Read Yupik Isaiah 64 Bible Online

Isaiah 64 - Yupik bible

Isaiah 64

¹Ciin qiliit allgurluki ikirrluki atranricit maavet? Ingrit tangerrsaraatgen uuleggluteng-llu alingluteng.

²Uulegcartut mertun qallarvalriatun kenillermi manimaluni. Tailuten pinin nasvaggu inglukestevnun, atanruviit-llu uulegtelluki ciuqerpeni.

³Caqerluten taillruuten alingnarqelrianek-llu caliluten neryuniurutkenritlemten̄ek; ingrit-llu tangrramegteggen alingellruut uuleggluteng.

⁴Ak'a tamaanirnek ayagluni kina imna niiteksaituq wall'u tangeqsaunani Agayutmek elpetun ayuqellriamek, waten ayuqellrianek calilriamek neryuniurutkestem̄inun.

⁵Elpet ciuniularaten angniutekluki elluam aturtai, nalluyagucuilnguut qaillun elpenun yuusqumacirmeggnek. Wangkuta-llu qenrutellruyaaqerpekut, tau͡gaam assiilnginermek taqellrunritukut. Qenrutellruarpekut, tau͡gaam taqsuunaku assiilnguq atullruaput; cakneq qenrut'ngerpekut taqsuunata alarqaqumallruukut ak'a tamaanirnek ayagluta.

⁶Tamamta menuulriatun ayuqlirillruukut; assilrianek-llu caliyukengramta caliaput pellernarqelriatun aturatun ayuqluteng. Assiilngumta ayuqlirivkarluta naunram cuyaatun nalamalriatun anuqem tengeskiitun.

⁷Atauciunge'rmi piicaksaituq elpenun; ullaksaunak-llu ikayuusqelluni. Elpet-wa iiravet wangkutnek cakaarluta-llu assiilnguput pitekluki.

⁸ATANEQ, elpet wangkuta atakamteggen. Wangkuta qikuugukut, elpet-llu qikuliurten͞guluten. Wangkuta elpet piliaqellruarpekut,

⁹taumek qenrutsiyaagyaqunata wall'u assiilnguput wangkutnun tusngarrlainarcetevkenaki. Yuk'arpekut; takumcukikut.

¹⁰Qigcignarqelriit nunarpauteten yuilqutun ayuqliriut, Jerusalem-aaq-llu yuunani imerqumalriaruluni.

¹¹Tangssunarqelria-llu tanqilria Agayuvigpagput, ciuliamta tuani nanralallrukiitgen, kenerkun piunriumallruuq. Tamarmeng uitanqegciluta uitavikelalput imerqumalriarurrluteng.

¹²Mat'um-qaa tamarmi, ATANEQ, umyuan pekcetenritaa? Qaillun-qaa piqatanrituten nangteqevkarluta piniarutlemten̄un?