Read Yupik Isaiah 7 Bible Online

Isaiah 7 - Yupik bible

Isaiah 7

¹Angayuqaq Ahaz-aq, Jotham-aam qetunraa tutgarii Uzziah-m, atanirturillrani Judah-mi, anguyallruut. Rezin-aam, angayuqran Syria-m, Pekah-m-llu Remaliah-m qetunraan, angayuqran Israel-aam, curugaak Jerusalem-aaq, tau͡gaam cirlakevkenaku.

²Qaneryaram tekicani Judah-m atanra Syria-m anguyagtai ak'a Israel-aam nuniinun piniluki, ellii yun'i-llu tamarmeng alingqapigtut uuleggluteng napatun arulalriatun anuqmi.

³ATANEQ qanertuq Isaiah-mun, “Teguluku qetunraan Shear Jashub-aaq,[3] pairrsaaggu angayuqaq Ahaz-aq. Nalaqeciqan tumyarami aturanek pilistet caliyaraatni, iquani elanrem mer'em qurrluryaraan qullirmek nanvarra'armek.

⁴Qanrutniaran kellutesqelluku, tavevkenaku, alingevkenaku umyuarniurpek'naku-llu. Qenertellrat Angayuqam Rezin-aam, atanirtuq'ngain-llu Syria-rmiut, Angayuqam-llu Pekah-m alingnarqenrunrituq aruviagni malruk nipqatalriik muriik.

⁵Syria, ilaklukek Israel-aaq Angayuqra-llu, picirkiullruut.

⁶Curugnaluku Judah, alingcira'arluki-llu yuut ililircetnalutek, nutaan-llu Tabeel-aam qetunraa angayuqrurtelluku.

⁷“Tau͡gaam wiinga, ATANEQ, qanertua man'a piciurrngaituq.

⁸Ciin? Tua-i-wa Syria pininrunrilan Damascus-aami, Damascus-aaq-llu pininruvkenani Angayuqami Rezin-aami. Una-llu Israel-aaq, allrakut yuinaat pingayun tallimanek cipluku (65) iluatni navguumaciqngami atanruviusciiganani.

⁹Israel-aaq pininrunrituq Samaria-mi, Samaria-llu pininruvkenani Angayuqami Pekah-mi. “Ukveren pektayiitenrilkan, piungaituten.”

¹⁰ATANEQ ayagcecinqigtuq qaneryaramek Ahaz-amun:

¹¹“Kaigavikiu ATANEQ Agayuten nallunailkutanek cikiisqelluten. Camaken tuqumalriit nuniitnek pilriamek, wall'u pakmaken quyilriamek qilagmek.”

¹²Ahaz-aq kiuguq, “Wiinga kaigangaitua nallunailkutamek. Naspaayuumiitaqa ATANEQ.”

¹³Tuaten qanran Isaiah kiuguq, “Niicugnici, watua, kinguvrini David-aam. Assinricaaquq tua-i taqsuqevkalci nerinisngialliqsuiluciat yuut; taqsuqevkarnarqaci-llu-qaa Agayutem nerinisngialliqsuilucia?

¹⁴Taumek ATANREM elliin nallunailkutamek cikirciqaaci. Tangerrluku neviarcar[4] qingarciquq, irniluni-llu qetunrangluni acirluku-llu Immanuel-aamek.[5]

¹⁵Anglirikan elliin umyuani atungluku, yuut mel'angciqut muluk'uumek nerluteng-llu evegtaat neqkautiitnek.[6]

¹⁶Cali-llu tauna tekipailgan, nunautekek taukuk atanrek alikek'ngarpeci yuiruciiquk.

¹⁷“ATANREM elpenun, yugpenun, tamalkuitnun-llu angayuqam ilainun tuc'eciiqaa, erenret picurlagnarqelriit arcaqanruluteng atulallerpecen̄i angayuqauvia Israel-aam avqaanranek Judah-mek, taivkarciqaa Assyria-m atanra.

¹⁸“Tamatum pillerkaa tekiskan, ATANREM kukumyara'arluni elpengcarciqai Egypt-aarmiut taisqelluki ciivagtun yaaqsinkacagainek avayain Kuigem Nile-am, Assyrian-aat-llu taisqelluki nunaitnek evegtartun.

¹⁹Amlleqapiggluteng quyurciiqut manialngurni kuignayugni qerranritni-llu teggalqut, patuluki-llu tamalkuita cukilanat tamalkuita-llu carr'ilqat.

²⁰“Tauna pillerkaq tekiskan, ATANEQ ellminun caliarkamek piciquq kepliaristem̄ek Euphrates-aam akianek —angayuqranek Assyria-m— keligciqai ungaci nuyat-llu qamiquvcen̄i temevcen̄i-llu.

²¹“Tauna pillerkaq tekiskan, naucetaarviliurta ilakuangqellrung'e'rmi kuluvayagarmek ataucimek qusngignek-llu malrugnek,

²²milegmek amllermek cikirciqaak nuuqisngairulluku. Aa-ang, unegtauqallret-llu tamaani nunami milegmek evegtaat-llu neqiitnek neqkautengqerciqut.

²³“Tauna pillerkaq tekiskan, assilriit wine-arkanek naucetaarviit, tiissitsaanek (1,000) napayaarluteng akikanengqerrluteng tiissitsaanek qerrirlinek, nauvikumaciqut cukilananek naparrluyagarnek-llu.

²⁴Yuut tamaani pissularciqut urluverteggun. Aa-ang, nuna tamarmi muirumaciquq naparrluyagarnek cukilananek-llu.

²⁵Tamarmeng qemit nauceciivik'lallrit naurpagciqait cukilanat kina-llu tamaavet ayagngaunani. Nerviksaguciiqaat tamana kuluviit qusngit-llu.”