetnaamci nutaranek tekitarkanek, piciurtarkat maniksaitellrenka ciungani.

⁷Watua tau͡gaam tamakut piciurcetanka; ciungani-llu waten ayuqellria piksaunani. Pillrukan, elpeci qaneryartuci nallunritellruniluku.

⁸Ukveksunailucirci nallunritellruaqa, inglulitaaryullerci ayagmek nallunaitellruuq. Taumek man'a ciungani niicecimaksaituq elpecen̄un, qanrutkumaksaunani-llu niitelluci.

⁹“Yugnek nanraumallerkaqa pitekluku, eq'uqerteng'e'rma murilkellua piunga; eq'uqertelqa nayumiqaaqa piunrirngaunaci-llu.

¹⁰Naspaallruamci kenrakun nangteqnarqellriim, qerrirlim menuircaumalauciatun kenerkun. Nallunriraqa cakarniilucirci.

¹¹Camek wiinga piaqama wangnek piteklua pilartua, atqa caunrilkuurcessngaitaqa, wall'u kina alla pillguciucessngaunaku ucurnarqucimun wiinga pikarkaugaqa, wiinga kiima.”

¹²ATANEQ qanertuq, “Niicugninga, Israel-aaq, wiinga qayagaullemni! Wiinga Agayutnguunga, ciuqliugua, nangenrulua-llu, kiima Agayutnguunga!

¹³Wiinga unatemkun piliaqellruanka nunam tusnganri, qiliit-llu saggluki. Qilak nuna-llu taisqaqamtek, egmianun tailartuk ciuqamnun.

¹⁴“Quyurrluci niicugnici, tamarpeci! Iliita agayucet pivailgan qanrutkesciigataa yugmun cucukellemnun anguyagciqniluku Babylon-aaq; tauna piciquq wiinga pisqellemtun.

¹⁵Wanguuq qanrutestellra qayagaurtellra-llu; wiinga ciuliqagtellruaqa piluaqaravkarluku-llu.

¹⁶“Canimnun taikanirluci niicugniciki qanellrenka. Ayagniqarraallranek ayaglua niicequ'urlua qalartelartua qanellrenka-llu tamalkuita piciurcequraraqluki.” (Elliin-llu Artuqailnguum ATANREM piniminek cikillruanga ayagcellua-llu.)

¹⁷Tanqilria Agayutii Israel-aam, ATANEQ anirturceci, qanertuq: “Wiinga ATANRUUNGA Agayutsi, elitnauristeci elluarrluci pisqelluci, tumkarpecen̄ek-llu apertuulluci.

¹⁸“Niisngallruciki-tuq alerquutenka! Atawaqauceci carvanirturalriatun ayuqellruyartut kuiggaartun meriucuunani. Cirlakiuralaryartuci-llu imarpiim qairi tag'arturalauciicetun cen̄amun.

¹⁹Kinguveci-llu amllepiaryartut qau͡gyatun, wiinga-llu piunriumavkayuicarluki.”

²⁰Anici Babylon-aamek, teguarunrirluci! Qalarutkiciu man'a nunaniryugluci; ellarpagmun tamalkuan, qanerluci, “ATANREM anirturaa pisten̄i Israel-aaq!”

²¹ATANREM ayagatellrani yun'i mertailngurkun meqsuaksaitellruut. Meq qurrlurcet'lallrua qiurmek; qiuq qupevkallrua, meq-llu tuaken qurrlurluni.

²²“Uitanqegcisciigatut assiitellriit yuut,” qanertuq ATANEQ.