Read Yupik Isaiah 57 Bible Online

Isaiah 57 - Yupik bible

Isaiah 57

¹Ellualriit yuut tuqulartut, tau͡gaam kina imna taringumanrituq cangalliurutkevkenaki-llu. Tau͡gaam tuquaqata, nangteqnarqelriim pisciigalilarai.

²Elluarrluteng yuullret uitanqegcitmek mernuinercillerkameggnek-llu pinglartut tuquaqameng.

³Taici wavet cuqcimallerkarpecen̄un, assiilngiumalriani! Cangallrunrituci angalkuni, akusrarutekilriani akissuni-llu.

⁴Kina anglanitekseciu? Kina-llu elpeci iqlungalriani caunrilkuurceciu?

⁵Akusrarutekiluci agayulartuci agayutnguarpecen̄un napat qigcikek'ngarpeci aciatni. Elliitek'laraci irniaci ekuagarkauluki teggalqut qerranqurritni kuiget caniatni.

⁶Tamaaken-llu teggalqunek manigcetellrianek avurraarluci agayucetun pitarrluki agayuaqluci. Wine-amek-llu kuvluki elliigaqluci tamakunun, payugtaqluki-llu mukaarkanek elliitekluki. Umyuartequci-qaa makut tamalkuita wangnun ilukegciteksukluki?

⁷Ayalartuci-llu qertulrianun ingrinun tamaani tuqutarkanek ekuagiluci elliinaluci arniurnaluci-llu.

⁸Napartelaraci-llu tun'ernarqelriit agayutnguaci amiigpeci ilulirneritnun. Wiinga-llu catkevkenii; arnarkarpecen̄ek akilirluki pirraarluci, matarrluci inglerpecen̄un inartelartuci kenkuurtevcen̄ek aipirluci. Aglumallerci-llu cupuirluci aturluku tuani.

⁹Tepkegcarluci uqumek-llu minguggaarluci agayuyartulartuci agayutnguamun Molech-aamun. Yuaresqelluki agayutnek, ayagcecilartuci kevganek yaaqvanun, tuqumalriit-llu nunakengraatgu, agayunaluci tamakunun.

¹⁰Taqsuqcilartuci yuaraluci allanek agayutnek, tau͡gken yuarallerci qacuiyuunani. Umyuarteq'laavci umyualngunarqellrianun agayutnguarpecen̄un pinirivkalaryukluci, taumek taqsuqengyuilnguci.

¹¹ATANEQ qanertuq, “Kinkuulriameng makut agayutet alingevkalartaceci, iqluulangevkarlua nalluyagutqapigtellua-llu? Takaqenrirarpecia-qaa ak'anek qaneqsailama?

¹²Elpeci umyuarteqsaaquci piciulria aturyukluku, tau͡gaam wiinga nasvagciqaqa ayuqucirci, agayutnguarpeci-llu ikayurciigaciiqaiceci.

¹³Qayagauquvci ikayuusqelluci, agayutnguarpecen̄un ikayurteskici! Anuqsaaraam ayauciiqai. Wangnek tau͡gaam cacetuqutekilriit uitaciqut nunami wangnun-llu agayularciqut Agayuvigpamni.”

¹⁴ATANEQ qanertuq, “Yuunka uterceciki wangnun. Au͡g'arluki avirautellriit tumkaatnek! Tumyarici upingariluku-llu.

¹⁵“Wiinga quyilriaruunga tanqilria Agayun, nangyuilngurmek unguvalria. Uitavingqertua quyilriamek tanqilriamek, tau͡gaam cali uitaaqlua ellmeggnek pivakenrilngurni, umyuarnayagucilriani-llu, ataam piyuumingesqelluki neryuniurut'ngesqelluki-llu.

¹⁶Wiinga yuunka unguvamek cikillruanka, pinarqellriaruniluki piurngaitanka qenruqu'urngaunaki-llu kesianek.

¹⁷Wiinga qenrutellruanka assiilnguit pitekluki, taumek anucimirqecetaallrukenka cakaarluki-llu. Tau͡gaam pamatekellrunritaat tuaten pingramteng ayuqucirteng-llu cakanirpek'naku.

¹⁸“Tangvallruaqa qaillun ayuquciat, tau͡gaam wiinga canrirceciiqanka. Ciuliqagciiqanka ikayurluki-llu, angniilnguut-llu qaruciiqanka.

¹⁹Uitanqegcitmek tamalkuita yuut cikiryuumaanka, canimelnguut yaaqsilriit-llu! Wiinga yuunka canrirceciiqanka.

²⁰Tau͡gaam assiilnguut yuut uitasciigalngurtun imarpigtun ayuqut, qailirturalriatun, kiituani iluvautelartut qairi caarrlugnek marayamek-llu.

²¹Uitanqegcitkaitut assiilngiumalriit yuut.”