Read Yupik Isaiah 60 Bible Online

Isaiah 60 - Yupik bible

Isaiah 60

¹Makluten, Jerusalem-aaq, ciqinqaa akercetun; Ucurnarqucian ATANREM ciqinqeraaten!

²Tan'gerem patuciqaa nunam qainga, yuut-llu tan'gercetqapigtellriami uitaluteng; Tau͡gaam ATANREM tanqian ciqinqerciqaaci; Ucurnarqucia-llu tangrruuciquq elpecen̄i.

³Angayuqauvillgutkelriit taiciqut tanqigpecen̄un, angayuqat-llu erqaarallran ernerpeci nutaram tanqianun.

⁴Kiarrluten tangaagiki cat piuralriit: Yut'en quyurtut ullagnaluten; Qetunraten taiciqut yaaqvanek; Paniten mikelngurtun kevegluki taiciiqait.

⁵Tangerrluku man'a nunaniryugciquci; Uuleggluci-llu quyam ugaani. Atanruviit tukuutait elpecen̄un taiciiqait; Imarpiim akianek tukuutait taiciqut.

⁶Amllellriit ungungssit qulugnelget tailarciqut Midian-aamek Ephah-mek-llu. Tailarciqut Sheba-mek, tailluteng suulutaanek tepkegcilrianek-llu aruvagkanek. Yuut qanrutkeciqaat niicuuminarqellria qanrutekluku ATANREM caliara!

⁷Tamalkuita Kedar-aamek Nebaioth-aamek-llu taiciiqait elpecen̄un ekuagarkauluki elliitnguarkauluteng ekuaviim qaingani ilukegcivkarnaluku ATANEQ. ATANREM-llu Agayuvigpani nutaan ucurnarivkarciqaa.

⁸Caugat makut sun'at eglerquralriit amirlutun, Yaqulegtun utertellriatun kingunermeggnun?

⁹Sunaugut yaaqvanek nunanek tailriit, Ut'rulluki Agayutem yui kingunritnun. Tailluteng qerrirlinek suulutaanek-llu Takarnarisqelluku tanqilriim ATANREM atra, Tanqilria Israel-aat Agayutiit, Elliin yun'i takaqengevkallrukai atanruviit yuitnun.

¹⁰ATANEQ qanertuq Jerusalem-aamun, “Allanret casgun napartenqigciiqaat, Angayuqaita-llu kevgiurciqaiceci. Wiinga qenertellemni anucimirqecetaallruamci, Tau͡gaam watua naklekamci.

¹¹Erenrani unugmi-llu amiici ikirngalarciqut, Atanruviit angayuqritnun Payugtesqelluci tukuutaitnek.

¹²Tau͡gaam atanruviit kevgiurtekenrilkeci Piunriumaqapigciiqut.

¹³“Muriit ayuqenrilnguut pine, juniper, cypress-aat-llu, Assinqukacagait napain Lebanon-aam, Taicimaciqut nautenqiggnaluten, Jerusalem-aaq, Agayuvigpaka tangssunarqesqelluku, Nunarpaka ucurnarqesqelluku.

¹⁴Kinguvrit nangtestek'lallerpeci tailarciqut Cikciiqut-llu ciuqerpeni qigcigyugluteng elpenek. Tamarmeng-llu ciungani caunrilkestek'lalten cikciiqut it'garpet ciuqerratni. Aterpagciiqaatgen-llu waten, ‘ATANREM Nunarpii’, ‘Zion-aaq, Nunarpii Tanqilriim Israel-aam Agayutiin.’

¹⁵“Cakaarumanqiggngaituten eq'ukumaluten-llu, Nunarpak yuunani alianaqluni. Pirpakumalriarurceciiqamken tangssunarivkarluten-llu, Nunanirqelriarurrluten akwarpak akwanun.

¹⁶Atanruviit angayuqat-llu aulukciqaatgen Aanaulriim aamarcilauciatun irniaminek. Elpet-llu nallunriceciiqan wangnun, ATANERMUN anirtullrucin, Artuqailngurmun Agayutiitnun Israel-aat teguarunrircetellrucin.

¹⁷“Taiciiqamken suulutaamek punernermek pivkenii, Qerrirlimek punernermek-llu cavigmek muragmek-llu pivkenii, Cavigmek-llu teggalqumek pivkenii. Atanirturilriit nangcingairutut elpenek; wiinga atanirturivkarciqanka ellualriakun uitanqegcinarqelriakun-llu.

¹⁸Nepait callualriit niitnaunqiggngaitut; Piunrirnarqellriim nunan navguanqiggngaitaa. Wiinga qaunqeciqamken ingluliurulluten-llu casguliumalriatun; Elpet nanrarciqerpenga tua-i-wa wiinga anirtullruamken.

¹⁹“Akertem̄ek tanqingqerrngairuciiquten erenrani Iralumek-llu tanqingqerrngairulluten unugmi; Wiinga ATANEQ, nangyuunii tanqiuciqngama elpenun; Tanqian ucurnarqucima ciqinqaumaciqaaten.

²⁰Angniitnarqelriit atunqiggngaitaten. Wiinga, ATANEQ, iquilngurmek tanqiutekciqerpenga, Piumanruarkaulua akertem̄i iralumi-llu.

²¹Yut'en tamarmeng ellualriarurciiqut, Nuna-llu pikarkaurciiqaat akwarpak. Wiinga nauceciillruanka, unatemkun piliaqellruanka, Ucurnarivkaasqellua ellaitnun.

²²Ilavcen̄i yugyanrilkacagaat cakegtakumanrilnguut-llu ilakuralriit Angtuarurciiqut pinirtariluteng atanruvigtun. Pillerkaa mat'um tekiskan, egmianun pivkarciqaqa. Wiinga ATANRUUNGA.”