Read Yupik Isaiah 62 Bible Online

Isaiah 62 - Yupik bible

Isaiah 62

¹Qalarciiqua eguaqurluku Jerusalem-aaq; Nepailngaunii anirtuumanatkaanun, Cirlakillra-llu kenurratun ciqinqerluni unugmi.

²Atanruviit nallunrirciqaat cirlakilriarucin! Angayuqat-llu tamarmeng tangerciqaat ucurnarqucin. Nutaramek acirciqaatgen ATANREM elliin aciutellranek.

³Tangniqluten ATANREM nasqerrutekaatun ayuqeciquten.

⁴Aterpagcimanqiggngaituten, “Cakaarumalria,” Nunauten-llu aterpagtenqiggngaitaat, “Nulirrulria Cavurcilleq.” Nutaraq atren uunguciquq, “Agayutem ilukegcitkekii.” Nunauten-llu aterpagcimaciquq “Kassuutelleq,” Atanrem-wa ilukegcitekngaten ellii-llu ATANEQ ayuqeciquq uingulriatun nunavnun.

⁵Nukalpiatun nulirtulriatun neviarca'rmek, Piliaqestellerpet nuliqsaguciiqaaten. Uingan nuliqsagutellni nunaniryuutek'lauciatun, Tuaten-llu Agayutvet elpet nunaniryuutekciqaaten.

⁶Qacarnerem qaingani, Jerusalem-aaq, elkarcillruunga nayurten̄ek; Nepaiteksaunateng pikilit erenrani unugmi-llu. Neqaarturitaqluku ATANEQ akqutkellrinek Nalluyaguceteksaunaki-llu.

⁷Taqsuqcirniaraat ellircetnatkaanun Jerusalem-aaq ayuqucillratun Nunarpaurtelluku-llu nanrarnariluku ellarpiim yuinun.

⁸ATANEQ ukvernarcariluni akqillruuq, Pinimikun-llu piciurcetarkauluku: “Mukaarkat naucetaaci ingluvcen̄un cikiutekenqiggngaitanka neqkaqesqelluki, Wine-aq-llu cakviurutkellerci allanret menqiggngaitaat.

⁹Elpeci tau͡gaam nauceciillerni quyurciluci-llu mukaarkanek Nerlarciquci kelipanek Nanrarluku-llu ATANEQ. Cali-llu elpeci aulukillerni quyurrluki-llu wine-arkat atsat Merciquci wine-amek Agayuvigpama casguin iluatni.”

¹⁰Jerusalem-aam yuini, nunarpagmek anluci Tumyariciki yuut! Tumyaramek pilici; teggalqut au͡g'arluki! Nallunailkutamek-llu naparciluci atanruviit nallunrirniaraat

¹¹ATANREM qanrutkellra tamalkuitnun ellam yuinun: “Qanruciki Jerusalem-aam yui, Ataneq-gguq taiqatartuq anirturyarturluki, Maligluni yugnek anirtullerminek.”

¹²Waten aterpagtelarciqaiceci, “Agayutem Tanqilriit Yui,” “Yuut ATANREM Anirtullri.” Jerusalem-aaq-llu aterpagtelarciqaat, “Nunarpak Agayutem Kenkekii,” “Nunarpak Agayutem Cakaanritellra.”