Read Yupik Leviticus 13 Bible Online

Leviticus 13 - Yupik bible

Leviticus 13

¹ATANREM qanrutak Moses-aankuk Aaron-aaq-llu,

²“Yuk amimikun pupikan wall'u aninguaqan wall'u puvkan natii qaingani, aarnaqluni mamyuilnguurrnayukluni, tauna aguskiciu Aaron-aamun wall'u allamun agayulirtem̄un.

³Agayulirtem-llu yuvrirciqaa pupik amiani. Melqut-llu pupiani qat'rikata pupia-llu ilutunruluni avatmini, tua-i mamyuilnguulliniuq. Agayulirtem yuvrirtiin qanrutkeciqaa menuulriarurrniluku.

⁴Tau͡gaam pupik qatqan ilutunruvkenani-llu avatmini, melqut-llu pupiani qat'riksaunateng, agayulirtem allakaumavkarciqaa pupilek malrunlegni ernerni.

⁵Agayulirtem-llu yuvrinqigciiqaa malrunelgatni erenret. Tangllermini cakaninrilkan ayuvkenani-llu, agayulirtem ataam cali allakaumavkarciqaa malrunlegni ernerni.

⁶Kinguatni-llu malrunelgen erenret cali yuvrinqigciiqaa. Tauna-llu pupik mitrialikan ayuvkenani-llu amiani qanrutkeciqaa menuirutniluku; qaaryakainaulliniluni tauna. Ervikuniki aturani menuirutarkauluni.

⁷Tau͡gken kinguani yuvrillran agayulirtem, qanrutellruluku-llu assiriniluku, pupik tauna ayukan, ataam ag'arkauguq agayulirtem̄un.

⁸Agayulirtem-llu yuvrinqigciiqaa, apqucia-llu amiani ayullinikan qanrutkeciqaa menuulriarurrluku, apqucia mamyuilnguulliniuq.

⁹“Kina imna apqucingelria mamyuilngurmek taicimaarkauguq agayulirtem̄un.

¹⁰Agayulirtem yuvrirciqaa puvelriartangqerqan-llu qaterrluni melqut-llu tuani qat'rikata callarrluni-llu taum nunii,

¹¹ak'a ayagnillruluni mamyuilnguq, agayulirtem qanrutkeciqaa menuulriaruniluku; tau͡gaam allakarngaunaku nallunaunani menuulriaruan.

¹²Mamyuilnguq sageskan temiinun tamalkuan it'gartuumaan qamiqurtuumaan-llu

¹³agayulirtem yuvrirciqaa, mamyuilnguq-llu sagtellrukan temiinun tamalkuan qanrutkeciqaa menuitniluku. Amia tamarmi qat'rillruan, tua-i tauna menuituq.

¹⁴Tau͡gken amia callalriamek pupigtangqerquni tuaken ayagluni menuulriaruciquq.

¹⁵Agayulirtem-llu yuvrirciqaa, callalriamek-llu pupigmek tangerquni menuulriaruniciqaa. Callalria pupik mamyuilnguugarkauguq, yuk-llu tauna menuulriaruarkauluni.

¹⁶Tau͡gaam callalria tauna mamkan qat'riluni-llu, taum ullanqigtarkaugaa agayulirta.

¹⁷Agayulirtem yuvrirciqaa, tauna-llu callalria qat'rillrukan qanrutkeciqaa menuitniluku; tua-i menuituq.

¹⁸“Kina-llu imna aninguallrukuni, tauna-llu mamellruluni,

¹⁹aninguallra-llu puvkan qaterrluni-llu wall'u kavirceterrlugluni qatellriamek pitangqerqan,

²⁰agayulirtem yuvrirciqaa, apqucia-llu ilutunrukan amiani, melqut-llu tuani qat'rillrukata, tua-i agayulirtem qanrutkeciqaa menuulriaruniluku: Mamyuilnguq aninguallrakun naulliniuq.

²¹Tau͡gken agayulirtem yuvrillrani melqut naumalriit tuani qat'rillrunrilkata, melugtevkenani wall'u tunguvkenani, tua-i agayulirtem allakaumavkarciqaa malrunlegni ernerni.

²²Ayukan-llu kemgani agayulirtem qanrutkeciqaa menuulriaruniluku. Apquciurtelliniluni tauna.

²³Tau͡gken tauna cakaninrilkan ayuvkenani aninguallran qelengllakaa. Agayulirtem-llu qanrutkeciqaa menuirutniluku.

²⁴“Wall'u yuum qaingani uunertangqerqan, callangqalria-llu kavirrlugcen̄ani qatqan wall'u tamarmi qaterrluni,

²⁵agayulirtem yuvrirciqaa. Melqut-llu uunrani qat'rillrukata ilutunruluni-llu amiani, mamyuilnguuguq naulria uunrakun agayulirtem-llu menuulriaruniciqaa.

²⁶Tau͡gken agayulirtem yuvrillrani nuyat qat'riksailkuneng ilutunruvkenani-llu amiani, tangellra-llu mitrianani, allakaumavkarciqaa malrunlegni ernerni.

²⁷Malrunelgatni-llu erenret yuvrinqigciiqaa. Ayukan-llu amiani qanrutkeciqaa menuulriaruniluku; apqucia mamyuilnguuguq.

²⁸Tau͡gaam cakaniqsailkan amiani-llu sagtevkenani mamnengluni-llu, uunran puvevkaqainalqaa, qanrutkeciqaa agayulirtem menuirutniluku, uunran tauna qelengllakluku.

