Read Yupik Isaiah 51 Bible Online

Isaiah 51 - Yupik bible

Isaiah 51

¹ATANEQ qanertuq, “Niicugnicia, elpeci anirtuumayulriani, wangnun tailalriani ikayuusqelluci. Umyuaqiciu teggalquq nauvillerci, taum-llu teggalqum uitavillra.

²Umyuaqiciu Abraham-aaq, ciuliarci, umyuaqluku-llu Sarah, elliinek kinguvalriaruavci. Qayagaullma nalliini Abraham-aaq, irniaritellruyaaquq, tau͡gaam wiinga atawaqaasqellruaqa irniangevkarluku-llu, kinguvri-llu naaquciirucelluki.

³“Jerusalem-aaq takumcukciqaqa yuut-llu imenrini uitalriit. Nunii naugisciigalnguullrungraan, naucetaarviurciiqaqa, Eden-aami naucetaarvilillrucimtun. Nunanirqeciquq angnirnaqluni-llu tauna, aturpagaciqut nanrarlua quyauviklua-llu.

⁴“Niicugnicia, yumaa, niicugniciki qanellrenka: Yuunka ayuqucirtuutekaitnek cikirciqanka; alerquutenka-llu tanqiutekciqait.

⁵Egmian tailua anirturciqanka; cirlakillerkaqa ukaqsigian. Wiinga tungaunii atanirturciqanka atanruviit. Yaaqvanelnguut nunat utaqaat taillerkaqa; neryuniurutekluku wangnun anirtullerkarteng.

⁶Ciuggluci qiliit kiarciki; nuna-llu cali tangaaluku! Qiliit aruvagtun catairuciiqut; nuna-llu nangciquq ak'allatun aturatun, yui-llu tuquaciqut ciivagtun. Tau͡gaam wiinga anirturiyaraqa nangengaituq; aviucilqa-llu iquklisngaunani.

⁷“Niicugnicia, piciulriim nallunritestaini, ayuqucirtuutma-llu avaliqestaitni ircaqurpecen̄i. Alingeksaunaci yuut kasnguyugcetaangraiceci caunrilkuurluci tuaten;

⁸Tangruunrirciqut aturatun ciissit 'lumarrartutulit nerellracetun! Tau͡gaam wiinga aviucilqa piugarkauguq akwarpak; anirturiyaraqa-llu piugarkauluni kinguveqellrianun tamalkuitnun.”

⁹Tupagluten, ATANEQ, ikayurkut! Pinin aturluku anirturkut; ak'a ciuqvani pilallrucirpetun. Nauwa elpet kepullruan imarpigmi ciissirpak Rahab-aq[20] ciqumlluku.

¹⁰Elpengullruuq imarpiim kinercecestellra tumyariluten-llu mer'em akuliikun, elpet anirtuq'ngaten tamaaggun qeraasqelluki.

¹¹Anirtulten tekiciiqut Jerusalem-aamun angnirluteng, aturluteng qayagpagaluteng-llu nunaniryugluteng. Angnirciqut-llu akwarpak, angniitnarqellriamek iluteqnarqellriamek-llu nalluluteng.

¹²ATANEQ qanertuq, “Wanguuq pinirivkartek'lallerci. Caulriaci alikelarceciki yuut tuquarkaungraata, canegtun piunrirarkatun ayuqellriit?

¹³Nalluyagutarci-qaa ATANEQ piliaqestellerci, nengcetellrat qiliit nunam-llu tusnganerkiurtellra? Ciin tua-i yuuqatarceci alingurluci unuaquaqan qenrutaitnek nangtestevci, taukunek piunrirnaluci upingalrianek? Qenerteng'e'rmeng agturngairutaaci.

¹⁴Itengqalriit ak'anun pivkenaki anevkaumaciqut; unguvamaciqut kaigngaunateng-llu.

¹⁵“Wiinga ATANRUUNGA Agayutsi; imarpik wiinga uitanrircet'laraqa qairvagcelluku-llu. Wiinga atengqertua ATANEQ Artuqailnguq!

¹⁶Sagtellruanka qiliit nuna-llu tusngavigkiurluku; Jerusalem-aaq-llu waten qanrulluku, ‘Elpeci wiinga yuk'amci! Ayuqucirtuutemnek cikillruamci, Cayailkuciumaluci-llu unatemnek.’”

¹⁷Jerusalem-aaq, tupii! Segg'angcarluten makten! Mellruuten saskamek anucimirqecetaarutmek imalegmek ATANREM eq'uqerrluni elpenun cikiutellranek mer'esqelluku; mellruan, ayaluavkaraaten-llu.

¹⁸Ciuliqagcestekaituten, yugpet-llu iliitnek tass'uqestekaituten.

¹⁹Malruk arenqiallugnarqellriik tuc'amek elpenun: anguyagkun nunan uitavigkarniirulluni, yut'en-llu palualuteng. Kitumek pitaituq takumcukestekarpenek.

²⁰Tumyarat kassugutellratni yut'en iquagut cirlaum ugaani piniarulluteng; tuntutun pissurtem̄eng pissuutainun napingalriatun ayuqliriluteng. Tuaten piluteng naspetaat Agayutem eq'uqertiin tuknitacia.

²¹Jerusalem-aarmiuni nangteqellriani, ayalualriani taangiqellriacetun,

²²ATANREM Agayutevci anagyaaqulluci qanertuq, “Saskaq au͡g'aqatarqa eq'uqertellemni cikiutekelqa elpecen̄un. Wine-aq merngairutarci ayaluavkartellerci.

²³Cikiutekciqaqa nangcestevcen̄un, iqurqesteklerpecen̄un tumyaranun tutmautnaluci-llu marayatun pitarrluci.”