Read Yupik Isaiah 9 Bible Online

Isaiah 9 - Yupik bible

Isaiah 9

¹Ellait nau͡gg'un anagviiciiqut mat'umek picurlagnarqelriamek. Nuniit yuugken Zebulun-aankuk Naphtali-llu caunrilkumallruyaaquk, tau͡gaam kinguqvaarni takarnarqutmek taiciiqut mat'umun nunamun, Mediterranean-aamek calaratmun nunamun akilirneranun Jordan-aam, Galilee-aq-llu tekilluku, allanret uitaviat.

²Yuut tan'germi piyualriit tangellruut angelriamek tanqigmek Talinret nuniitni uitallruut, tau͡gaam maa-i tanqik ciqinqertuq ellaitnun.

³Nunaniryugcetaten cakneq, ATANEQ; angnirivkaraten. Nunaniryuutekait calialten, yuut angnilauciicetun naucetaameggnek quyurciaqameng wall'u avgutaqameng tukuutnek anguyagkun tegullermeggnek.

⁴Elpet navellruavgu uskuraq uqamailliqutiit kaugtuarumangairutelluki. Cirlakellruan atanruvik nangtestiit yugpet, cirlakellrucirpetun anguyagtai Midian-aam ak'a tamaani.

⁵Piluguit curullret anguyiit aulilriit-llu akluit piunriumaciqut kenerkun.

⁶Wangkutnun mikelnguq yuurtuq! Qetunramek cikiumaukut! Atanirturilriaruciquq. Aterpagcimaarkauguq, “Ayuqailnguq Ayuqucirturta,” “Artuqailnguq Agayun,” “Iquilnguq Aata,” “Uitanqegcitem Atanra.”

⁷Atanirturillra uitanqegcivkarillra-llu pingiinarciquk iquklisngaunatek, atanruvian aqumllertaa David-aam, angayuqauvia-llu piugarkaurtelluku, naluumaluku-llu pitalqenerkun elluarucikun-llu waken ayagluni akwarpak-llu tayima. Ilungellran ATANREM Artuqailnguum piciurceciiqaa man'a.

⁸ATANEQ ayagcecimariuk inglulirluku Jacob-aaq, tuciiquq-llu Israel-aamun.

⁹Tamarmeng yuin Israel-aam, tamarmeng-llu uitalriit nunarpagmi Samaria-mi, nallunriciiqaat elliinun man'a pillrucianek. Watua qutegtut ucuryaggluteng-llu. Qanerluteng,

¹⁰“Qikumek enet piliaqumalriit imellruut, tau͡gaam cimirciqaput teggalqunek enenek. Aglut sycamore-anek napanek taqumalriit iqucimaut, tau͡gaam cimirciqaput napakegtaarnek cedar-aanek.”

¹¹ATANREM uitanrircetai inglukestait curugyungevkarluki.

¹²Syria-m calaralirnermi, Philistia-m-llu kanaknalirnermi qantek angpartait nernaluki Israel-aat. Tau͡gken cali ATANREM eq'uqertii iquklitevkenani; unatni cali yagingai anucimirqecetaariarkauluni.

¹³Israel-aam yui umyualinqigteksaitut; Artuqailnguum ATANREM anucimirqecetaallrungraateng, elliinun utertellrunritut.

¹⁴Ernermi ataucimi ATANREM anucimirqecetaarciqai Israel-aam ciuliqagtai yui-llu; kepciqai, qamiqurrit pamyuit-llu.

¹⁵Ak'allaat takarnarqelriit qamiqu͡rruut; pamyuq-wa prophet-aat iqluurutnek elitnaurilriit!

¹⁶Ciuliqagcilriit ukunek yugnek iqlutmurcetait ayuquciirutelluki-llu.

¹⁷Taumek ATANREM iliit ayagyuat anagcessngaitaa, takumcuyugngaituq-llu aipainernek elli'irnek-llu, tua-i-wa tamarmeng yuut agayutairucata assiirulluteng qanellrat-llu tamarmi assiinani. Tau͡gken cali ATANREM eq'uqertii iquklisngaituq, unatni cali yagingai anucimirqecetaariarkauluni.

¹⁸Assiiluciat yuut ekuaguq kenertun piunririlriatun cukilananek canegglugnek-llu. Ekuaguq napalilriim ekualauciatun arugpagluteng qulmun.

¹⁹Tua-i-wa Artuqailnguq ATANEQ qenercami, anucimirqecetaarutii ekuaguq kenertun tamiinun nunamun piunrirluki yuut, tua-i yuut ellmeggnek tau͡gaam arcaqakut.

²⁰Tamiini nunami yuut nerangnaqut tekiyucirmegcetun, tau͡gaam kainrirciiganateng. Kiituani-llu nerlangait irniateng.

²¹Manasseh-m yui Ephraim-aam-llu yui calluutut, iliklutek-llu curugluku Judah. Tau͡gken cali eq'uqertii ATANREM iquklitenrituq, unatni cali yagingai anucimirqecetaariarkauluni.