²⁹“Angun wall'u arnaq cam naukaku qamiqurrakun wall'u tamluakun,

³⁰agayulirtem yuvrirarkaugaa. Amiani ilutunrungalkan melqut-llu tuani esirlirrlugcen̄ateng akultuluteng-llu, mamyuilnguuguq, agayulirtem-llu menuulriaruniciqaa.

³¹Tau͡gken agayulirtem yuvrillrani apqucia ilutunrungatenrilkan amiani, tau͡gken cali assilrianek melqurtaunani, allakaumavkarciqaa yugnek malrunlegni ernerni.

³²Yuvrinqigciiqaa-llu erenret malrunelgatni, pupia-llu ayullrunrilkan esirlinek-llu melqurtaunani, ilutunruvkenani-llu amiani,

³³nuyani ungani-llu qiurciqai, pupiim tau͡gaam nuniinelnguut pivkenaki.

³⁴Malrunelgatni erenret yuvrinqigciiqaa, pupia-llu ayunrilkan ilutunruvkenani-llu amiani Agayulirtem menuirutniciqaa. Taum-llu aturani ervigciqai menuirutarkauluni-llu.

³⁵Tau͡gken kinguani menuircallmi apqucia ayukan

³⁶agayulirtem yuvrirciqaa. Pupia-llu ayukan esirlinek melqunek yuarnarqenritaa, nallunaunani menuulriarurcan.

³⁷Tau͡gken tangllermini pupia ayunrilkan, melqungluni-llu cangatenrilngurnek, pupia mam'uq, menuirulluni; agayulirtem-llu menuirutniciqaa.

³⁸“Angutem wall'u arnam qaingani qatellriamek kukupagtangkan

³⁹agayulirtem yuvrirciqaa. Kukupiit-llu qaterrlulriarukata, caunritut naugartellret qaingani. Tauna yuk menuituq.

⁴⁰“Angutem-llu qamiqurra meqluni nuyairuskuni patkallngeqainartuq, menuulriarungaunani.

⁴¹

⁴²Tau͡gken kavirceterrlulria qatellria pupik naukan patkallrani; tauna mamyuilnguuguq.

⁴³Agayulirtem-llu yuvrirciqaa. Tauna-llu naulria qatellriarukan kavirceterrlugluni patkallrani wall'u qauraani, mamyuilngurtun ayuqluni tememi,

⁴⁴mamyuilngurmek apqucingelliniuq, menuurrluni; Agayulirtem-llu menuulriaruniciqaa; tuani apqucia qamiqurrani uitaluni.

⁴⁵“Apqucilek mamyuilngurmek aturarkauguq allguumalrianek aturanek nuyani-llu aqevlavkarluki, kegginami-llu atlirnera patuluku qayagpagaarkauluni, ‘Menuulria, menuulria!’

⁴⁶Menuulriaruarkauguq apqucingqellermi taktaciatun; uitaarkauluni-llu kiirra'rmi elatiitni nunat.

⁴⁷“Uqugglugtangqerqan[3] aturami qusngit melqurritnek taqumalriami wall'u allami 'lumarrarmi,

⁴⁸ilarraqengraaku qusngit melqurritnek piliaqumalriami wall'u allami 'lumarrarmi wall'u qecigmi cali-llu cami qecigmek piliaqumalriami,

⁴⁹kavirceterrlukuni cungagceterrlugluni-llu uquggluuguq ayungiinalria nasvagnaqluni agayulirtem̄un.

⁵⁰Agayulirtem-llu yuvrirraarluku tauna allakaumavkarciqaa malrunlegni ernerni.

⁵¹Malrunelgatni-llu erenret yuvrirciqaa. Tauna-llu uquggluk ayukan tuani 'lumarrarmi wall'u qecigmi, menuulriaruuq. Erenret malrunelgatni cali yuvrirciqaa tuani-llu uquggluk ayukan, tauna menuulriaruluni.

⁵²Agayulirtem-llu ekuagarkaugaa aturaq uqugglugtangqellinian sagtellriamek.

⁵³“Tau͡gken agayulirtem yuvrillrani uquggluk ayunrilkan tuani,

⁵⁴alerqurciqaa aturaq erviisqelluku allakaumavkarluku-llu malrunlegni ernerni.

⁵⁵Erviumallran kinguani yuvrinqigciiqaa tauna aturaq. Ayunrilnge'rmi tangellra cimiqsailkuni cali menuulriaruuq. Tauna aturaq ekuanarqaa uqugglua manuanlengraan wall'u tunulirnerani.

⁵⁶Tau͡gken agayulirtem yuvrillrani uquggluk mitrialillinikan ervillran kinguani, allegluku au͡g'arciqaa tuaken nalliinek.

⁵⁷Tau͡gken cali alainqigeskuni aturami, ataam ayulriaruuq; tua-i pikestiin ekuagarkaugaa tauna.

⁵⁸Ervillrani aturaq uquggluk catairuskan aturami aipiriluku ervigciqaa nutaan-llu menuirutarkauluni.”

⁵⁹Una waniwa picirkiutnguuq uqugglugtangqerqan aturami qusngit melqurritnek taqumalriami wall'u allani 'lumarrarni wall'u cani qecigmek piliaqumalriani, tuaten-llu nallunrirarkauluku menuilnguq menuulria-llu.