Read Yupik Leviticus 17 Bible Online

Leviticus 17 - Yupik bible

Leviticus 17

¹ATANREM qanrutaa Moses-aaq,

²“Qanruskiu Aaron-aaq qetunrai-llu tamalkuita-llu Israel-aam yui una ATANERMUN alerquutekellruniluku:

³Kina Israelite-aq tuqucikan elliitekaminek ATANERMUN kuluvagmek wall'u qusngimek wall'u qusngirngalngurmek nunat iluatni wall'u nunat elatiitni,

⁴alerquutmek narurciuq Pelatekaan ATANREM tuanlucian amiiganun tailluku tuqutenrilamiu. Pinarqelriaruuq aunrarceciami, Agayutem-llu yuinun ilaungairuciiquq.

⁵Picirkiun waniwa waten pilangesqelluki Israel-aam yui: Ungungssiaraat yuilqumi tuqutelalteng taitelangarkauluki agayulirtem̄un Pelatekaam ATANREM tuanlucian iteryaraanun, tuqulluki-llu tuani elliitekluki ilakuyucimun.

⁶Agayulirtem-llu auga ciqertautarkauluku ekuavianun ATANREM amiigani Pelatekam, ekualuku-llu uqua ilukegcinarqelriaruluku narnirqelriaruluku-llu ATANERMUN.

⁷Israel-aam yui tuqucinqiggngaitut pilaucirmegcetun yuilqumi, ATANREM pisqutii narurrluku elliitekluki anernerrlugnun qusngirngalngurtun ayuqellrianun. Una-llu Israel-aam yuini picirkiutnguarkauluni akwarpak.

⁸“Qanrutarkaugaten-llu cali: Israel-aam yuin iliit wall'u allanruluni uitalria nuniitni elliikuni ekuagiluni wall'u camek allamek elliikuni,

⁹taitevkenaku amiiganun Pelatekaanun ATANREM tuanlucian elliiteksarturluku ATANERMUN; tuaten pilria Agayutem yuinun ilaungairuciiquq.

¹⁰“Israel-aam-llu yuin iliit wall'u allanrulria nuniitni nerkuni kemegmek augiumanrilngurmek ATANREM ingluksaguciiqaa, Agayutem-llu yuinun ilaungairutarkauluni.

¹¹Tua-i-wa unguvalriim tamarmi unguvii augmelan; taumek wiinga cikiutekellrukeka elpeci pitekluci kuvluku ekuaviim qainganun akqutkumaciatun, assiilnguci au͡gaumalaasqelluki. Auk unguvaungan Agayutem aturyugngaa assiilngurmun au͡gautekluku.

¹²Taumek waten qanrutellrukenka Israel-aam yui: Ilasi yuk nunavcen̄i-llu allanrulria, nerngaituq kemegmek augiumanrilngurmek.

¹³“Cali-llu Israel-aam yuin iliit wall'u nuniitni allanrulria pissuquni ungungssimek wall'u yaqulegmek nerumaarkamek, pitarteng aunrarceciiqaat auga-llu nunamek patuluku.

¹⁴Unguvii tamarmi unguvalriim augani uitiin, taumek qanrutkellrukeka Israel-aam yuinun nerlaasqevkenaki kemegmek augiumanrilngurmek, tua-i-wa unguvalriim tamarmi unguvii augani uitiin; tuaten pikuni agayutem yuinun ilausciigaliciquq.

¹⁵“Kina-llu imna nerkuni tuqullermek ellminek wall'u ungungssiullgutain allgullratnek, nunalgutkeng'e'rpecen̄i wall'u allanrung'e'rmi, aturani erurarkaugai ervuqerluni-llu, menuulriaruarkauluni-llu unugvianun.

¹⁶Tau͡gken erunrilkuniki aturani wall'u ervuqerpek'nani, tua-i pinerrlugtellmi akia aturciqaa.”