Read Yupik Isaiah 52 Bible Online

Isaiah 52 - Yupik bible

Isaiah 52

¹Jerusalem-aaq, piniri ataam angliri! Tanqilria nunarpiini Agayutem, aturanek ucurnarqelrianek at'en! Agayumanrilnguut itenqiggngaitut ikirtuqerpegun.

²Teguarullerpenek angiten elpenek, Jerusalem-aaq! Nangerten urr'amek aqumluten-llu atanruvigmun aqumllerpenun! Angiciki kalivneret qillrutaci, teguarulriartaini Zion-aam!

³Waten qanran ATANEQ, “Teguarurtellerpecen̄i, akilirluci pillrunritaiceci; tuaten-llu akiinaci angicimaciquci.

⁴Ayallerpecen̄i Egypt-aamun uitaqernaluci, umyuarci aturluku pillruuci; Assyria-m, tau͡gaam, umyuarci aturcetevkenaku tegullruaci akimek qanerpek'nani.

⁵Tuamta-llu cali tuaten ayuqellria Babylonia-mi pillruuq: teguarurrluci, akiliutaunaci. Atanirturceci ucuryagtelartut ellmeggnek tuaten nanrarluteng taqsuunateng-llu caunrilkuuraqlua wiinga.

⁶Kinguqvaarni nallunrirciqerci wiinga Agayutnguciqa qalartelallruciqa-llu elpecen̄un.”

⁷Assirpagta tanglleq qaneryaramek taitellriamek ingrit tevuraluki, tailluni qaneryaraqegtaarmek, uitanqegciluta yuullerkamten̄ek! Qanrutkaa cirlakillerkarput qanrulluku Zion-aaq, “Agayuten ATANRUUQ!”

⁸Nunarpiim qaunqestai qayagpagaut, pillgutekluteng nunaniryugluteng qayagpagaut, Tungaunaku tangrramegteggu utertellria ATANEQ Zion-aamun.

⁹Qayagpagaci nunaniryugluci, imenrini Jerusalem-aam! ATANREM aviutarkaungaku nunarpani qarulluki-llu yun'i.

¹⁰ATANREM tanqilria pinini aturluku; anirturciqai yun'i ellarpiim-llu tamarmi tangerciqaa.

¹¹Pinritevkenaci ayagniartuci Babylonia-mek, Agayuviim akluin ayagatestaitni. Inerquusngalriit agturyaqunaciki;[21] menuurcaaqevkenaci elpecen̄ek piniartuci nutaan-llu ayagluci.

¹²Maa-irpak cukangnaqevkenaci ayagciquci; qimagluci pingailavci. ATANREM Agayutevci ciuliqagciiqaaci, camun-llu pivkarngaunaci.

¹³ATANEQ qanertuq, “Pisteka piluaqerciquq caliamini; cakneq-llu ucuqumaciquq.

¹⁴Amlleret yuut tangllermeggni tatamut, tangnerrlugnaqngan yuuciinani.

¹⁵Tau͡gaam maa-i amlleret atanruviit yuita alangaarutkeciqaat, atanret-llu qanerkaiciiqut alangaam ugaani. Qanrutkumaksailnguq ellmeggnun tangerciqngamegteggu, niiteksailkesseng-llu ayuqucingluku.”