Read Yupik Isaiah 6 Bible Online

Isaiah 6 - Yupik bible

Isaiah 6

¹Allrakumi angayuqam Uzziah-m tuqullrani, wiinga tangrraqa ATANEQ. Aqumgaluni atanruvimi aqumllertaani, quyigluni naluumaluni, ulikutaan imiumaluku Agayuvigpak tamalkuan.

²Quliini nangengqalriartangqertuq seraphim-aanek; tamarmeng arvinlegnek yaqurluteng, malrugnek yaqumegnek patumaluki kegginateng, malrugnek-llu it'gateng patumaluki, malruk-llu cali tengaurcuutekek.

³Ellmeggnun-llu qayagaurulluteng qanerluteng: “Tanqilria, tanqilria, tanqilriaruuq yugugaat ATANRAT; nuna muirumauq ucurnarqucianek.”

⁴Nepiita erinaita arulavkaraat Agayuvigpiim tusnganri, Agayuvigpak-llu imangluni aruvagmek.

⁵Wiinga qanertua, “Nakleng wiinga! Aarnarqelriamek ciunerkangqertua qanelqa tamarmi assiilan, uitalua-llu yuut assiitellrianek qalartellriit ilalirluki. Wiinga tangellruamku ATANEQ, yugugaat ATANRAT.”

⁶Tua-llu taukut seraphim-aat iliit tengaurluni taiguq wangnun, tegumiarluni kumalriamek kangiplugmek tegullerminek ekuavigmek tegussuucirluni.

⁷Qerrlugka agturlukek taumek kangiplugmek kumalriamek qanertuq, “Uum agtullruak qerrlugken, pinarqutairututen, au͡g'aricimauten assiilngurpenek.”

⁸Niitaqa-llu ATANEQ qanertelluku, “Kitumek ayagceciqatarcia? Kia qaneryaramek ayauciciiqakut?” Wiinga kiugua, “Wani-wa wiinga! Ayagcessnga.”

⁹Qanertuq-llu, “Ayagluten waten qanruski yuut, ‘Niiqurangerpeci taringengaituci. Tangerturangerpeci-llu ayuqucingengaunaci.’”

¹⁰Tua-llu qanertuq wangnun, “Umyuarteqesciigalivkarki ukut yuut, ciutait niicuirutelluki, iingit-llu tangerciigalivkarluki, tangerciigaliniartut taringesciigaliluteng-llu. Tuaten pikuneng, cauyuartut wangnun canrircecimaluteng-llu.”

¹¹Wiinga qanertua, “Qaillun pitalriamek waten ayuqeciqa, ATANEQ?” Ellii-llu qanertuq, “Nunarpiit imumanatkaatnun; enet-llu yuirulluteng; nuna-llu cakarniirulluni.

¹²Yuut ayagceciiqanka yaaqvanun nuna-llu tamalkuan cakarniirulluku.

¹³Qulni yugni atauciq uitangraan nunami, ellii-llu piunriumaciquq; ayuqeciquq napam kepumallrem acilqu͡rratun.” (Napam acilqu͡rra nallunailkutnguuq naunqigtellerkaatnun Agayutem yuin.)