Read Yupik Isaiah 8 Bible Online

Isaiah 8 - Yupik bible

Isaiah 8

¹ATANEQ qanertuq wangnun, “Tegulluten angtuamek igarkamek, igaa igarpauluku. ‘Aklungararutet Egmian, Uayaaqengat’.

²Aqvaten angutegnek malrugnek nalirrugnailnguugnek, agayulirtem̄ek Uriah-mek, Zachariah-mek-llu qetunraanek Jeberechiah-m, nallunritesten͞guniartuk.”

³Tamatum kinguakun nulirqa qingartuq. Qetunrarpuk-llu yuurtellrani, ATANEQ qanertuq wangnun, “Acirru ‘Aklungararutmek-Egmian-Uayaqengat.’

⁴Tan'gaurluq qaneryaurpailgan ‘Aanaa’ cali-llu ‘Aataa’, tamalkuita tukuutai Damascus-aam, tamalkuita-llu tegukengai Samaria-m, Assyria-m angayuqran ayauciiqai.”

⁵ATANEQ qanenqigtuq wangnun.

⁶Qanertuq, “Ukut yuut qessakellruatgu carvanirturalria mer'a Kuiggaam Shiloh-m,[7] uuleggluteng-llu ciuqerragni angayuqak Rezin-aankuk Pekah-llu,

⁷Wiinga, ATANEQ, taivkarciqaqa Assyria-m angayuqra anguyagtai-llu tamalkuita, Judah anguyaasqelluku. Agiirciiqut Kuigmi Euphrates-aami ulerpiim mer'atun, cen̄ii uryurtelluku.

⁸Judah tumekluku ayagciqut ulerpagtun, yuum tusga tekilluku et'utarilriatun patuluki-llu cat tamalkuita.” Agayutem nayuraakut! Talligken yagingalriik nuna camun pivkarngaitaak.

⁹Quyurci alingluci, elpeci atanruvigni! Niicugnici, nunam yaaqsilriarini. Upci callullerkarpecen̄un, tau͡gaam alingici!

¹⁰Picirkiurci! Picirkiuraci tau͡gaam piciurrngaitut. Qalarcugtacirpecetun qalarrluci! Elliinginaq piciquci, wangkuta Agayutem nayuakut.

¹¹Artuqailnguq pinini aturluku ATANREM aarcirturaanga maligtesqevkenaku tumyaraq yuut atuqiit. Ellii qanertuq,

¹²“Ilaliuteksaunak picirkiuraitnun yuut alikevkenaki-llu alikekait.

¹³Neq'akiciu, wiinga ATANEQ Artuqailnguq, tanqilriaruunga; wiinga tau͡gaam alikarkaqerpecia.

¹⁴Irranaqlua tanqilriaruama ayuqua teggalqutun yuut paallautek'laqiicetun; kapkaanartun-llu ayuqua pitaqerkauluki yui angayuqauviagnek Judah-nkuk Israel-aaq-llu, Jerusalem-aam-llu yui.

¹⁵Amlleret paallagyarpiaraciqut; iquluteng passimaciqut. Kapkaanarnun napciiqut.”

¹⁶Elpeci, elitnauramni, murilkarkaugaci piugurtelluki qaneryarat Agayutem wangnun cikiutekellri.

¹⁷ATANEQ iillruuq yum'inek, tau͡gaam wiinga cacetuqutekaqa neryuniurutekluku.

¹⁸Wiintua waniwa ilalirluki mikelnguut ATANREM cikiutekellri wangnun. ATANREM Artuqailnguum, aqumllelgem Ingrimi Zion-aami, ayagcetellruakut unguvalriatun qaneryaratun Israel-aam yuinun.

¹⁹Tau͡gaam yuut qanruciiqaiceci apcesqelluki ciunerkarcutulit tuqumalriit-llu qanertait, tamakut qalrialalriit qanevyuggluteng. Qanerciqut, “Yuut aptelarnarqut qanellritnek anerneret, apqauraqluki-llu tuqumalriit unguvalriit apqaurucilluki?”

²⁰Waten kiugarkaugaci, “Niicugniciu ATANREM elitnaurutii elpecen̄un! Tuqumalriit qanertait niicugnivkenaki—qanellrita elpecen̄un picurlak pinricen̄arcessngaitaa.”

²¹Yuut tarraciiqut nunakun, ciunerkairulluteng kaigluteng-llu. Kaillermeng qenertellermeng-llu nalliini aniqlaaciqaat angayuqerteng Agayutseng-llu. Ciugciiqut qilatmun,

²²wall'u nuna tangvaurciqaat, tau͡gaam camek tangerrngaitut picurlagnarqelriamek tau͡gaam, tan'germek-llu, alingnarqelriamek tan'germek ayagcecimavimeggnun.