Read Yupik Leviticus 11 Bible Online

Leviticus 11 - Yupik bible

Leviticus 11

¹ATANREM qanrutak Moses-aankuk Aaron-aaq-llu,

²“Qanruskitki Israel-aam yui: Makut maa-i unguvalriit nerlararkaci nunam ungungssiinek.

³Cetumqulget avcimalrianek igglermeggnek-llu anciluteng tamuanqigcitulit ilakait neryugngakevci.

⁴Tau͡gaam ilait igglermeggnek anciluteng tamuanqigtetungraata cetumquit-llu avcimangraata nerlarngaitaci; qulugnelget ungungssit igglermeggnek anciluteng tamuanqigtetunge'rmeng cetumquit avcimanrilata menuulriaruut elpecen̄un.

⁵Qiurmiutaat uiret menuulriaruut elpecen̄un, igelteng anlluki tamuanqigtetunge'rmeng cetumquit avcimanrilata.

⁶Qayuqeggliq-llu igellni anlluku tamuanqigtetungraan cetumqui avvinganrilata, menuulriaruuq elpecen̄un.

⁷Sitiinkaat cetumquit avcimayaaqut tau͡gaam igelteng antenqiggluki tamuanqigcuunaki, menuulriaruut cali elpecen̄un.

⁸Kemgit makut nerngaitaci, tuqumalriit-llu temait agturngaunaki; elpecen̄un menuurutnguarkaungata.

⁹“Makut-llu maa-i cali neryugngaaci mermiutaat: Mermi papsalqulget qeltelget-llu imarpigmiutaungraata wall'u kuigmiutaungraata.

¹⁰Tau͡gaam imarpigmelnguut wall'u kuigni papsalquilnguut qeltaunateng-llu ner'arkaunritaci.

¹¹Umyuartequskiciki tamakut menuulriaruluki. Neryaqunaciki agtuqsaunaki-llu nalanret.

¹²Tamarmeng mermelnguut papsalqurrilnguut qeltailnguut-llu menuulriaruciqut elpecen̄un.

¹³“Makut-llu maa-i yaqulget ner'arkaqenrilkeci: Yaqulegpiit meterviit, iggiayulit, eskaviat, qakurtat, tulukaruut, naruyat, unuirat-llu. (Makut-llu maani tangssuilkeput: buzzards, vultures, ostriches, storks, herons, pelicans, hoopoes, bats.)

²⁰“Tamarmeng-llu ciissit yaqungqellriit menuulriaruut.

²¹Qecngaatulit tau͡gaam.

²²Makuni pet'ngertayulit, crickets, grasshopper-aat-llu tau͡gaam neryugngaaci.

²³Tamarmeng allat ciissit yaqungqellriit cetamanek ipilget menuulriaruut.

²⁴“Kia imum agtuquniki makut ungungssit tuqumalriit menuugarkauguq atakurvianun: Tamalkuita cetumqulget, cetumqurrit tau͡gaam avgumakata igglerteng-llu anlluku tamuanqigtetulit; tamarmeng-llu cetamanek ipilget it'garluteng. Yuum tegulallrukuniu tamakut iliita tuqumaluku temii, erurarkaugai aturani, ellii tau͡gaam menuugarkauluni atakuq tekilluku.

²⁹“Makut cali quyungqatuluteng pitulit ilait menuulriaruut elpecen̄un: Narullgit, avelngaat, ciissirpagngalnguut ayuqait-llu, gecko, crocodile, lizard, chameleon-aat-llu.

³¹Yuum agtuquniki tamakut wall'u tuqumalriit temait menuugarkauguq atakullranun.

³²Tuqulriit-llu iqullermeggni agtullrat menuurtarkauguq: muraunger'mi, 'lumarraunge'rmi, amiunger'mi, caqukaunger'mi, canun piciatun atulria; mermun akurcimaarkauguq, menuulriaruarkauluni atakullranun. Taum tau͡gaam kinguani menuirutarkauluni.

³³Tuqullermeggni-llu ek'areskuneng qikum assigtam iluanun, imai tamarmeng menuurtarkaugut. Navguqiciu tauna assigtaq.

³⁴Neqkat-llu nerumaarkauyaaqellret mermek tuaken menuurtellermek assigtamek kuvumallrukuneng menuurciiqut, ca-llu mernarqelria tamakucim imaa menuulriaruuq.

³⁵Cat-llu tamarmeng tuqumalriim iquvikellri menuurciiqut, qiku kaminiaq wall'u uucissuun. Itumcimaarkaugut elpecen̄un menuulriaruata.

³⁶Tau͡gken meq nunamek ulvelria wall'u meq cayailkuciumalria qungasngaluni nani menuiciiquk, tau͡gaam cali allat agtuqunegteggu tuqumalria tema menuurtarkauluteng.

³⁷Iliita-llu iquvikengraani naucetaarkaq nauceciirumaqatalria menuurrngaituq.

³⁸Tau͡gken naucetaarkaq mermelkan iliita-llu tuqumalriit tauna kenicirvia iquvikluku, menuulriarurciiquq elpecen̄un.

³⁹“Ungungssiq-llu neqkauyugngalria tuqukan, kia imum agtuquniu tuqumalriim temii menuulriarurciiquq unugvianun.

⁴⁰Kina-llu nerkuni iliinek ervigciqai aturani tau͡gaam ellii menuugarkauluni unugvianun. Tuatnaciqluni-llu cali kina imna ayaucilria tuqumalriim temiinek, menuulriarurciiqluni unugvianun.

⁴¹“Tamarmeng aurretulit nunam qaingani pellernarqelriaruciqut; nerumaarkauvkenateng.

⁴²Aqsamegteggun pektetungraata cetamanek-llu ipingqengraata wall'u ipililriarungraata,

⁴³menuurcecaqunaci elpecen̄ek tamakunek nerluci.

⁴⁴Wiinga ATANRUAMA Agayuteklua elpeci; taumek menuircaarluci tanqilriaruuci wiinga tanqilriaruama.

⁴⁵Wiinga ATANRUUNGA anucestellerci Egypt-aamek Agayutkesqellua elpecen̄un; taumek tanqilriarukici wiinga tanqilriaruama.

⁴⁶“Una waniwa alerquutnguuq pitekluki ungungssit, yaqulget, tamarmeng-llu unguvalriit pektetulit merteggun, wall'u nunam qainga pekvikluku pilrianun.

⁴⁷Elpeci murilkarkauguci piciryaraqluku-llu nallunritlerkarci cam menuullra wall'u menuitellra, cali nalluvkenaki ungungssit neryugngakci neryugnganrilkeci-llu.”