Read Yupik Isaiah 56 Bible Online

Isaiah 56 - Yupik bible

Isaiah 56

¹Waten ATANEQ qanertuq, “Elluaruciq tegumiaqiciu, piciuneq-llu aturluku, tamaa anirturciqngamci.

²Atawaqerceciiqanka Sabbath-aam ciumurutestai, menuurteksaunaku, assiilngurmek-llu atuqsaunateng.”

³Allanrem ilaksagutellrukuniki ATANREM yui qanenrilkili, “ATANREM yun'i ilalirluki agayuvkalarngaitaanga.” Angun-llu iguugiumalria watqapik umyuarteqenrilkili irniangesciigalami, ilausngasciigacukluni Agayutem yuinun.

⁴ATANEQ tuaten ayuqelriamun qanertuq, “Kevgiuquvnga Sabbath-aam atullrakun, calian-llu ilukegcinarqekan wangnun, piciuluten-llu akqutka tegumiaqekuvgu,

⁵atren neq'akumaciquq Agayuvigpamni yumni-llu qetunrangqellerpet paningqellerpet-llu pinranek. Watqapik nalluyagucimangaituten.”

⁶Cali ATANEQ qanertuq allanernun ilautellernun yum'inun, kenkestem̄inun kevgiurtem̄inun-llu, Sabbath-aam-llu atulartainun, piciuluteng-llu akqutmi tegumiaqestainun:

⁷“Wiinga ayauciiqamci Zion-aamun, qigcignarqelriamun ingrimnun,[22] angnimek imangqertelluki enemni piicagvigmi, ciuniuraqluki-llu ekuagarkat elliitelci ekuavima qaingani. Wiinga Agayuvigpaka aterpagcimaarkauguq piicalarvigkaatnek tamarmeng atanruviit yuita.”

⁸Artuqailnguq ATANEQ, ut'rutestellrat yum'i Israel-aat nunameggnek ayagcecimallratnek, akqillruuq allanek cali yugnek taivkariciqniluni ilakaitnek.

⁹ATANREM allat atanruviit yuit taisqai ungungssitun yuilqurmiutartun yun'i neresqelluki.

¹⁰Ellii qanertuq, “Tamarmeng ciuliqagtet, aarcirturiarkauyaaqellriit yumnek, cikmiumaut! Cat tamalkuita nalluluki. Qimugtetun murilkestetun ayuqut qiluyuilngurtun taklaluteng qavangurtualuteng. Qavaryunqeggluteng.

¹¹Qimugtetun camircesciiganateng nerrsaagturalriatun ayuqut. Ciuliqagtet ukut taringumanritut. Umyuarteng aturluku ellmeggnek arcaqakluteng.

¹²‘Tailuci wine-amek aqvatnaurtukut,’ ukut taangaryunqellriit qanertut, ‘mer'aniartukut aqsiluta! Unuaqu erneq assinruarkauguq qak'mumi ernermi!’”