Read Yupik Leviticus 15 Bible Online

Leviticus 15 - Yupik bible

Leviticus 15

¹ATANREM qanrutak Moses-aankuk Aaron-aaq-llu,

²“Qanqitek waten Israel-aam yuinun: Angun naulluutengluni qurrsuutmikun maq'laquni, maqellra menuulriaruuq.

³Una waniwa picirkiutnguarkauguq menuurtellranun maqellran nalliini wall'u maqenringraan, menuulriaruuq elliini.

⁴“Tamarmeng ingelret inangqavikellri tamarmeng-llu cali aqumvikellri menuulriaruciqut.

⁵Kia-llu imum agtuquniki ingelri

⁶wall'u aqumekuni aqumvikellranun, aturani ervigciqai ervuqerluni-llu, menuulriaruarkauluni-llu unugvianun.

⁷Kia-llu cali agtuquniu angun maqtulria, ervigciqai aturani ervuqerluni-llu, menuulriaruarkauluni-llu unugvianun.

⁸Taum-llu angutem maqtulriim qeciqaku iliit yuut menuilnguq, taum aturani ervigciqai ervuqerluni-llu, menuulriaruarkauluni-llu unugvianun.

⁹Kuunikun-llu ayalriim aqumgassuutii taum atullra maqtulim menuulriaruciquq.

¹⁰Kia-llu imum agtuquniu ca aciani uitalria taum maqtulriim menuulriaruarkauguq unugvianun. Kina-llu tegulautellrukuni taum aqumgavillranek camek erurarkaugai aturani ervuqerluni-llu. Menuulriaruciquq unugvianun.

¹¹Kina-llu imna maqyutengqellriim agtullrukani erurpailegmikek unategni, aturani ervigciqai ervuqerluni-llu, menuulriaruarkauluni-llu unugvianun.

¹²Qiku assigtaq maqyutengqellriim atullra navguumaarkauguq; tamarmeng-llu muriit assigtat agtullri eruumaarkauluteng mermun.

¹³“Maqyutengqellria-llu assirikuni uitarraarluni ernerni malrunlegni aturani ervigciqai erurluni-llu ellminek mermun ecuilngurmun, nutaan-llu menuirutarkauluni.

¹⁴Pingayunelgatni erenret tegutarkauguq malrugnek turtledove-agnek wall'u malrugnek yaquleyagaagnek pigeon-aagnek, taillukek-llu ciuqerranun ATANREM amiigani Pelatekam Agayuviim, tunlukek-llu agayulirtem̄un.

¹⁵Agayulirtem-llu elliitekciqak, aipaa elliitekluku assiilnguum au͡gautekaanun aipaa-llu ekuagarkauluku. Tuaten piluni Agayulirtem menuircariyaraq aturciqaa taumun maq'ilallermun.

¹⁶“Tau͡gken cali naulluutailnguq maq'ikuni arniuraqami pilaucirmitun, tamalkuan temni ervuqerciqaa, menuulriaruarkauluni-llu unugvianun.

¹⁷Tamarmeng-llu aturat amit-llu maq'errillranun agtuutellret eruumaciqut merkun, menuugarkauluteng-llu atakullranun.

¹⁸Angun-llu inarucikuni arnamek, maq'iluni-llu, tamarmek ervuqararkauguk, menuulriaruarkaulutek-llu unugvianun.

¹⁹“Arnaq aunraquni piyaramini iralumi, menuulriaruarkauguq malrunlegni ernerni. Kia-llu imum agtuquniu menuulriaruarkauluni unugvianun.

²⁰Aunrallermi nalliini aqumvikellri wall'u inangqavikellri menuulriaruarkaugut.

²¹Kia-llu agtuquniu ingelra arnam ervigarkaugai aturani ervuqerluni-llu, menuugarkauluni-llu unugvianun.

²²Kia-llu imum agtuquniki aqumvikellri, ervigciqai aturani ervuqerluni-llu, menuulriaruarkauluni-llu unugvianun.

²³Ingelrungraata wall'u allat aqumvikellri, kia imum agtullrukuniki menuulriaruarkauguq unugvianun.

²⁴Kia-llu imum angutem tutellrukuniu agelrumalria arnam menuurutiinek menuurtuq, menuulriaruarkauluni-llu malrunlegni ernerni; tamarmeng-llu ingelret taum angutem inarrvikellri menuulriaruarkauluteng.

²⁵“Arnaq-llu aunraquni ernerni amllerni aunraryaraqenrilkem̄ini, wall'u aunraquni agelrumayarani cipluku, aunrarturallermi taktaciatun menuugarkauguk pilaucirmitun agelrumaaqami.

²⁶Ingelret inangqavikellri aqumvikellri-llu tamarmeng menuulriaruciqut aunrallran taktaciatun.

²⁷Kia imum agtuquniki makut menuulriarurciiquq ervigarkauluki-llu aturani ervuqerluni-llu, menuugarkauluni-llu unugvianun.

²⁸Arulairutiini aunrallermi utaqaarkauguq malrunlegni ernerni, nutaan taukut kinguatni menuirutarkauluni.

²⁹Pingayunelgatni-llu erenret tegutarkauguq malrugnek turtledove-agnek wall'u malrugnek yaquleyagaagnek pigeon-aagnek, taillukek-llu agayulirtem̄un amiiganun Pelatekam Agayuviim.

³⁰Agayulirtem-llu elliitekciqaa atauciq yaqulek assiilnguum au͡gautekaanun, aipaa-llu ekualuku elliitekluku. Tuaten piluni agayulirtem menuircarciqaa arnaq tauna.

³¹“Waten piluci Israel-aam yui allakaumavkarciqaci menuullerkaatnek, tuquyuartut menuullermegteggun menuureskunegteggu Agayuvik akunlemeggni uitalria.”

³²“Una picirkiutnguuq angutmun naulluuterluni maqlermun, cali-llu angutmun qurrsaraminek maq'illermun;

³³cali arnamun agelrumallran nalliini wall'u angutmun arniullermun arnamek menuulriamek.