Read Yupik Isaiah 53 Bible Online

Isaiah 53 - Yupik bible

Isaiah 53

¹Yuut kiugut, “Kia-kiq ukveksallruagu maa-i qanrutkek'ngarput? Kia-llu-kiq umyuartequcallruagu man'a ATANERMUN caliaqnayukluku?

²ATANREM pisqutkellrua pisten̄i nausqelluki naugaartun acilqungelriatun kinertellriami nunami. Ayuqucimikun takarnarqutaitellruuq wall'u kenegnarqutaunani wangkutni nangrunaunani, ayarikluku-llu piksuumikarkamten̄ek piinani.

³Yuut caunrilkaat qessakluku-llu; angniinani yuuluni, iluteqsaram-llu ayuqucia nalluvkenaku; yuut tangerrsuumiitellriatun ayuqut'laraat caunrilkumaluni caunrilngurtun-llu ayuqucimaluni.

⁴“Tau͡gken elliin nangtequtekaqsalput engellugtuutekaqsalput-llu atullrui. Wangkuta tau͡gken umyuarteqluta nangteqellrani Agayutmun tuaten pivkaryukluku anucimirqecetaarluku.

⁵Tau͡gaam ellii kiliumallrulliniuq assiilnguput pitekluki; qiurqumaluni-llu inerciigalucirput pitekluku; kaugtuarumallermikun tamalkuurcetaakut, qiunrikun canrircecimaluta.

⁶Wangkuta-llu tamamta qusngitun iqlutmun ayallruukut, umyuarput aturluku. ATANREM-llu wangkuta anucimirqecetaarutkaqsaaqellerput elliinun aturtelluku.

⁷“Umyuamikun ayuqucimikun-llu nangcimanger'mi camek qanqallrunrituq. Qusngiyagartun tuqucimallerkaanun ayautengraatni, qusngitun-llu kepliartekami tegulangraatni nepaitelauciicetun, qanqallrunrituq.

⁸Teguamegteggu pinarqelriarunirraarluku tuqucimallerkaanun ayautellruat, kia-llu umyuarniurutkellrunritaa ciunerkaa. Tuqucimaluni wangkuta yugni assiilnguput pitekluki.

⁹Qungumun-llu ellillruat assiilngiumalrianun ilaliulluku, tungmagcimaluni tukuulrianun ilaulluku, assiitellriamek atuqsailengraan iqluuqsaunani-llu.”

¹⁰ATANREM-llu elliin pisqutni aturluku nangteqevkallrua; cikiutekluni ellminek tuqullrakun yuut aug'aricimaarkaurtesqelluki. Taumek elliin tangerciqai kinguveni; unguvamaciquq, wiinga-llu piyulqa elliikun piciurtarkauluni.

¹¹Nangteqlermikun caliallni tangerquniu angnirciquq; nallunriciiqaa elliinginaq nangteqellrunrilucini. Wiinga tengrurrlainatulim pistem̄a ilukegcitek'ngama, aturciqaa yugugaat anucimirqecetaarutkaat ellii-llu pitekluku wiinga au͡g'ariciiqanka.

¹²Taumek wiinga quyilriamek pingevkarciqkeka, ilalirluki quyilriit ellmaaraunrilnguut. Elliin unguvani qunukevkenaku cikiutekngaku assiitellriit yuut ciunerkaat aturluku. Amlleret assiilngiumalriit atu'urkaat elliin aturluku piicaulluki tuaten au͡g'aricimasqelluki.