Read Yupik Isaiah 63 Bible Online

Isaiah 63 - Yupik bible

Isaiah 63

¹“Kituuga una Bozrah-mek Edom-aami uitalriamek tailria? Aturaqegtaarnek kavirlinek aturluni, ayagturalria piningqerrluni?” ATANRUUQ, piningqerrluni anirturiyugngaluni, tailria cirlakillni qanruteksarturluku.

²“Ciin aturai kavircepakartat, aturaicetun wine-arkanek atsanek tutmarluki wine-arkiutulicetun?”

³ATANEQ kiuguq, “Wiinga-wa tutmallrukenka atanruviit wine-arkat atsaicetun, yuum-llu tailuni ikayurpek'nii. Tutmallruanka qenrulluki, augita-llu mecirluki aturanka tamalkuita.

⁴Wiinga umyuarteqlemni yum'a anirtullerkaat tekituq; anucimirqecetaarnarii inglukestait.

⁵Kiarcaaqua ikayurtekamnek, alangaarlua-llu ikayurtekaitelliniama. Tau͡gaam qenertellma ikayuanga pinirivkarlua, wangnek cirlakellruaqa.

⁶Qenercama tutmautellruanka yuut ciqumlluki. Unguviita auga kuvluku nunamun.”

⁷Wiinga qanrutkeciqaqa ATANREM nangengailnguq kenkii; Nanrarluku-llu cat piurallri wangkutnun pitekluki. Israel-aam yui cakneq atawaqercetellrui takumcutaami kenekni-llu nangengailan.

⁸ATANEQ qanertuq, “Wiinga yuk'anka, iqluurngaitaatnga.” Elliin-llu anirturai

⁹nangteqellratnek. An'gilaullrunrituq, tau͡gaam elliingullruuq ATANEQ anirturilleq ellaitnek. Kenekluki takumcukluki-llu elliin aviutellrui. Ak'a elliin aulukurallrui,

¹⁰tau͡gaam ellait inglulitellruut elliinun angniitelluku-llu anernera tanqilria; taumek ellii inglukesteksagutellrukiit, ellminek-llu callugluki inglulirluki.

¹¹Tau͡gaam ellaita umyuaqaat kingunerteng, Moses-aam, Agayutem pistiin nallii, apluteng-llu, “Watua-mi nanta tauna ATANEQ, anirturilleq yum'i ciuliqagtaitnek imarpigmek? Nauwa tauna ATANEQ, anernerminek cikiqenglleq Moses-aamun?

¹²Nauwa-llu tauna ATANEQ irranarqelrianek calilalleq Moses-aakun, avegluku imarpiim mer'a ciuliqaggluki-llu yun'i et'ulriakun merkun, niitnaurrnaluni nangyuilngurmek?” Ciuliqagteklermeggni ATANEQ, tuc'uqapigtut yuilqurmiutartun horse-aatun, paallagyarpiayuunateng.

¹⁴Kuluviit ciuliqagcimalauciicetun neqkalilrianun kuignayugnun, tuaten-llu ATANREM yun'i mernuinercircetellrui. Yun'i ciuliqagtellrui at'ni ucurnarisqelluku.

¹⁵ATANEQ, tangerkut wangkuta qilagmek, uitavigpenek tanqilriaruluten ucurnarqelriaruluten-llu. Nauwa peng'gartelallren wangkutnek? Nauwa pinin? Nauwa kenken takumcukuten-llu? Nallunguaryaqunata.

¹⁶Elpet wangkuta atakamteggen. Ciuliamta Abraham-aam Jacob-aam-llu nallungraakut; elpet ATANEQ Atakamteggen, ak'anek-llu ayagluta anirturtekluten.

¹⁷Ciin avcecikut wangkuta tumkiurarpenek? Niicuilnguurrluta qigcikenrirtelluten, kiituani-llu avtukut elpenek? Uterten kevgiulriit elpenun, yuk'uralalten-llu pitekluki.

¹⁸Wangkuta, tanqilriani yugpeni, ayagcecimaqallruukut inglukestemten̄ek; ellaita-llu agayuviin tutmaulluku.

¹⁹Elpet wangkuta ayuqutarpekut atanirturiksailngurtun wangkutnek, ciungani-llu yuk'eksailngurtun.