Read Yupik Isaiah 49 Bible Online

Isaiah 49 - Yupik bible

Isaiah 49

¹Niicugnicia, yaaqvanelngurni atanruvigni, yugni yaaqvani uitalriani! ATANREM cucukellruanga yuurpailegma pisteknalua.

²Qanellrenka ipgivkallrui nuussirpagtun. Elliin nakmiin unatmikun cayailkuciumallruanga. Pitegcautetun ayuqlirivkaraanga, ipegcaumaluni atuqainaulriatun.

³Elliin-llu qanrutaanga, “Israel-aaq, elpet wiinga pistekamken; elpeggun, yuut ucurnarivkarciqaatnga.”

⁴Wiinga qanertua, “Elliinginaq wiinga calillrulliniunga! Caugarkaunrilnguq cakviurutekluku.” Tau͡gaam ukveksugngaaqa ATANEQ caliaqa anagyaaqutlerkaanek; nunulirciqaa caliaqa.

⁵Yuurpailegma ATANREM nakmikellruanga; pisteksagutellruanga yun'i ut'rutesqelluki, Israel-aam yui cekavngalriit ut'rutesqelluki. ATANREM takarnarivkalaraanga; piniqa elliinek kingunengqertuq.

⁶ATANREM qanrutaanga, “Angenrulriamek caliarkarpenek pingqertua, pistem̄aa. Pirpakumallrat Israel-aam yuinun unegtaulrianun ataam piksagucetqainarngaitan, tau͡gaam tamatumun tapqulluku tanqiuvkarciqamken atanruvignun— ellarpiim yui tamalkuita anirtuumasqelluki.”

⁷Israel-aam tanqilria Agayutii, anirturtii-llu qanertuq cakneq caunrilkumalriamun, atanruviit-llu eq'ukluku atanirturilriit-llu pistekluku; “Nunam atanrin tangerciqaatgen angicimallerpeni nangerciiqut-llu nasvagluku elpenek qigcigyullerteng; atanerruat-llu tangerciqaat, cikluteng-llu takarnarqutmek piluten.” Man'a tuaten piciquq ATANREM cucukellruaku pisten̄i; tanqilriim Agayutiin Israel-aam akqutni pinricuilamiki.

⁸ATANREM qanrutai yun'i, “Anirtuumallerkarci tekiskan, iryakciqamci niilluki-llu qayagaurutsi ikayuusqelluci. Nayurciqamci camun-llu pivkarngaunaci elpeciuggun-llu akqut'liciqua pillgutekluki tamalkuita yuut. Ataam-llu uitaviksagutelluku nunasi watua maa-i uitaviksunailengraan.

⁹Itengqalriit qanruciiqanka, ‘Itercivigmek anici!’ tan'germi-llu uitalriit, ‘Anici tanqigcetellriamun.’ Qusngitun ayuqeciqut nerelriatun qemini;

¹⁰kaigngaitut meqsugngaunateng-llu. Akertem nunam-llu mer'ilnguum puqliin akngirrngaitai, takumcukestiita ciuliqagciiqngateng. Ciuliqagciiqai mer'et ulvelriit nunaitgun.

¹¹“Tumyariciqua ingrit aturluki uplua-llu tumyaramek yum'a egilervigkaatnek.

¹²Yuunka taiciqut yaaqvanek, negeqvamek kanaknermek-llu, Aswan-aamek-llu[19] ungalalirnermek.”

¹³Aturpagci nunaniryugluci, qilagni, Qayagpii nunaniryugluten, nunami! Ingrit-llu aturpaglit! ATANREM qarutarkaungaki yun'i; takumcukluki nangteqellratni yun'i.

¹⁴Tau͡gaam Jerusalem-aam yui qanertut, “ATANREM wangkuta cakaaraakut! Nalluyagutaakut.”

¹⁵Tau͡gaam ATANEQ waten kiuguq, “Arnam-qaa irniani aamareskengani takumcukevkenaku nalluyagucugngaa? Aanaulriim irniani nalluyagutengraaku, wiinga nalluyagusngaitamci.

¹⁶Jerusalem-aaq, wiinga nalluyagusngaitamken! Tumamnun igautellruamku atren.

¹⁷“Ataam nautestekaten tekitniarartut, ayagarkaurtut elpenek navgurillret.

¹⁸Kiarrluten tangaagiki makut qaillun pilriit! Yut'en quyurtengut—kingunermeggnun utertut! Unguvalriarulua Agayutngucimtun, ucuryagutekciqaten yut'en, kassuutnerraralriim arnam ucuryagucilauciatun tangnircautminek.

¹⁹“Nunan navguumallruuq yuirulluni-llu— tau͡gaam yuut uitayarturluteng tamaani tailriit piviilkessaguciiqaat. Navguumalrianun-llu unicestelci uitavigpeci yaaqsikiini uitaciqut.

²⁰Yugpet-llu teguarullermeggni yuurtellret iliini qanruciiqaatgen, ‘Nuna man'a piviirutuq, pivigturikaniisqumayaaqerput uitavigkamten̄ek!’

²¹Umyuarpegun-llu qanerciquten: ‘Kia makunek yugkitanga? Irnianka nangluteng tuqullruut allanek-llu irniangesciigani. Nunamnek ayagcecimallruama— kia makut mikelnguut anglicalqaki? Kiimellillruyaaqua unitellratni— naken makut mikelnguut taigat?’”

²²ATANEQ Agayun waten qanertuq yum'inun: “Atanruviit qanruskumteng, irniaci ut'ruciiqait.

²³Nunam atanri; nulirrita-llu irniaqellriatun pitarrluci piciqaiceci. Ciktelarciqut ciuqerpecen̄un qigcigyugluteng elpecen̄ek; tuaten pikata nallunrirciqerci wiinga ATANRUCIQA; ikayuusqelluteng-llu wangnun utaqalgilriit qacuvallagngaunateng.”

²⁴Teguiyugngaan-qaa anguyagta aklunek uayaaqengallrinek? Teguari-llu-qaa nangcitulim atanrem aviucugngaaten?

²⁵ATANEQ waten qanertuq, “Ilumuulriamek tuaten ellirarkauguq. Anguyagta teguarinek allurrluku, nangciluni-llu atanirturilriim tegukengallri teguluki. Callulriit elpecen̄ek callugciqanka, irniaci-llu anirturluki.

²⁶Elpecen̄ek nangcilriit tuqurquceciiqanka; taangiqellriatun ayuqluki tuqurqutelluki. Yuut-llu tamarmeng nallunrirciqaat ATANRUCIQA, anirturilria elpecen̄ek teguarunrirtelluci. Nallunrirluku Israel-aam yuinun Artuqaunii Agayutkuciqa.”