Read Yupik Isaiah 5 Bible Online

Isaiah 5 - Yupik bible

Isaiah 5

¹Niicugninga atuutellemken mat'umek yuarutmek, apallurluni yugnikestemnek naucetaarvianek-llu wine-arkanek atsanek. Wiinga yugnikek'ngaqa naucetaarvingqellruuq wine-arkanek naungignarqelriamek nunalegmi qemimi.

²Nuna elagaa teggalqut-llu au͡g'arluki; nauceciiluni-llu assinkacagarnek wine-arkanek. Pililuni-llu nayurvigmek naucetaarvik nayurnaluku, elagluni-llu mecuirvigkamek. Utaqaluni-llu wine-arkat atsat arullerkaatnek, tau͡gaam tamarmeng wine-arkat atsat cungarninarqut.

³Taumek waten yugnikek'ngaqa qanertuq, “Elpeci yugni uitalriani Jerusalem-aami Judah-mi-llu, cuqcikuk wiinga naucetaarvika-llu wine-arkanek atsanek.

⁴Camek-qaa pinarqelriamek naucetaarvik pillrunritaqa? Ciin tua-i naugia cungarninarqelrianek wine-arkanek atsanek, assilrianek neryuniurutkellemnek pivkenani?

⁵“Waten piarkaurtaqa naucetaarvika atsanek wine-arkanek: Au͡g'arciqaqa casgua, navgurluku-llu qacarneq iteryailkutii, ungungssiarnun nerevkarluku tutmautelluku-llu.

⁶Naunerrlugnun nauvkarciqaqa. Kepliarngaitanka naungigcarluki napayagaat itumteksaunaku-llu nuna; cukilananun tau͡gaam nauvkarciqaqa. Amirlut-llu alerqurluki tuavet ellalliisqevkenaki.”

⁷Israel-aaq naucetaavikaa Artuqailnguum ATANREM; Judah-m yui napayagaugut elliin nauceciillri. Neryuniullruuq assilriamek calinayukluki, tau͡gaam ellait tuquciut. Neryuniuryaaquq-llu piciulriamek atullerkaatnek, tau͡gaam nangtaarit qayagaurtut nangtenriisqelluteng.

⁸Elpeci aarnarqelriamek ciunerkangqertuci! Kipulluci ilaluki allanek enenek naucetaarvignek-llu ilakaitnek ak'a piksagutellerpeci. Atataarqu allat yuut uitavigkairuciiqut, elpeci tau͡gaam kiivci uitaluci nunami.

⁹Wiinga Artuqailnguq ATANEQ niitellruaqa qanertelluku, “Tamarmeng makut angelriit, enekegtaaraat yuunateng imumaciqut.

¹⁰Wine-arkat napayagaat naulriit tallimani cuqnerni nunami unangeciqut kiingan tallimanek gallon-aanek. Qulen cuqneret (bushels) naucetaarkat ataucimek tau͡gaam cuqnermek unangeciqut.”

¹¹Aarnarqelriamek ciunerkangqertuci! Unuakuarmi maktelartuci mer'analuci, atakumi-llu pegg'alartuci taangarluci.

¹²Nerevkariaqavci ayuqenrilngurnek aturcetaangqelartuci; wine-aq-wa. Tau͡gken taringesciiganaku caliara ATANREM,

¹³taumek ayaucimaciquci itertauluci. Ciuliqagceci tuquciqut paluluteng, yuunginaat-llu meqsuum ugaani tuquluteng.

¹⁴Tuqumalriit nuniita piyugai kailriatun, aitarterpagluni. Iglarai yuut piuranrit Jerusalem-aami, tapqulluki neplirluteng quyungqalriit yuunginaat.

¹⁵Tamarmeng caallukumaciqut, tamarmeng-llu ucuryagtellriit caunrilkumaciqut.

¹⁶Tau͡gaam Artuqailnguum ATANREM angtacini nasvalaraa piciulria aturluku, nasvagluku-llu tanqilriarucini cuqcillermikun yum'inek.

¹⁷Nunarpiit imenritni qusngiyagaat canegnek nerlarciqut qusngirngalnguyagaat-llu neqkangqerciqut tamaani.

¹⁸Aarnarqellriamek ciunerkangqertuci! Elpeci assiilngurpecen̄ek allakarciigatuci.

¹⁹Qanertuci, “ATANREM cukamek pikiliu ca qanrutkellni piarkauniluku, tangerrniarput. Tanqilriim Agayutiita Israel-aat picirkiurani piliki; umyugaa tangerrniarput.”

²⁰Aarnarqelriamek ciunerkangqertuci! Qanlaavci assiilnguq assilriaruniluku assilria-llu assiilnguuniluku. Tan'geq tanqiurtarci, tanqik-llu tan'gerurrluku. Qatlinarqelria neqnirqelriarurtarci, neqnirqelria-llu qatlinarqelriarurrluku.

²¹Aarnarqelriamek ciunerkangqertuci! Umyuartuyukluci umyuarteqngavci.

²²Aarnarqelriamek ciunerkangqertuci! Anagngastailngurni wine-amek meraaqavci! Alingunaci merkiulaavci avukluki merkat.

²³Akilirtelluci pinarqelriit angitelaraci, pinarqenrilnguut tau͡gken pinarqelriaruvkarluki.

²⁴Taumek watua, can'get qungalauciicetun ekualuteng-llu kenermi, acilquci aruciqut naunraci-llu kinerciqai tenglluki-llu, tua-i-wa qessakngavciu Artuqailnguum ATANREM, Israel-aat tanqilriim Agayutiita, elitnaurutkellra wangkutnun.

²⁵ATANREM qenrutai yun'i unatni-llu yaggluki iqutai, ingrit-llu arulaluteng; temait tuqullret uitaciqut tumyarani ciqitartun. Tau͡gken tuani cali ATANREM eq'uqertii iquklisngaituq, unatni cali yagingiimiu.

²⁶ATANEQ elucira'artuq qayagauresqelluki yaaqsilriit atanruviit. Kukumyara'arluni taisqai nunam iquinek. Maa-i-llu taigut, cukaluteng!

²⁷Taqsuqellriamek, paallagalriamek-llu ilaunateng. Qavaraksaunateng qavaqsaunateng-llu. Naqugutait cagnialngurmek ilaitut; aluilitaita-llu cingiit kevkaringavkenateng.

²⁸Pitegcautait ipegtut, urluvrit-llu qelumaluteng. Horse-aarita cetumqurrit teggalqutun teggelriatun ayuqut, ayagassuutait-llu akalrialget uivluteng ull'uyatun.

²⁹Anguyagtet uirraniluteng yugtutulitun tuqucinrralriatun ungungssiarmek ayaulluku-llu allurcesciunritlerkameggnun.

³⁰Erneq tauna tekiskan, uirraniciqait Israel-aat imarpiim ellerrartellratun qastutaluteng. Tangerciu man'a nuna! Tan'gercen̄ani nanikuanaqluni! Tanqik igumaluku tan'gerem.