Read Yupik Isaiah 65 Bible Online

Isaiah 65 - Yupik bible

Isaiah 65

¹ATANEQ qanertuq, “Wiinga upingauryaaqua kiuyuumaluki yum'a piicautait, tau͡gaam ellait piicanritut. Nataqevkaqainallruyaaqua ellaitnun, ellaita tau͡gaam nataqengnaqellrunritaatnga. Atanruviim yuin piicagvikenritaatnga, kiuyuumaurangramteng, ‘Waniwa wantua; ikayurciqamci.’

²Ciuniuryukaarrlainalaryaaqanka yuunka, pamailtaarluteng assiitellriamek calilriit umyuarteng-llu aturluku yuuluteng.

³Kasnguyugpek'nateng taqsuunateng eqciraralaraatnga. Ekuagiaqluteng agayutnguanun qigcignarqelriani naucetaarvigni,[23] aruviarluteng tuaten agayutnguanun ekuavigni.

⁴Qunguni aqumgaaqluteng ellatessurvikengnaqluki tuqumalriit tarnerit. Ner'aqluteng tuaten sitiinkaat kemgitnek mer'aqluteng-llu imarkuaritnek kemget agayutnguanun cikiutekumallret.

⁵Qanraqluteng-llu ilameggnun, ‘Mallegyaqunacikut, tanqilriaruamta agtuyunaitarpecikut!’ Waten yuut ayuqellriit eqcarautekanka qenertelqa ellaitnun kenertun nipsuilngurtun ayuquq.

⁶“Qaillun anucimirqecetaararkaucimnek ak'a picirkangellruunga, ak'a-llu igautellruluku. Nallunguarngaitaqa tuaten pillrat, akinaurciqanka tau͡gaam

⁷ellaita assiilngillrat kiingan pitkevkenaku tau͡gaam ciuliarita-llu assiilngillrit tapqulluki. Tepkegcilriamek aruviarallruata agayutnguanun agayuyarameggni qertulriit qaingitni, qanerrluuteklua tuaten. Taumek anucimirqecetaarciqkenka caliaqelallrita pinarquciicetun.”

⁸ATANEQ qanertuq, “Yuk piunririyuituq assilrianek wine-arkanek atsanek; wine-aliaqluki tau͡gaam. Tuaten-llu wiinga piunrirngaitanka yuunka tamalkuita anirturciqanka kevgiulriit wangnun.

⁹Wiinga atawaqerceciiqanka Israelite-at Judah-m yuullgutkelriarin ilai, kinguvrita-llu piksaguciiqaat nunauteka ingrililria. Wiinga cucukellrenka yuut, kevgiulriit wangnun, tuani uitaciqut.

¹⁰Agayularciqut wangnun, ciuliqagtelarciqait-llu qusngiuteteng kuluvauteteng-llu neqkalilriamun Plain of Sharon-aamun kanaknelirnermi uitalriamun, Kuignayuanun-llu Achbor-am mernuinercirvigkaatnun calaralirnermi uitalriamun.

¹¹“Tau͡gaam elpecen̄un tuaten ayuqngaituq cakaartemnun, nalluyagutestiinun-llu Zion-aam, qigcignarqelriim ingrima,[24] agayuaqluci-llu Gad-amun Meni-mun-llu, agayutiignun piluaqarayaram ciunerkam-llu.

¹²Ciunerkangqertuci tuquarkauluci nangteqnarqelriakun, kiullrunrilavcia qayagaullemni, niicugnivkenii-llu qanllemni. Elpeci cucukellruarci niisngainritlerkarci wangnek assiilngurmek-llu atullerkarci.

¹³Taumek qanrutamci agayutulit wangnun niisngalua-llu nuuqisngaitut neqkameggnek, mermek-llu nuuqisngaunateng, elpeci tau͡gken kailarciquci meqsugaqluci-llu. Ellait angnilarciqut, tau͡gaam elpeci kiaresngianaci yuuciquci.

¹⁴Ellait atualarciqut nunaniryugluteng, tau͡gaam elpeci aluviliularciquci umyuarpecen̄ek nangteqluci.

¹⁵Wiinga cucukellma yuknaluki ateci acivaqaniratek'larciqait. Wiinga, ATANEQ Agayun, tuquvkarciqamci. Niisngastenka tau͡gken nutaranek acirarkauluki.

¹⁶Kina imna kaigakuni atawaqaasqutmek kaigaciquq atawaqaasqesqelluni piciulriamun Agayutmun. Kina-llu imna akqikuni ukvernarcariciquq piciulriakun Agayutem atrakun. Arenqiallugutellret mat'um ciungani catairuciiqut nalluyagucimaluteng-llu.”

¹⁷ATANEQ qanertuq, “Piliunga nutaramek nunamek nutaramek-llu qilagmek. Cat pellullret umyuaqumanqiggngaitut.

¹⁸Angnirrlainaqici nunaniryugglainarluci-llu akwarpak piliaqellrenka pitekluki. Nutaraq Jerusalem-aaq piliaqa imangqerciquq nunanimek, yui-llu angnirciqut.

¹⁹Wiinga-llu nunaniryuutekciqaqa Jerusalem-aaq yui-llu. Tuani qialriamek niitnaqngaituq, nanikualriartangqerrngaunani.

²⁰Mikelnguut anqiiyagauluteng tuqularngaitut, yuut-llu tamarmeng unguvallerkarteng aturciqaat iquklilluku. Yuinarnek tallimanek (100) allrakungluteng yuulriit ayagyuarnilarciqait. Tauna nurrluku tuqukata nallunailkutauciquq wangnun anucimirqecetaarumaciat.

²¹Yuut eneliaqameng ellaita uitavikelarciqait, allat aturngaitait. Nauceciirraarluteng wine-arkanek, wine-aliateng ellaita tau͡gaam mel'arciqait, allat mel'arngaitait. Napat pilauciicetun, yuunka unguvamalarciqut. Unatmegteggun calialteng angniutekluki atularciqait.

²³Elliinginaq calilarngaitut, picurlagaarkanek-llu irniangelarngaunateng. Wiinga ellait kinguvrit-llu atawaqerceciiqanka yuullrata taktaciatun.

²⁴Qayagaurpailgata kiuciqanka, piicanermek-llu wangnun taqvailgata, piicautait kiularciqanka.

²⁵Keglunret qusngiyagaat-llu nerellgutkelarciqut: yugtutulit kuluvagtun canegnek nerlarciqut, ciissirpiit-llu urr'amek tau͡gaam ner'aqluteng. Zion-aami, tanqilriami ingrimni,[25] akngirkengyugngalriamek wall'u piunririyugngalriamek pitangqerrngaituq, qanertuq ATANEQ.”