Read Yupik Isaiah 59 Bible Online

Isaiah 59 - Yupik bible

Isaiah 59

¹Umyuarteqsaqunaci ATANEQ cirlaungan anirturciigacukluci wall'u niiteksaicukluci niicuilan qayagauraqavci ikayuusqelluci!

²Assiilngurpeci niitesciigatevkalaraaci. Capkucilaraici Agayutmek agayuaqavci elliinun.

³Pinarqellriaruluci iqluuryullerpeciuggun, pileryagayullerpeciuggun, tuqucilallerpeciuggun-llu.

⁴Apqaurvigmun pilaryaaquci, tau͡gaam elluaturqeksaitelartuci. Piciunrilnguut iqluurutet aturluki qalliungnaq'laavci. Picirkiuraci aturaqluki ilaci tau͡gaam akngirtengnaqluki.

⁵Umyuangcaraqavet assiitellrianek ayuqelartut tuqunarqellriim ciissim kayanguatun tuqunaqluteng. Kayangua ciiskuvni, ciissirpak anciquq! Taumek umyuangcautekelten ikayuutngungaitut elpenun— caungaunateng 'lumarrartun piliaqumalriamek negairet kuvyaitnek!

⁷Umyuangcarturalartuten assiilngurmek aturarkarpenek, umyuangcautekelten-llu uitatesciiganaki aturyularaten. Umyuangcarraarpek'nak yuut tuqutaqluki ellmikun uitangraata. Ayagaqavet-llu tumevni navguigaqluten imerqiluten tuaten,

⁸uqilriartaitelartuq avatevni. Caliaten tamarmeng elluanrilameng. Nakrialngurkun tumyarakun ayagtuten, tamaaggun-llu ayalriit elluingaunateng.

⁹Yuut qanertut, “Nutaan nallunrirtukut ca pitekluku Agayutmun anirtuqsailucimten̄ek. Tanqigmek piyuakumta aturkamten̄ek piyugyaaqukut, tan'gercetuq tau͡gaam cali,

¹⁰caavtaarluta pingnaq'lartukut cikmiumalriatun. Paallagaqluta erenrem qukallrani, unugmi pilriacetun, segganqellriit akuliitni tuqumalriatun ayuqliriluta.

¹¹Alingluta nanikuagukut. Agayutmun anirtuusqumayaaqluta nangcimallemten̄ek iqlutun-llu pimallemten̄ek, tau͡gken ca piksaunani.

¹²“ATANEQ, tua-i-wa wangkuta assiilnguput amlleqapigcameng. Assiilngumta picetaarutaitkut. Wangkuta-llu tamalkuita nalluvkenaki.

¹³Inglulitaalriaruukut elpenun, qessakluten, maligcuumiinak. Nangcillruukut ilamten̄ek avvluta-llu elpenek. Umyuaput piciuvkenateng; qanelput-llu iqluurutnguluteng.

¹⁴Elluaryaraq ayagcetarput, piciuyaram-llu mallegciigaliluta. Yuut piciulriamek qanerciigaliluteng, canganailngurmek yugtairulluni.

¹⁵Piciuyaraq nurnarian taumek yuk assiilngurmek avtaqami pitarkatun ayuqlirilartuq.” ATANREM tangellrua man'a, umyugaa-llu nall'artenrituq elluaryaramek pitairucan.

¹⁶Alangaarutkaa ikayurtekailuciat nangcimalriit. Taumek elliin pinini aturluku anuciiqai ingluit cirlakluki.

¹⁷Elluaryaraq aturciqaa akngircailkutketukiicetun anguyagtet, anirturiyarani-llu all'uku qamiqurriryailkutetun. Aciiqaa-llu akinauryaraq aturatun, eq'uqerta-llu ulikutaqellriatun.

¹⁸Anucimirqecetaararkauluki inglukesten̄i caliarat cuqluku, yaaqvanelngurni nunani uitangraata.

¹⁹Calaramek ayagluteng kanakneq tekilluku yuut alingeciqut elliinek pinianek-llu. Agiirciiquq kuigtun carvallalriatun, anuqetun cayukalriatun.

²⁰ATANEQ qanertuq yum'inun, “Taiciqua Jerusalem-aamun ingluliurucarturluci anirturyarturluci-llu tamarpeci umyualinqigtellerni.

²¹Wiinga-llu wani-wa akqutka elpecen̄un: wiinga pinimnek cikillruamci elitnaurutemnek-llu elpecen̄un pikesqelluki akwarpak, wak'nirnek-llu ayagluci niisngaarkaugarpecia elitnaurluki-llu irniaci kinguveci-llu niisngasqellua wak'nirnek ayagluki akwarpak tayima.”