Read Yupik Isaiah 58 Bible Online

Isaiah 58 - Yupik bible

Isaiah 58

¹ATANEQ qanertuq, “Qayagpaga qastutacirpetun! Qanruski yuunka Israel-aat assiilnguitnek!

²Agayulartut wangnun erenret tamaita, qanerluteng piciryaranka nallunriryugluki alerquutenka-llu aturluki. Cali-llu qanerluteng wangnun cikiisqelluteng ellualrianek alerquutnek tengrukniluku-llu agayullerteng wangnun.”

³Yuut aptut, “Ciin wangkuta yagciqseta ATANREM catkenrilkaku? Ciin-llu nerenrilkurciiqseta murilkenrilkakut?” ATANEQ qanertuq ellaitnun, “Tua-i-wa elpeci yaallerpeci nalliini, piyullerci aturluku pilaavci nanglluki tuaten calisteci.

⁴Yaagaqavci mulngakenrilartuci nakukulluci, qanllerpeciuggun inlukulluci callualuci tuaten. Umyuartequci-qaa tuaten yaakuvci piicallerci niitnayukluku?

⁵Yaagaqavci, elpecen̄ek nanglluci pilartuci; qamiquci puteggluki canegtun, curirluci-llu missuullernek qamllermek-llu. Elpecen̄i-qaa tuaten yagyarauguq? Umyuartequci-qaa ilukegcivkalaryuklua tuaten piaqavci?

⁶“Waten ayuqelriamek yagyaramek wiinga piyugtua: Nangcinrirluci, elluaryaraq aturluku yugnun tamalkuitnun, nangcimalriit-llu angilluki.

⁷Avgulluki kailriit neqkautevcen̄ek uitavigkailnguut-llu arrsaulriit nevcen̄un kelgaqluki. Cikirluki atu'urkaitnek pikailnguut, tungayaci-llu ikayuryuumiiteksaunaki.

⁸“Nutaan piluaqaasqutka ciqinqerniartuq elpecen̄un akertetun pitqerraalriatun, kilineci-llu mamngigiluteng. Nayurrlainarciqamci anirturyuumarrlainarluci; nayurrlainarciqngamci-llu kassugusngaluci camun pivkarngaitamci.

⁹Piicakuvci, kiuciqamci. Qayagauraqavcia, niitaqluci. “Nangcinriquvci, caunrilkinrirluci, assiilngurnek-llu qanenrirluci;

¹⁰kailriit nerevkalaquvciki nuuqitellriit-llu cikiraqluki, nutaan tan'geq avatevcen̄i tanqiurciiquq erenrem qukallran tanqiatun pitariluni.

¹¹Wiinga-llu ciuliqagterrlainarciqamci nuuqiceteksaunaci-llu assilrianek. Pinialivkarngaitamci naulluuvkaqsaunaci-llu. Naucetaarvigtun ayuqeciquci mermek nuryugcinrilngurtun, ulvelriatun mertun kinyuilkiitun.

¹²Yugpeci ataam nauciiqait ak'anun imumallret, nautaqluki ak'allat tusnganret aturluki. Qanrutkelarciqaiceci-llu elpeci naparcilriarullruniluci nunarpiim casguanek, enenek-llu nunarpiim iluanelngurnek.”

¹³ATANEQ qanertuq, “Qigcikekuvciu Sabbath-aaq caliksaunaci-llu elpeci pikarpecen̄ek tuani ernermi; pirpakekuvciu erneqa tanqilria qigcikluku-llu natmun ayaganritlerpeciuggun, wall'u caliarpecen̄ek uitallerpeciuggun, wall'u ellmikuulrianek qanaanritlerpeciuggun,

¹⁴nutaan angniutekciqerci kevgiullerci wangnek. Takarnariciqamci ellam iluani, nunaksaguciiqerci-llu nuna cikiutekelqa ciuliarpecen̄un Jacob-aamun. Wiinga, ATANEQ, qanertua.”