Read Yupik Isaiah 66 Bible Online

Isaiah 66 - Yupik bible

Isaiah 66

¹ATANEQ qanertuq, “Qilak atanruvima aqumlleqaa, nuna-llu it'gama tusngavikluku. Qaillun, tuallu, ayuqellriamek enemek piliqatarcit wiinga pikamnek, qaillun ayuqellriamek uitavigkiuqatarcia?

²Ellarpiim iluanelnguut tamalkuita piliaqellruanka, taumek wiinga pikanka, qanertuq ATANEQ. Wiinga ilukegcitkanka yuut ellmeggnek pivakenrilnguut umyuarnayaguciluteng, qigcikestenka niisngalua-llu.

³“Yuk tuqucilria angucalumek quluvagmek ayuquq tuqucilriatun yugmek; yuk elliilria qusngiyagarmek ayuquq yugtun qimugtem uyaqurranek ayemcilriatun; yuk elliilria murkaarkamek ayuquq yugtun elliilriatun sitiinkaam auganek; yuk aruviaralria frankincense-amek ayuquq yugtun piicalriatun agayutnguamun. Nunanik'larait umyualngunarqelriit agayuyarateng.

⁴Taumek nangteqnarqelriit tuc'eciiqanka ellaitnun, tamakut ellaita alikekait, tua-i-wa iliit kiullrunrilan, qayagaullemni qanllemni-llu niicugnivkenani. Ellaita cucukaat niisnganritlerkarteng assiilngurmek-llu atullerkarteng.”

⁵Niicugniciu ATANREM qanellra, elpeci qigcikestaini niisngastaini-llu: “Elpeci piciucirci wangnun pitekluku, ilaita nakmiin yugpeci eq'ukaiceci cakenrirluci-llu. Picingssautekaiceci qanerluteng, ‘ATANREM nasvagliu angtacini anirturluci-llu, wangkuta tangerrnaurput nunaniryullerci.’ Ellait tau͡gaam kasnguyugcecimaciqut.

⁶Niicugnici! Nepa qastulria nunarpagni, Agayuvigpiim iluani, nepkaa ATANREM anucimirqecetaarilriim inglukestem̄inek!

⁷“Wiinga nunarpaka ayuquq arnatun irnilriatun teggiurcirraarpek'nani.

⁸Kina-qaa waten pilriamek tangellruuq wall'u niitellruuq? Atanruviit-qaa piurtelartut ernermi ataucimi? Zion-aaq ak'anun nangteqngaituq teggiurciluni, atanruvik yuurteqataqan.

⁹Umyuarteqenrici wiinga yuunka yuurtellerkaatnun tekiuqaarluki yuurcetenritnayukluki?” Waten qanellruuq ATANEQ.

¹⁰Nunaniryullgutkiciu Jerusalem-aaq; angnillgucirluku, tamarpeci uum nunarpiim kenkestaini! Nunaniryullgutkiciu watua, tamarpeci angniilutkestellrini!

¹¹Quyaluci aturciqaci tukuutai, mikelnguyagartun aanamini aamalriatun.

¹²ATANEQ qanertuq, “Ulngiinarceciiqamci; atanruviit tukuutait elpecen̄un qurrlulriatun kuigtun ayuqeciqut meriucuilngurtun. Ayuqeciquci mikelnguyagartun aaniin aamareskiitun, talligmikun kevgumatukiitun, kenekluku-llu auluktukiitun.

¹³Wiinga qaruciiqamci Jerusalem-aami, aanaulriim qarucilauciatun irniaminek.

¹⁴Man'a tuaten pivkarluku tangerquvciu, quyaciquci; pinirivkarciqaaci segganqegtelluci-llu. Nutaan nallunrirciqerci wiinga, ATANERMI, ikayulauciat niisngastenka, qenrulluki-llu inglukestenka.”

¹⁵ATANEQ taiciquq kenerkun. Taiciquq ekumaluni yaqugkeni anuqerpiim anucimirqecetaaryarturluki qenruskengani.

¹⁶Kenerkun nuussirpagkun-llu anucimirqecetaarciqai tamalkuita ellam yui ellmini pinarqelriit amllelriit-llu tuqucimaarkauluteng.

¹⁷ATANEQ qanertuq, “Iquklitlerkaq canimellirtuq menuircalalrianun agayunaluteng agayutnguanun, quyurmeng ayagaqluteng qigcignarqelrianun naucetaarvignun,[26] nerluteng sitiinkaat kemgitnek avelngarnek-llu, allanek-llu cali miryalngunarqelrianek neqkanek.

¹⁸Nallunritanka umyuangcautait caliarit-llu. Wiinga taiciqua quyurcarturluki atanruviit yuit tamalkuita. Quyuumarikuneng, ucurnarquciqa tangrrarkaugaat

¹⁹nallunrirluku-llu wangnun anucimirqecetaalaucirteng. “Tau͡gaam ilait uitaciiqanka, ayagtelluki-llu atanruvignun, yaaqvanun-llu nunanun niitnaucimnek niiteksailngurnun wall'u tangeqsailngurnun angelriarucimnek piniucimnek-llu: Spain-amun, Libya-mun, Lydia-mun-llu pitegculrianek yul'egmun, cali-llu Tubal-aamun, Greece-amun-llu. Atanruvigni makuni ellaita qalarutkeciqaat angelriaruciqa.

²⁰Ellaita ut'ruciiqait anelguteci atanruvignek cikiutnguluki wangnun. Taiciiqait qigcignarqelriamun ingrimnun[27] Jerusalem-aamun horse-aatgun, ciulvagteggun, qulugnelegteggun, ekumassuutetgun-llu akalrialegteggun, Israelite-at taicilauciicetun elliitmeggnek mukaarkanek Agayuvigpagmun menuircaumalrianek assigcirluteng.

²¹Wiinga-llu ilait agayulirten͞gurciiqanka Levite-aurrluki-llu.

²²“Nutaraq nuna, nutarat-llu qiliit piurtarkama pinimkun piurrlainararkauciagtun, tuaten-llu elpeci kinguveci aterci-llu piurrlainarciqut.

²³Tamalkuitni Nutaram Iralum Nerevkaritaini, tamalkuitni-llu Sabbath-aani, atanruviit yuit tailarciqut agayuyarturluteng wangnun wani Jerusalem-aami,” qanertuq ATANEQ.

²⁴“An'aqameng, tanglarciqait tuqumalriit temait inglulitaallret wangnun. Paraluit tuqungaitut, keneq-llu ekualria nipcimangaunani. Tamalkuitnun-llu tangertem̄eggnun miryalngunarqeciqut.”