Read Yupik Isaiah 54 Bible Online

Isaiah 54 - Yupik bible

Isaiah 54

¹Jerusalem-aaq, irniangyuilngurtun ayuqellruyaaquten, Tau͡gaam maa-i atuqina qayagpagaluten-llu nunaniryugluten. Irnialinruarkaurcavet arnami uituumalriami.

²Pelatekaq uitaviin angtucarru; ilavkui taktucarluki quliari-llu asvaiqcarluki!

³Nunautevci engelai elaqvaqanirciqaci; nunauteklerci ataam tegukuvciu allanek yungqelleq man'a engelkarrluku. Nunarpiit mat'um ciungani yuitelallret yiilarciqaci.

⁴Alingevkenaci— kiaresngiacecimanqiggngailavci; kasnguyugcecimanqiggngaunaci. Umyuaqenrirciqan allaliullren uingnerrallerpeni, alianiulallren-llu cakneq aipainrurtellerpeni.

⁵Piliaqestellren uingulriatun ayuqeciquq elpenun— atqaa Artuqailnguq ATANEQ. Tanqilriim Agayutiin Israel-aam anirturciqaaci— ellii ellarpiim atanirturtekaa.

⁶Israel-aaq, uingnerraralriatun ayuquten, uingan uniskiicetun ciunerkairutellriatun. Tau͡gaam ATANEQ ataam ullaasquq elpenun qanerluni:

⁷“Ellmaarmek unisngaqallruamken; kenkekanirluten ataam teguciqamken.

⁸Umyuaqa assiircan qenqerrlua unisngaqallruamken, tau͡gaam wak'nirnek taqsuunii kenkiciqa elpenek nasvaumaciqaqa.” Tuaten qanertuq ATANEQ anirturten.

⁹“Noah-m nalliini akqillruunga nuna ulerpanqigcetarkauvkenaku. Waniwa-llu akqiunga qenrutenqiggngaitamci; nunurngaitamci wall'u anucimirqecetaanqiggngaunaci.

¹⁰Ingrit qemit-llu elavngariciqsaaqut, tau͡gaam wiinga kenkilqa elpecen̄ek iquklisngaituq; akqutkelqa-llu uitanqegcivkararkauniluci akwarpak piuvkarciqaqa.”

¹¹“Jerusalem-aaq, nangteqellriatun casciigalngurtun qarutestekailngurtun-llu ayuqluten nunarpauguten, wiinga tau͡gaam tusnganerkiurciqamken teggalquqegtaarnek.

¹²Nayurviliciqamken teggalquqegtaarnek ruby-nek, ikirtuqiluten-llu teggalquneq kenertun ciqinqatulinek, qacarneliluten-llu kassuggluten teggalquqegtaarrlainarnek.

¹³“Wiinga-llu tungaunii yut'en elitnaurciqanka yuuvkarciqanka-llu nuuqicecuunaki uitanqegcivkarluki-llu.

¹⁴Elluaryaram piciunrem-llu pinirivkarciqaaci. Nangtaunqiggngairulluci alingniunqigngaunaci-llu.

¹⁵Anguyakunegceci, wangnek cingumastaunateng piciqut; nakukesteci-llu piugarkaunrirluteng.

¹⁶“Wiinga piliaqellruaqa caviliurta, kenermek kumarcilartuq cavik unaircarluku caskulilartuq. Anguyagta-llu cali piliaqellruluku, caskut aturluku tuqurqilartuq.

¹⁷Tau͡gaam elpeci caskum akngirrngaitaaci; picetaaruskaceci-llu kiucirkailngaunaci. Wiinga pistenka anagyaaquciiqanka cirlakivkarluki-llu.” Waten ATANEQ qanertuq.