Read Yupik Leviticus 10 Bible Online

Leviticus 10 - Yupik bible

Leviticus 10

¹Nahab-ankuk Abihu-llu, qetunraak Aaron-aam, teguluki kenliurcuutetek imirakek kumalrianek kangiplugnek, aruvagkamek-llu tepkegcilriamek kangiplugnun elliilutek cikiutekaak ATANERMUN. Tau͡gaam keneq tanqilriarunrituq, tua-i-wa ATANREM alerqullrunrilatek tuaten pisqellukek.

²Alqunaq-llu ATANREM ekuallagcetak, tuqulutek-llu tuani ciuqerrani ATANREM.

³Moses-aam tua-i Aaron-aaq qanrutaa, “Waniwa una ATANREM qanrutkellra waten qanllermini, ‘Kevgiulriit wangnun qigcikarkaugaat tanqilriaruciqa; wiinga-llu nasvagciqaqa ucurnarquciqa yumnun.’” Aaron-aaq-llu camek qanerpek'nani.

⁴Moses-aam-llu qayagaurak Mishael-aaq Elzaphan-aaq-llu, qetunraak Uzziel-aam, angiin Aaron-aam, qanrullukek-llu, “Taitek anullukek-llu temkek anelgutevtek Pelatekamek Agayuvigmek, ayaullukek-llu elatiitnun nunat.”

⁵Tua-i tailutek akluken'gun tegulukek tuqumalriik ayautagkek elatiitnun nunat Moses-aam pisqellracetun.

⁶Moses-aam tua-i qanrutaa Aaron-aaq qetunraak-llu Eleazar-aaq Ithamar-aq-llu, “Nuyavliluci piyaqunaci aturaci-llu allgurpek'naki tuquilriacetun, tuquyuartuci; ATANREM eq'uqrucuarai yuut tamalkuita. Tau͡gaam ilavci Israel-aam yuin qiateksugngaagket ATANREM kenerkun piunrillrek.

⁷Pelatekam amiiga unicaqunaciu, tuaten pikuvci tuquciqngavci, tua-i-wa allakaumiivci ATANREM caliaranun uqumek minguumallerpeciuggun.” Moses-aam-llu pisquciatun piut.

⁸ATANREM-llu qalarutaa Aaron-aaq qanerluni,

⁹“Elpet wall'u qetunraten Pelatekamun Agayuvigmun itrarkaunrituci mer'arraarluci wine-amek wall'u allamek kemninarqellriamek, tuaten pikuvci tuquyuartuci. Kinguverpeci tamarmeng aturarkaugaat una alerquun akwarpak.

¹⁰Elpeci-llu nallunritarkaugaci allakaumallrat cat tanqilriaruluteng allanek canek yuut atulaq'ngaitnek, wall'u cam menuircaumallra wall'u cam menuulriarullra.

¹¹Elicungcalararkaugaci-llu Israel-aam yui tamalkuitnek alerquutnek ATANREM qanrutkellrinek ellaitnun Moses-aakun.”

¹²Moses-aam-llu qanrutaa Aaron-aaq qetunraak-llu kingunrulriik, Eleazar-aaq Ithamar-aq-llu, “Ilakuara mukaarkam elliitngullrem ekualuku, teguluku nerkiciu quuleciraunaku ekuaviim caniani kenciknarqeqapigtellriaruan.

¹³Kencignarqellriami ner'arkaugarci, elpet qetunrarpet-llu pikngavciu ekualuteng elliitnek ATANERMUN, tuaten alerquumallruama.

¹⁴Tau͡gaam qat'gat iruit-llu elliitekumallernek ATANERMUN elpet, qetunrarpet, nakmiin-llu ilavci, nerlarciqaci menuilnguum nuniini, tamakut pikngavciki ilakuyucimun elliitaitnek Israel-aam yuin.

¹⁵Kingulirneq kanagaq qat'gat-llu taitelarciqait tapeqluki uqunun neqkanun-llu elliitmeggnun ATANERMUN. Ukuk ungungssim temiin ilak pik'lararkaugaci, elpet irniarpet-llu nangyuilngurmek, ATANREM alerqullruciatun.”

¹⁶Wani Moses-aam cumiggluni apqaurutkaa qusngirngalnguq elliitnguarkaulleq assiilnguum au͡gautekaanun. Nallunriami-llu ak'a ekuamallranek qenqerrutak Eleazar-aankuk Ithamar-aq-llu, qanerluni,

¹⁷“Ciin nerellrunricet'gu assiilnguum au͡gautekaanun elliitngulleq kencignarqellriim nuniini? Kencignarqeqapigtellriaruuq cikiutekumallruluni-llu elpetegnun ATANERMEK ukut yuut assiilnguit au͡gaumasqelluki.

¹⁸Auga itrucimallrunrilan Pelatekamun Agayuvigmun qigcignarqellriamun pinritevkenatek ner'arkaullruyaaqertek kencignarqelriim nuniini, wiinga alerqullrucimtun.”

¹⁹Aaron-aam-llu tua-i qanrutaa Moses-aaq, “Unuamek-wa elliitekellrukiit assiilnguum au͡gautekaanun elliin ekuagarkaq-llu, tau͡gken tuaten pingraata assiitellriit makut wangnun tull'uteng. Unuamek-qaa nerellrukumku assiilnguum au͡gautekaanun elliitngulleq akurtuyunaqsartuq-qaa ATANERMUN?”

²⁰Moses-aam-llu man'a niicamiu cangalliunrirtuq.